Johane I 3:11-17

¹¹Mitidâŋ mana wareeŋgopieŋ i ʒiŋuc hâcne: Maŋzi jauŋ babac enʒepeneŋ.

¹²Kaiŋte hata mi âtenʒepeneŋ, e sâqocne runere motec erâ ɋaticne qâhâmowec. Erâ wemocte qâhâmowec? Ine kecʒiŋucte: E jahacne juju bapa sâqocne â ɋaticnere juju bapa biaŋne irec.

¹³Âgofâc‐nane, miti tâmiriczi qaisoc‐ŋopapie manapie iŋuc me iŋuc mi ezejec.

¹⁴Nâŋâcne ʒiŋuc manaeŋgopeneŋ: Hâmockonec wiserâ jujuo raʒimbeŋ. Iŋuc ekicnere hâcne âgofâc‐nâŋec maŋjauŋ ejareeŋgopeneŋ. Moc e maŋjauŋ tâmiric juocmu e ine hâmocnea juocmu.

¹⁵Moc e âgo‐ticne qaisockeocmu e ʒika qaqaŋic mucnezo. Eme ŋoŋe ʒika qaqaŋic jaŋere manaeŋgopieŋ, jaŋere maŋko juju sanaŋ mi fuarâ foocmu.

¹⁶Jesu e nâŋâcnere erâ juju‐ticne qikiŋnewecko maŋjauŋte fuŋne ʒâŋitambeŋ. Eme nâŋâc iŋuc jaha âgofâc‐nâŋec jaŋere erâ juju‐nâŋec qikiŋnenaŋte munârekicne.

¹⁷Ŋic moc e nânâ mafa mâriri‐ticne fohame âgo‐ticne waha qaqane jume hone takirerâ bune bofackeocmu, ere muzo, maŋticnao Anuture maŋjauŋ mi fokac.