13Etnantama rrangkia walya kamala, walyakarta ekururna urlarrakurlarra lhaka. Etna kuta ilkaka, Nurna Altjirranha tnantjama. Altjirrai, urrpia ungkwanganha lyekarrilai, erala lyarta nurnakurna pitjima. Altjirrai, Israel-arinya ntjarraka king lyekarrilai.”
14Jesuala donkey kurrka aramala, donkey ekura ntjika. Nhanga Altjirraka Angkatja Imankinyala ilama,
15“Relha Jerusalem-arinya ntjarrai, rrangkarra itja trerritjika. Arai, king rrakangkarra, rrakangkarrurna pitjima donkey kurrkala nanhamala.”
16Kurtungurla ntjarrala Jesuanha aramalanga donkey-ala nanhamanga, etna Altjirraka Angkatja Imankinya nhanhaka itja ilpangkaka. Anmanta, Jesuanha kala alkirurna alpukalangantama, etna angkatja ekura ilpangkaka. Etna turta lhangkaraka angkatja era ilakala Jesuanha lakinha Jerusalem-urna irrputjinala.
17Arai, relha ntjarrala Jesuanha nhanga araka era Lazarus-anha errilknga ntjarranga kamalhelamanga. Etnantama nhanhiperra kuta angkarlanaka, Jerusalem-ala.