Jan 21:11-16

¹¹Simon Pita menm antwé an kannòt-la pouʼy hédi lèpèvyé pwéson-an atè. La té ni yon san senkant twa (153) pwéson an tout. Magwé la té ni otan pwéson an lèpèvyé-a, lèpèvyé-a pa déchiwé.

¹²Jézi di yo, “Vini manjé!” Yo pyès an sé disip-la pa té bwav asé pou mandéʼy, “Ki moun ou yé?” paski yo sav sété Senyè-a.

¹³Kon sa Jézi alé, i pwan pen-an, i ba yoʼy, èk i pwan pwéson-an ba yo tou.

¹⁴Sa sété twazyenm fwa Jézi fè sé disip li-a wèʼy apwé i té wésisité.

¹⁵Lè yo fini manjé, Jézi di Simon Pita, “Simon gason Jan, ès ou enmen mwen pasé sé moun sala?” Pita di, “Wi Senyè, ou sav mwen enmenʼw.” Jézi diʼy, “Swen sé ti mouton mwen-an.”

¹⁶Jézi mandéʼy pou dézyenm kou-a, “Simon gason Jan, ès ou enmen mwen?” I di, “Wi Senyè, ou sav mwen enmenʼw.” Jézi diʼy, “Swen sé mouton mwen-an.”