YOHAAN 4:6-17

⁶Dhali jis yi’de/ ma Yakuub si’da/ diki’di mun mo be. Dhali wakan aYesus si’da/ a’di wukina is e mo gom ya jin yayina a’di nyaḵki imanciḵ a’di gwo mo. Dhali a’di c̱a’bki’da ’cesh nshemen jis yi’de/ mo. Haali/ mo ta’da tente/ mbwaŋ ’kup̱ mo be.

⁷Dhala ’bom gi Pan Saamira p̱u’dki’d mo mmomush yi’de/ mo. Yesus ki owa yim gwo mo ki: C̱iyi aha/ mmop̱i mo ma.

⁸Haali/ imanciḵ a’di gwo mo uni iikin e ’peŋkuman bampa/ mo mmoyolu/ tonṯe/ mo be.

⁹Dhala ’bom gi Pan Saamira ki thoḵ a’di gwo mo ki: Ki /e jin ta Wathi/ Yahuuda/ ’tho aha/ yi’de/ ip̱i manakan? aha/ jin tana ’bom gi Pan Saamira mo? Haali/ ’Kwani Yahuuda/ usha gwo me’d nyaḵki ’Kwani Samiriyiin mo be.

¹⁰Dhala Yesus ki thoḵa yim gwo mo ki: Waḵki/ /e mini nyiṯẖ to jin c̱in ma Arumgimis ki me’d mo dhali gom gwo gi a’di yansan jin o /e gwo mo ki: C̱iyi aha/ yi’de/ aha/ p̱ina mo tani /e mini ’taki doṯ a’di mo dhali a’di midi ’taki c̱i /e yi’de/ jin di ki e mo be.

¹¹Dhala ’bom ki thoḵ a’di gwo mo ki: Tap̱a, /e dar gi to mmomush yi’de/ mo dhali jis yi’de/ ’kula’kul mo ba/. Yi’de/ jin di ki e mina /e igam ’peni mana mo?

¹²A/ki /e can ka babam bam ka Yakuub ’taa? a’di jin c̱iki aman jis yi’de/ yansan mo? Dhali a’di ki is piti p̱iki’d si’da/ mo ’peni jis yi’de/ yansan mo dhali iya/m piti mo dhali to/em piti mo be.

¹³Yesus ki thoḵa yim gwo mo ki: Aris uni ’baar mo ka ’deṯe/ ’deṯe/ kun p̱i yi’de/ yansan mo tani mina yi’de/ doḵ/e bu’th mo be.

¹⁴Hili a’diyin jin midi p̱i yi’de/ jin miga/ c̱i a’di mo tani mina yi’de/ diki doḵ/e bu’th ki sule/ sule/ mo. Yi’de/ jin miga/ c̱i a’di mo tani midi war mo e a’di mmokash mo dhali mmodu’d mo ntagi mondiki/e ki sule/ sule/ ya ye ’ba/ mo be.

¹⁵Dhala ’bom ki thoḵ a’di gwo mo ki: Tap̱a, c̱iyi aha/ yi’de/ yansan mo ma, ki aha/ mina yi’de/ diki doḵ/e bu’th mo walla mmodiki yayu/ imahan mmoha’b yi’de/ mo be.

¹⁶Yesus ki owa yim gwo mo ki: Yaku/ mo ma. Yuḵa kaṯẖim pini mo dhali yayu/ imahan mo.

¹⁷Dhala ’bom ki thoḵ a’di gwo mo ki: Aha/ dara ga kaṯẖim pem mo. Yesus ki thoḵa yim gwo mo ki: Gwom pini ’boro’d mo jin ona /e gwo mo ki: Aha/ dara ga kaṯẖim pem mo be.