Jeremaia 24

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

¹Te Babilon king Nebukatnesargo te Jerusalem aiyaba elalubo si da, teda agai te Juda dabe Babilonba odasa palio. Agai te king Jehoiakimgo ogwa sali, aga te king Jehoiakin, aga gasa nogi me Jekonia. Tama agai te Juda genuai bidi dabe me, te tobage wiegi yai nai nigibo koneai bidi dabe me, sela pali. Tialima, te tudi badu nosali, Genuai Bidigo ena Jeremaiabolo ola mawai, te nade nai me deli ola mabo tiwai yali, tama te nade eno te basket wa side te ni kaya fik wai du dabe elalubo suali. Te basket wa si te Genuai Bidigo be sunumi pąde elalualio.

²Me basketde te ni kaya fik du wai wiegi yai mu elaluali, te ni fik du te gide polasa inawai elalubo tiwai yali. Te gasa basket wa mede te ni kaya fik du wai te dwai mu elaluali, te bidigo tuabo ąǫ isąwai dao.

³Tama Genuai Bidigo enabolo te tiwai po wali, “Jeremaia, nago magi nai sualiwe?” Tama eno te tiwai po wei ponani, “Eno te ni kaya fik du wai sualio. Te wiegi yai fik du te wiegi yai mu elalubao, te kaya fik du dolali te mu dwalio, te bidigo tuabo usu egobeo,” wali.

⁴Tialima, Genuai Bidigo po e dali enabolo manio. Te po e tiwai,

⁵“Ena Genuai Bidi, ena duga Israelgo God, eno po obao, eno te Juda meba sela sąnama, augwali te Babilon tǫ kantriba pali, tialima, eno homugo augwali te wiegi yai ni kayago du tiwai dao.

⁶Te eno augwali bugagia tonalu, te augwaliba wiegi yai sę yaibao. Tama augwali eno te e tǫba ma odasa asaibao. Te eno augwali dąų walama, te eno augwali aiyaba me elalugobeo. Te eno augwali bulama, te eno augwali me digągobeo.

⁷Te eno augwaliba homu kolesaga mobaso, augwa te tiwai koneaibao, ena digi ena Genuai Bidi bidibao. Te augwali enaba ma asiyu, te enaba homu kęą peyu bidaibao. Te augwali eno hani we bidi mu pedalaibao, te ena augwa God bidaibao,” wali.

⁸“Te ena Genuai Bidi, te eno Juda king Sedekaia dali, te aga ofisa dabeba me dwai sę eyu, te Jerusalem augwa page bulude bidalubo we bidi dabeba me, ma te Isipba pali hani bidiba dwai sę yaibao. Te hani dabeba eno dwai sę ilaibao, te bidigo ni kaya fikbolo dwai sę ilama, te bidigo tusąbo dwai mu ilali tiwai yaibao.

⁹Te gasa bulu tǫ kantri tigidali we bidigo te sę eno te Juda dabeba yali po odolama, te augwali wi elama, nogo hogwayu, te dwai noma saibao. Tama eno te boi bidi dabe tagala palama, te augwali ela muagasaibao, te augwali nasigo isiyu, me te dwai gasigo augwali dolama isaibao. Tama eno augwali meba te tǫ kantri dabeba tedela palaibao. Te tama tebo kolesagago te eno augwaliba me te augwa wąį nǫų dabeba mani tǫde bidibadi mu silaibao. Tama eno te Juda dabe sela sąbo te tǫ kantri we bidi dabego, te augwali Juda dabeba dolama posobo po waibao. Me te gagali po wabo tiwai yaibao. Tama te we bidi dabego te augwa boi bidiba digi i ola mabo po wabo sogo, te augwa te tiwai po waibao, ‘Dage te Juda dabe dolali tiwai gilama dolomainao,’ te po waibao,” wali.