SAN JUAN 8:19-57

¹⁹Xlacán chuná̱ kalhasquinko̱lh: —¿Ní̱ huilachá̱ mintla̱t? Jesús huaniko̱lh: —Huixín ni̱ lakapasá̱tit Quintla̱t, sa̱mpi̱ ni̱ catzi̱yá̱tit xatí̱ ya̱ chixcú̱ quit; lapi̱ xcatzí̱tit xatí̱ ya̱ chixcú̱ quit na̱ xlakapástit quintla̱t.

²⁰Jesús chuná̱ ta̱chihui̱nanko̱lh yama̱ fariseos acxni̱ xlá̱ xakchihui̱nama̱ lacatzú̱ c-xama̱laccha tlanca templo anta̱ni̱ xpu̱muju̱cán limosna, hua̱mpi̱ ni̱tí̱ chípalh laqui̱mpi̱ nale̱ncán c-pu̱la̱chi̱n sa̱mpi̱ ni̱ xa̱lakchá̱n xquilhtamacú̱ la̱ namacama̱sta̱cán.

²¹A̱li̱sta̱lh Jesús huanipalako̱lh yuma̱ tachihuí̱n: —Quit cama̱ a̱lacatanu̱, chu̱ naquimputzayá̱tit, hua̱mpi̱ huixín ni̱ caquintitá̱kstit, pus anta̱ni̱ quit nacchá̱n huixín ni̱ lay catipítit, sa̱mpi̱ ma̱squi nani̱yá̱tit, chunacú̱ ni̱ a̱ma̱tzanka̱nanicani̱tántit nahuán mintala̱kalhi̱ncán.

²²Cha̱nchu̱ yama̱ xanapuxcun judíos chuná̱ tzúculh la̱huaniko̱y: —Yuma̱ chixcú̱ ma̱x caj naacstumakni̱cán, huá̱ chuná̱ li̱huán pi̱ ni̱ lay caticha̱hu anta̱ni̱ xlá̱ nachá̱n.

²³Cha̱nchu̱ Jesús huaniko̱lh: —Huixín kalhi̱yá̱tit mimpu̱tahui̱lhcán antá̱ u̱nú̱ ca̱tu̱tzú̱, hua̱mpi̱ quimpu̱táhui̱lh huí̱ ta̱lhmá̱n; huixín u̱nú̱ xala ca̱tuxá̱huat, hua̱mpi̱ quit ni̱ antá̱ u̱nú̱ xala ca̱tuxá̱huat.

²⁴Huachá̱ xpa̱lacata̱ cca̱li̱huanín pi̱ chunacú kalhi̱yá̱tit mintala̱kalhí̱n nani̱yá̱tit; sa̱mpi̱ lapi̱ ni̱ xca̱najlátit pi̱ quit yama̱ ti̱ naca̱lakma̱xtuyá̱n, chunacú ni̱ a̱ma̱tzanka̱nanicani̱tántit nahuán acxni̱ nani̱yá̱tit.

²⁵Xlacán chuná̱ huaniko̱lh: —Xli̱ca̱na̱, ¿xatí̱ ya̱ chixcú̱ huix? Jesús kalhti̱ko̱lh: —Huixín catzi̱yá̱tit pi̱ hasta la̱ntla̱ta xakasiyaj tuncán cca̱huanini̱tán xatí̱ quit.

²⁶Quit tla̱n lhu̱hua̱ xacca̱li̱chihui̱nán, chu̱ xacca̱li̱ya̱huán hua̱ntu̱ ni̱tlá̱n tlahuayá̱tit, hua̱mpi̱ huata huá̱ nacca̱ma̱siyuniyá̱n, huixín ti̱ xala ca̱tuxá̱huat, hua̱ntu̱ lacasquín hua̱nti̱ quimacamini̱t, chu̱ hua̱ntu̱ ckaxmatnini̱t; pus xlá̱ luhua aksti̱tum xtalacapa̱stacni.

²⁷Hua̱mpi̱ xlacán ni̱ akata̱ksko̱lh pi̱ Jesús xli̱xakatli̱ma̱kó̱ Dios hua̱nti̱ Xtla̱t,

²⁸chu̱ huá̱ chuná̱ li̱huanipalako̱lh: —Hasta acxni̱ huixín naquima̱ta̱lhma̱ni̱yá̱tit quit Xatalacsacni Chixcú̱ c-cruz, pus acxnicú̱ luhua naakata̱ksá̱tit xatí̱ quit; chu̱ na̱ acxnicú̱ nacatzi̱yá̱tit pi̱ quit ni̱tú̱ ctlahuay hua̱ntu̱ caj quiacstu quimpa̱lacata, huata caj xma̱n huá̱ cuan hua̱ntu̱ quima̱siyunini̱t Quintla̱t.

²⁹Sa̱mpi̱ Dios, hua̱nti̱ quit quimacamini̱t, ankalhí̱n quinta̱lapu̱lay, niucxni̱ naquiakxtakmakán sa̱mpi̱ ankalhí̱n quit ctlahuay hua̱ntu̱ xlá̱ lakati̱y.

³⁰Acxni̱ chuná̱ chihui̱nanko̱lh Jesús, luhua lhu̱hua̱ ti̱ ca̱najlaniko̱lh, chu̱ csta̱laniputunko̱y.

³¹Hua̱mpi̱ Jesús chuná̱ huanikolh hua̱nti̱ xca̱najlaniko̱ni̱t: —Pus lapi̱ huixín luhua aksti̱tumá̱ nama̱kantaxti̱yá̱tit hua̱ntu̱ cca̱li̱ma̱paksi̱yá̱n, chuná̱ tla̱n nali̱taxtuyá̱tit la̱ xaxli̱ca̱na̱ quili̱ma̱kalhtahuáka̱t.

³²Chu̱ chuná̱ huixín tla̱n nalakapasá̱tit hua̱ntu̱ xtaluloktat xtalacapa̱stacni Dios, chu̱ hua̱ yama̱ talacapa̱stacni̱ naca̱ma̱xqui̱yá̱n laktáxtut, sa̱mpi̱ caj la̱ tachí̱n huixín lapá̱tit.

³³Makapitzí̱n chuná̱ kalhti̱ko̱lh: —Yama̱ kolutzi̱n Abraham hua̱nti̱ maka̱n quilhtamacú̱ xlama̱ xatali̱pa̱hu quinquilhtzucutcán xuani̱t quin, chu̱ niucxni̱ a̱quinca̱chi̱caná̱n laqui̱mpi̱ pala tí̱ caj la̱ tachí̱n naquinca̱ma̱scujuyá̱n. ¿Lá̱ntla̱ chú̱ huix huana̱ pi̱ nackalhi̱ya̱hu laktáxtut?

³⁴Jesús huaniko̱lh: —Xli̱ca̱na̱ cca̱huaniyá̱n pi̱ xli̱pacs hua̱nti̱ tlahuako̱y tala̱kalhí̱n, xlacán li̱taxtuko̱y xta̱chuná̱ la̱ xtasa̱cuacan tala̱kalhí̱n, usuchí̱ la̱ xtachi̱ncán.

³⁵Cha̱tum tasa̱cua̱ hua̱nti̱ caj la̱ tachí̱n ma̱scujucán, xlá̱ ni̱ lay tlahuay tu̱ lacasquín, huata huá̱ tlahuay hua̱ntu̱ huaniy xma̱la̱ná, hua̱mpi̱ quit xCam Dios ni̱tí̱ quima̱scujuy la̱ xtachí̱n.

³⁶Huá̱ cca̱li̱huaniyá̱n, lapi̱ quit xCam Dios cca̱ma̱xqui̱yá̱n laktáxtut, yama̱ tala̱kalhí̱n nia̱lh lay catica̱ma̱scujún xta̱chuná̱ la̱ xtachí̱n.

³⁷Xli̱ca̱na̱ aya ccatzi̱y pi̱ huixín minquilhtzucutcán xuani̱t yama̱ xamaka̱n kolutzi̱n Abraham, hua̱mpi̱ chunacú̱ huixín quimakni̱putuná̱tit sa̱mpi̱ ni̱ ma̱tla̱ni̱yá̱tit hua̱ntu̱ quit cca̱huaniyá̱n.

³⁸Quit ckalhi̱y xtalacapa̱stacni Quintla̱t, chu̱ huá̱ cli̱chihui̱nán hua̱ntu̱ quima̱siyunini̱t, hua̱mpi̱ huixín kalhi̱yá̱tit tanu̱ mintla̱tcán, chu̱ huá̱ tlahuayá̱tit hua̱ntu̱ xlá̱ ca̱ma̱siyunini̱tán.

³⁹Xlacán chuná̱ kalhti̱nanko̱lh: —Quin hua̱ quintla̱tcán xuani̱t yama̱ xamaka̱n Abraham. Jesús chuná̱ huaniko̱lh: —Lapi̱ xli̱ca̱na̱ huixín xcamán cahuá̱ kolutzi̱n Abraham, pus na̱ chuná̱ xmacasta̱lá̱tit la̱ xlá̱ tilatáma̱lh ca̱tuxá̱huat.

⁴⁰Ma̱squi quit aya cca̱huanín yama̱ talacapa̱stacni̱ hua̱ntu̱ Dios quima̱siyunini̱t, huixín ni̱ ca̱najlayá̱tit, chu̱ fuerza̱ quimakni̱putuná̱tit. Abraham niucxni̱ xtlahuay hua̱ntu̱ huixín tlahuayá̱tit.

⁴¹Huixín huá̱ tlahuayá̱tit hua̱ntu̱ tlahuay hua̱nti̱ xli̱ca̱na̱ mintla̱tcán. Xlacán chuná̱ huanipalako̱lh: —Ni̱ xli̱ca̱na̱, sa̱mpi̱ quin caj xma̱n cha̱tum quintla̱ticán huí̱, hua̱ Dios.

⁴²Jesús chuná̱ huaniko̱lh: —Lapi̱ xli̱ca̱na̱ cahuá̱ Dios mintla̱ticán, huixín xquimpa̱xquí̱tit, sa̱mpi̱ antá̱ cmini̱tanchá̱ c-xpa̱xtú̱n anta̱ni̱ xlá̱ huilachá. Pus quit ni̱ caj quintapa̱xuhuá̱n ma̱squi cmini̱t u̱nú̱ ca̱tuxá̱huat, huata huá̱ quimacamini̱t Dios hua̱nti̱ Quintla̱t.

⁴³¿Tú̱huan huixín ni̱ lay akata̱ksá̱tit hua̱ntu̱ cca̱huaniyá̱n? Huá̱ li̱lay sa̱mpi̱ huixín ni̱ kaxpatputuná̱tit hua̱ntu̱ quit quintachihuí̱n.

⁴⁴Hua̱ huixín mintla̱tcán akskahuiní; huixín huá̱ tapaksi̱niyá̱tit, chu̱ huá̱ tlahuaputuná̱tit hua̱ntu̱ xlá̱ lakati̱y. Tama̱ akskahuiní̱ luhua ankalhí̱n xamakni̱ná̱ xkalhi̱y xtapuhuá̱n hasta la̱ntla̱ xquilhtzucut ca̱tuxá̱huat. Xlá̱ niucxni̱ lakati̱ni̱t hua̱ntu̱ talulóktat, chu̱ ni̱ pala hua̱ntu̱ lacati̱tum. Acxni̱ xlá̱ ma̱tzuqui̱y xta̱ksaní̱n, anta tuncán li̱tasiyuy hua̱ntu̱ xlá̱ xtapuhuá̱n, sa̱mpi̱ luhua xaaksani̱ná, chu̱ hua̱ xlá̱ xtla̱tcan pacs aksani̱naní̱n.

⁴⁵Hua̱ xpa̱lacata, ma̱squi quit cuan luhua xli̱ca̱na̱ talulóktat, huixín ni̱ lay quinca̱najlaniyá̱tit.

⁴⁶Caquihuanítit, ¿xatí̱ huixín tla̱n naquili̱makstuntlahuay ma̱squi pala tú̱ tala̱kalhí̱n? Hua̱mpi̱ ma̱squi catzi̱yá̱tit pi̱ quit ankalhí̱n cli̱chihui̱nani̱t xtalacapa̱stacni Dios, ¿Tú̱ chú̱ xpa̱lacata ni̱ quili̱ca̱najlaniyá̱tit?

⁴⁷Hua̱nti̱ xli̱ca̱na̱ li̱pa̱huanko̱y Dios, chu̱ tapaksi̱niko̱y, xlacán kaxmatniko̱y xtachihuí̱n, hua̱mpi̱ cumu huixín ni̱ tapaksi̱niyá̱tit Dios, huá̱ ni̱ li̱kaxpatputuná̱tit xtachihuí̱n.

⁴⁸Cha̱nchu̱ yama̱ xanapuxcun judíos chuná̱ huaniko̱lh: —Luhua actancs acxni̱ cuana̱hu pi̱ huix kalhi̱ya̱ ni̱tla̱n mintá̱yat la̱ hua̱nti̱ xala c-Samaria. Ni̱ cakskahuinana̱hu acxni̱ cuanahu pi̱ makatlajani̱tán xtalacapa̱stacni akskahuiní.

⁴⁹Kalhtí̱nalh Jesús: —Quit ni̱ quimakatlajama̱ xtalacapa̱stacni akskahuiní, huata yama̱ lactlanca tatlahu hua̱ntu̱ quit ctlahuako̱y, chuná̱ cli̱ma̱xqui̱ma̱ ca̱cni̱ Quintla̱t, hua̱mpi̱ huata huixín ni̱ tzinú̱ quili̱ma̱xqui̱yá̱tit ca̱cni̱ tu̱ quili̱ya̱huayá̱tit.

⁵⁰Hua̱mpi̱ ni̱ huá̱ huamputún pi̱ quit luhua clacasquima̱ pi̱ pacs naquinca̱cni̱nanicán, ma̱squi xli̱ca̱na̱ huí̱ cha̱tum hua̱nti̱ lacasquín naquinca̱cni̱nanicán, chu̱ xlá̱ aksti̱tum naputza̱naniko̱y, chu̱ namaksquinko̱y cuenta̱ hua̱nti̱ ni̱ quili̱pa̱huamputunko̱y.

⁵¹Luhua xli̱ca̱na̱ tu̱ cca̱huaniyá̱n, pi̱ hua̱nti̱ nacui̱ntajtlahuay hua̱ntu̱ quit cli̱chihui̱nán, xlá̱ niucxni̱ catíni̱lh xli̱stacna.

⁵²Xlacán huanipalako̱lh: —Xli̱ca̱na̱ la̱nchú̱ luhua ctaluloka̱hu pi̱ ca̱na̱ makatlajani̱tán xtalacapa̱stacni akskahuiní, sa̱mpi̱ hua̱ xalakmaka̱n profetas, chu̱ yama̱ hua̱nti̱ quinquilhtzucutcan Abraham, xlacán pacs ni̱ko̱ni̱t; chi̱nchu̱ huix huana̱ pi̱ hua̱nti̱ nacui̱ntajtlahuay hua̱ntu̱ huix li̱chihui̱nana, niucxni̱ catíni̱lh xli̱stacna.

⁵³¿Pi̱ xali̱huacá̱ chú̱ huix tlanca̱ milacatzúcut, ni̱ xahua̱ la̱ yama̱ xamaka̱n quintla̱tcan Abraham? Sa̱mpi̱ xlá̱ na̱ ni̱lh, chu̱ xli̱pacs profetas. ¿Tí̱ chú̱ huix li̱taxtuputuna?

⁵⁴Kalhtí̱nalh Jesús: —Lapi̱ caj quit cacstulacasquín pi̱ naquinca̱cni̱naniyá̱tit, yama̱ quintachihuí̱n hua̱ntu̱ quit xacca̱huanín ni̱tú̱ xtápalh. Hua̱mpi̱ huata huí̱ cha̱tum hua̱nti̱ lacasquín pi̱ naquinca̱cni̱naniyá̱tit, pus hua̱ quintla̱t, huatiya̱ tamá̱ hua̱nti̱ huixín li̱ma̱xtuyá̱tit pi̱ huá̱ miDioscán.

⁵⁵Ma̱squi luhua chuná̱ chú̱ huixín ni̱ lakapasá̱tit xtalacapa̱stacni, hua̱mpi̱ quit xlá̱ clakapasa. Lapi̱ xackalhtátze̱kli, xacuá̱ pi̱ ni̱ clakapasa, pus na̱ luhua xaaksani̱ná̱ xacli̱táxtulh xta̱chuná̱ la̱ huixín. Hua̱mpi̱ cumu quit xli̱ca̱na̱ clakapasa, huá̱ cli̱tlahuako̱y hua̱ntu̱ xlá̱ quili̱ma̱paksi̱y.

⁵⁶Hua̱ yama̱ Abraham hua̱nti̱ xamaka̱n minquilhtzucutcán, xli̱ca̱na̱ luhua li̱pa̱xúhualh acxni̱ xlá̱ cajcu xpuhuama̱ pi̱ quit nacmín ca̱tuxá̱huat, huata xli̱ca̱na̱ xlá̱ ucxilhlacáchilh yuma̱ quilhtamacú̱ c-xtalacapa̱stacni, chu̱ luhua li̱pa̱xúhualh.

⁵⁷Yuma̱ judíos chuná̱ huaniko̱lh Jesús: —Hua̱mpi̱ huix ni̱ naj pala kalhi̱ya̱ ita̱t ciento ca̱ta̱ la̱ntla̱ lápa̱t, ¿lá̱ntla̱ chi̱nchu̱ huana̱ pi̱ ucxilhni̱ta̱ yama̱ xamaka̱n quinquilhtzucutcan Abraham?