Joaŋ 4:4-23

⁴Gamêŋ tonaŋ ŋaintêna tageŋ kêsa Samariaŋageŋ gêja.

⁵Tec eŋ kêsêIêŋ e gêô lasê malac Samariaŋa teŋ ŋaê Sukar gêc kôm, taŋ Jakob kêkêŋ gêdêŋ latu Josep naŋ ŋagala.

⁶Ma Jakobnê bumata kêpoac tonaŋ. Jesu kêsêlêŋ e têkwa gêbac tec gêŋgôŋ bumata tau, ma oc amboac kêkô ŋaluŋgeŋ.

⁷Go awê teŋ aŋga Samaria kêsa gêmêŋ gebe êtê bu. Tec Jesu kêsôm gêdêŋ eŋ gebe “Ôkêŋ bu mêŋjanôm.”

⁸Gêdêŋ tonaŋ Jesunê ŋacseŋomi sêsa malac sêja sebe sênam ôli mo.

⁹Ma awê Samariaŋa tonaŋ kêsôm gêdêŋ eŋ gebe “Aôm Juda ma aê awê Samariaŋa, mago amboac ondoc tec koteŋ gebe jakêŋ bu aôm ônôm nec.” (Gebe Juda to lau Samaria nêŋ biŋ gelom tau atom.)

¹⁰Go Jesu gêjô eŋ awa gebe “Aôm embe ôjala gêŋ, taŋ Anôtô kêkêŋ naŋ, to ŋac taŋ kêsôm gêdêŋ aôm gebe Ôkêŋ bu mêŋjanôm naŋ, go aômgeŋ oteŋ eŋ gebe êkêŋ bu mata jaliŋa êndêŋ aôm.”

¹¹Ma awê kêsôm gêdêŋ eŋ gebe “Apômtau, aômnêm laclu masi ma bu nec gacgeŋ kêsêp gêja su, ma aôm oc ôkôc bu mata jaliŋa tau aŋga ondoc.

¹²Aêac tameŋi Jakob kêkêŋ bumata tonec gêdêŋ aêac. Êsêac to latui ma nê bôc sênôm bu tau. Aôm kôlêlêc eŋ su me.”

¹³Go Jesu gêjô eŋ awa gebe “Lau samob, naŋ sênôm bu tonec, oc êjô êsêac êtiam.

¹⁴Mago teŋ embe ênôm bu, taŋ aê oc jakêŋ êndêŋ eŋ naŋ, oc bu êjô eŋ êtiam atom, êôc eŋ tôŋ endeŋ tôŋgeŋ. Gebe bu, taŋ aê jakêŋ êndêŋ eŋ naŋ, êtu bumata êpulu aŋga ênê ŋalêlôm ma êkêŋ eŋ êŋgôŋ mata jali teŋgeŋ.”

¹⁵Tec awê tau kêsôm gêdêŋ Jesu gebe “Apômtau, ôkêŋ bu tonaŋ êndêŋ aê acgommaŋ, gebe bu êjô aê êtiam atom ma jamêŋ tonec êtu jatê buŋa êtiam atom.”

¹⁶Ma Jesu kêsôm gêdêŋ eŋ gebe “Ôna ômôêc nêm akweŋ, agêc amu amêŋ tonec.”

¹⁷Tec awê gêjô eŋ awa gebe “Aêŋoc akweŋ masi.” Go Jesu kêsôm gêdêŋ eŋ gebe “Kôsôm jagêdêŋ gebe nêm akweŋ masi.

¹⁸Aôm gôjam ŋac lemeŋ teŋ su, ma ŋac, taŋ galoc gôjam gômoa naŋ, nêm akweŋ eŋ atom. Tec kôsôm jagêdêŋ.”

¹⁹Ma awê kêsôm gêdêŋ eŋ gebe “Apômtau, aê galic aôm propete teŋ.

²⁰Aêac tameŋi teteŋ mec aŋga lôc tônê, ma amac tec asôm gebe ateŋ mec ŋamala gêc Jerusalem.”

²¹Go Jesu kêsôm gebe “Awê, ôkêŋ êwiŋ aê gebe noc teŋ oc mêŋêsa, naŋ ateŋ mec êndêŋ Tamoc aŋga lôc tônê to Jerusalem atom.

²²Amac tonaŋ ateŋ mec gêdêŋ ŋac, taŋ ajala eŋ sapu naŋ, ma aêac tec ateŋ gêdêŋ ŋac, taŋ ajala eŋ naŋ, gebe Anôtô ênam ŋamalac kêsi ŋamoasiŋ êsa aŋga Judanêŋ.

²³Mago noc oc mêŋêsa, ma noc tau kêdabiŋ su, ma êsêac, taŋ teteŋ mec ŋanô naŋ, oc teteŋ êndêŋ Tamoc toŋalau ma tobiŋŋanôgeŋ. Tamoc tec gesom lau, naŋ teteŋ mec amboac tonaŋ êndêŋ eŋ.