Jadjis 5:9-18

⁹en im filing bin jidan garram ola Isreil bos, en im filing bin jidan garram detlot Isreil pipul hubin wandi fait. Gibit theingks langa YAWEI.

¹⁰Ol yumob haibala pipul hu oldei raidim ola gudwan enimul, en ol yumob lobala pipul hu oldei futwok biyain langa olabat, holot yumob garra irrim en jinggabat wanim ola pipul tok.

¹¹Wen ola pipul go langa wel blanga gajim woda, dei dalimbat miselp stori blanga YAWEI. Dei jinggabat ola gudbala ting weya YAWEI bin oldei dum blanga olabat, en dei jinggabat ola fait weya imbin oldei meigim olabat win.

¹²Ola pipul jingat en dalim mi blanga kipgon sing olawei en nomo nokap, en dei dalimbat Barak det san blanga Abinowam blanga go lida en shoum olabat ola enami weya imbin meigim jidan prisana blanga wi. Ola Isreil solja bin godan brom olabat kemp blanga fait.

¹³Ol detlot Isreil men hubin deya bin godan garram minbala Barak. Ola pipul blanga YAWEI bin majurrumap miselp langa im, en deibin meigim miselp redibala blanga fait langa ola enami blanga olabat.

¹⁴Ola men brom Ifreiyim klen bin go langa det plein kantri blanga fait, en ola men brom Benjamin klen bin go biyain langa olabat, en ola boswan solja brom Manesa klen bin go du, en ola boswan solja brom Sebyulan klen bin deya du,

¹⁵en ola bosmen brom Isaka klen bin go garram Debra, en deibin bulurrum Barak langa det plein kantri. Bat ola pipul brom Rubin klen nomo bin meigimap olabat main, en deibin jidan biyain garram ola enimul blanga olabat.

¹⁶Wotfo deibin kipgon jidanbat garram ola enimul blanga olabat? Deibin jidan garram ola enimul dumaji deibin agamin, en dei nomo bin meigimap olabat main gudwei blanga go.

¹⁷En ola pipul brom Ged klen bin kipgon jidanbat langa olabat kantri du sanraisaid brom det Jodan Riba, En ola pipul brom Den klen nomo bin libum olabat bout. Dei nomo bin gowei brom olabat kantri. En ola pipul brom Esha klen nomo bin gowei brom olabat kantri du deya wansaid langa det solwoda.

¹⁸Bat ola pipul brom Neftali en Sebyulan klen nomo bin jinggabat olabat ronselp, en dei nomo bin bradin blanga dai langa det fait.