Johnku 4:6-17

⁶Ka Jacobaku well ngaṟangi ngura nyara palula. Ka Jesunya iwarangka ankula kaḻaḻarinytjatjanu pakuringkula wellangka itingka nyinakatingu.

⁷Kaya nintintja tjuṯa kuranyu anu waḻikutu mai payamilantjikitja. Palu minyma Tjamiṟiyanya nguraṟa waḻinguṟu pitjangu mina tjutintjikitja. Ka Jesulu palula ngatjinu, “Ungamaṉi mina tjikintjaku!”

⁹Ka minyma panya paluṟu urulyaraṟa wangkangu, “Nyaakuṉin ngayula minaku ngatjini? Nyuntu Jew, ka ngayulu Tjamiṟiyalanguṟu.” (Alatji minyma paluṟu wangkangu panya Jew tjuṯa Tjamiṟiyanya nguraṟa tjuṯangka tjunguringkupai wiya, waṟu kutjungka tjikilpai wiya.)

¹⁰Ka Jesulu wangkangu, “Nyuntu ngurpa Mama Godalu nyuntunya ungkunytjitjaku munun puṯu kulini, nganalunta wanyu ngatjini minaku. Palu nyuntu ninti ngaṟalampa ngayula ngatjila, kaṉanta mina kutjupa ungkuku kurunpa wankalpai.”

¹¹Ka minymangku wangkangu, “Palu pakitanku yaaltji mina tjutintjaku? Piṯi nyangatja ngaṯi puḻka, parari mulapa. Yaaltjinguṟun mina wanka palunya nyuntu pala wangkanytjanya tjutilku?

¹²Nganampa tjamungku Jacobalu piṯi nyangatja tjawaṉu palumpa katjapitiku tjamupitiku kuka tjuṯaku kuḻu, kaya tjikiningi mina nyanga palunya. Nyara paluṟulampa puḻkangku tjawaṟa wantingu piṯi nyangatja, kantin nyuntulta puḻka mulapalta pitjangu maḻawanulta.”

¹³Ka Jesulu wangkangu, “Mina piṯi nyanganguṟu tjikintjatjanun piṟuku ngula iluringkuku.

¹⁴Palu ngayulu ungkunytja tjikiṟampan piṟuku iluringkunytja wiya nyinaku. Panya mina paluṟu tiṯutjara ngariku aṉangungka, ka aṉangu mina palunyatjara nyinara wanka tiṯutjara nyinaku Godala tjungu.”

¹⁵Ka minyma panya paluṟu wangkangu, “Ala, mina nyara palunyaṉi wanyu uwa, kaṉa piṟuku iluringkula iwarakatinytja wiya ma-nyinama.”

¹⁶Ka Jesulu wangkangu, “Ankulanku wati kuri aḻṯira ngalya-kati!”

¹⁷Ka minymangku wangkangu, “Ngayulu kuri wiya.” Ka Jesulu wangkangu, “Uwa palya nyuntu kuri wiya, palu ngayulu ninti nyuntu panyan wati kutjupaku mukuringkula palula ngaripai alatjiṯu. Munuṉa ninti panya nyuntunya ngaṉmanytju wati kuri 5-ngku kanyiningi. Ka panyan kuwari wati panya palulaṯu kampangkaṯu ngarinyi, nyuntumpa kuri mulapa wiyangka.”