John 19:27-35

²⁷Jesus angkek kwertengerl ikwer, “Ntwa arelh yanh amey akem.” Ikwer-penh kwertengerl ra Jesus-kenh amikw atnwenheynek warl ikwerenh-warl, renh arntarnt-arey-alpetyek.

²⁸Jesus akalty-anem, rarl Ingkart-kenh warrk ingkerrenh ywerrelhilek-anem. Ikwer-penh ra ilelhek, “Ayeng angkethakw.” Angka arrwekel pip-itwek ayntenh. Angka arraty innganem irrek.

²⁹Artwa anyentel renh awek-penh, ra rag akely-anem inek. Wayn arrngeynp-warl ra rag renh pwerlpewek apelyilemel. Rag renh ra arwerl akert-ampeny-warl arertnek. Jesus arrakert-warl ra arwerl arlpenty irrwerlilek, ra antywelp-antywetyek angkethakwel.

³⁰Jesus-el wayn akely rag-el arrkernek. Rap angkek, “Atha warrk atyenh ywerrelhilek.” Akapwert kwenirreynek, ilwemel-anem.

³¹Jesus ra ilwek arlta Friday-el. Jew-rnem tyenkerr Anperarl Alhek “Passover” ikwer mpwelhenh-antey, amern kwenty arlkwey-angenh-antey. Jesus-then artwa ingwer-atherr-then arwerl iylpeyl-atherr-itwek aylpar-anenh-antey. Jew-rnem-kenh atyetyart-rnem angkerrenh, rernem ingkeny aylpenhekerr-awaty atwarrelhiletyek arwerl iylpeyl-atherr-they ingwemernt irrekerr-awaty. Rernem alhek Pilate renh ayernetyek. Rernem ikwer angkey-alhek, “Artwa ahelengkw-rnem ilantha, ‘Ngkwern arlaw atherr aketyek, aynterarrirretyek rernem anamerl ilwem-anem. Artwa irlkentyel renh-rnem atwarrelhiley-areny ingkeny aylpenhekerr-awaty.’” Pilate-el renh-rnem ilanthek, arwerl ilkwel ngkwern arlaw atherr atweynetyek akalthemel.

³²Arrwekel rernem artwa anyent-kenh ngkwern arlaw atherr akek, ikwer-penh artwa ingwer-ampenyek-anem ngkwern arlaw atherr akek arrpemarl.

³³Rernem Jesus-warl apetyek, rernemap renh arey-alhek, ra kel ilwekarl. Rernem ngkwern akey-angenh-antey.

³⁴Artwa ahelengkw anyentel Jesus ngkerraly irrtyartel atanthek. Arrkngethen kwaty-then ikwer-they thelelhek.

³⁵Atha anngetherr renh arek, irrtyartelarl renh atanthek. Atha arrekantherr arraty ileyel, arrantherr ikwer awelh-ayntetyek.