Johanningundru 8:19-57

¹⁹Tana nunkangu jatana wonti: “Woderi Ngaperi jinkani nganai?” Jesujeli kalabana wonti: “Jura wata ngana ja wata Ngaperi ngakani ngujamai; jura ngana ngujamanani, jura bakana Ngaperi ngakani ngujamanani.”

²⁰Tananapini jaura Jesujeli mardatandra kokuni kara-kara jatana wonti, Nulu Godaia pungani ngujangujara jinkinani; ja wata kulnujeli nina patana wonti, ngangau diti nunkani wata kantji wokarana warai.

²¹Jesus nakaldra tanangu jatana wonti: “Ngani wapai, ja jura ngana wontila nganai, ja madlentjani juranani jura palila nganai; wodajeri ngani wapai, naka jura ngandandariai wokarala.”

²²Juda kana jatana wonti: “Nulia ngantjai kara munta nari ngankaterila, ngangau Nau jatai: Wodajeri ngani wapai, naka jura ngandandariai wokarala?”

²³Ja Nau tanangu jatana wonti: “Jura ngarinalundru nganai, ngani mirindru nganai; jura nunkangupini mitandru nganai, ngani wata nunkangupini mitandru nganai.

²⁴Ngani jurangu matja jatana warai, jura madlentjani juranani palila nganai; ngangau jura wata morlalu ngundranani ngani Nauja nganai, jura madlentjani juranani palila nganai.”

²⁵Tana nunkangu jatana wonti: “Worana jidni nganai?” Ja Jesus tanangu jatana wonti: “Ngopera jenia, mina ngani jurangu jatai.

²⁶Marapu ngato ngamalkai jurangundru jatala ja kalala kurala; ja Nauja, Nulia ngana jinpanala, morlalu nganai, ja mina ngato nunkangundru ngarana wonti, jena ngato mitalani kaukaubai.”

²⁷Tanali wata ngujamana wonti, Nau tanangu Ngaperandru jatanani.

²⁸Jesus tanangu jatana wonti: “Jura Kanaia Ngatamura matja miri ngankana warai, ngadani jura ngujamala nganai ngani Nauja nganai, ja ngato muntali panila ngankai, a-ai, worderu Ngaperali ngakangu ngujangujara jinkina wonti, jenia ngato kaukaubai.

²⁹Ja Nulia ngana jinpanala, Naupini ngakangunto nganai; ja Ngaperali ngana wata kulnulu worarai, ngangau ngato milingeru ngankai, mina Nulia ngantjai.”

³⁰Nulu jenia kaukaubanani, marapujeli nunkangu morlalu ngundrana wonti.

³¹Jesus tanangu Juda kanani, tanali nunkangu morlalu ngundranani, jatana wonti: “Jura jaurani ngakanani wonki ngamanani, jura morlalu mili ngakani ngananani,

³²Ja jura morlaluta ngujamala nganai, ja morlalulali jurana kurakala nganai.”

³³Tanali nunkangu kalabana wonti: “Abrahamani ngatamura ngaiani nganai, ja wata pota kulno ngaiani kulnuja mili nganana wonti; worderu jidni jatai: “Jura kurakanila nantjinanto?”

³⁴Jesujeli tanangu kalabana wonti: “Morlalu, morlalu, ngani jurangu jatai: Warle madlentji ngankai, nau madlentjaia mili nganai.

³⁵Mili wata ngurali pungani ngamai; Ngatamura ngurali ngamai.

³⁶Ngatamurajeli jurana kurakanani, jura kantji kurakanila nganala nganai.

³⁷Ngani milkila jura Abrahamani ngatamura nganai; ja jura wontiai ngana naria nandrala, ngangau jaura ngakani wata jurangu wiriai.

³⁸Ngato kaukaubai, mina ngato Ngaperani ngakanani najina wonti; ja jura ngankai, mina jura ngaperani juranani najina warai.”

³⁹Tanali nunkangu kalabana wonti ja jatana wonti: “Ngaperi ngaianini Abraham nganai.” Jesus tanangu jatana wonti: “Jura Abrahamani kupa ngananani, jura bakana Abrahamani ngankana ngankananto.

⁴⁰Karari jura ngana wontiai naria nandrala, jenipara kana Nulia jurangu morlalu kaukaubana warai, nina ngato Godandru ngarana wonti; jenia Abrahamali wata ngankana wonti.

⁴¹Jura ngaperaia juranaia ngankani ngankai.” Tana; nunkangu jatana wonti: “Ngaiani wata palakantjindru dankana wonti; Ngaperi kulno ngaiani ngamalkai, ninaia Goda.”

⁴²Jesus tanangu jatana wonti: “Goda Ngaperi jurani: ngananani, jura ngana ngantjanani; ngangau ngani Godandru dunkana wonti ja wokarana wonti, ngangau bakana ngani wata munta wokarana wonti, a-ai, Nulia ngana jinpanala.

⁴³Minandru jura jaura ngakani wata ngujamai? Ngangau jura ngandandariai jaura ngakani ngarala.

⁴⁴Jura ngaperi kutjindru nganai, ja ngaperaia juranaia jertapaterina jura jertapateriai ngankala. Naupini kananandranietja ngoperandru nganana wonti, ja morlalulani nau wata terkai, ngangau morlalula wata nunkangu nganai. Nau jedi jatanani, nulu nunkangundru munta jatai, ngangau nau jedikantji nganai ja nunkanipini ngaperi.

⁴⁵Ngangau ngani jurangu jatai, jura ngakangu wata morlalu ngundrai.

⁴⁶Warle jurangundru ngakangu madlentji kulno wondrai? “Ngani morlaluta jatanani, minandru jura ngakangu wata morlalu ngundrai?

⁴⁷Worana Godandru nganai, nulu Godaia jaura ngarai; jendrangundruja jura wata ngarai, ngangau jura wata Godandru nganai.”

⁴⁸Juda kanali kalabana wonti ja nunkangu jatana wonti: “Ngaiani wata talku jatai, jidni Samarita kana nganai ja kutji ngamalkai?”

⁴⁹Jesujeli kalabana wonti: “Ngato wata kutji ngamalkai, a-ai, ngato Ngaperi ngakani pirna ngundrai, ja jura ngana wata pirna ngundrai.

⁵⁰Ngato wata pirnaia ngakani wontiai; Kulno nganai, Nulupini ninaia wontiai ja kalala kurai.

⁵¹Morlalu, morlalu, ngani jurangu jatai: Kulnujeli jaura ngakani ngamalkanani, nulu ngurali wata nari najila nganai.”

⁵²Juda kana nunkangu jatana wonti: Karari ngaiani ngujamai, jundru kutji ngamalkai; Abraham ja Propheta palina wonti, ja jidni jatai: Kulnujeli jaura ngakani ngamalkanani, nulu ngurali wata nari najila nganai.

⁵³Jidni morla pirna nganai ngaianini ngaperani Abrahamangu, nau palina wonti? Ja Propheta wora palina wonti; worana jidni munta ngankateriai?”

⁵⁴Jesujeli kalabana wonti: “Ngani munta pirna ngankaterinani pirnaia ngakani pani nganai; Ngaperali ngakanali ngana pirna ngankai, nunkangundru jura jatai, Nauja Goda jurani nganai.

⁵⁵Ja jura ninaia wata ngujamana warai; ngato ninaia ngujamai; ja ngani jatanani, ngato ninaia wata ngujamai, ngani jedikantji nganala nganai jurangu jeribaka; ngato ninaia ngujamai, ja jaura nunkani ngato ngamalkai.

⁵⁶Abraham ngaperi jurani murlali pantjina wonti ditji ngakani najila; ja nulu nina najina wonti ja mankina wonti.”

⁵⁷Juda kana nunkangu jatana wonti: “Jidni wata kilpawoldra 50 nganai? Ja jundru Abraham najina wonti.”