ISAIA 1:3-14

³Boromakau maruanena na biaguna dibana, bona doniki na biaguna ese ana e atoa patana dibana; a Israel na asi dibana, egu bese taudia na lalodia asie pararamu.

⁴Kara dika besena o! Kara havara ese e hametaudiamu taudia, kara dika taudia natudia, kara koikoi e karamu memerodia. Idia ese Iehova vada e rakatania, Israel ena Helaḡa Diravana e dadaraia, ena amo vada e raka oho vaitani.

⁵Dahuka dainai mata-hakani doini o vaveamu, bena o daḡedaḡe louloumu? Kwara idoinai e hisihisimu; kudou idoinai e hetahamu.

⁶Ae lalona amo ela bona kwara asi namona ta; a rara aru-kubou bona toto, bona e raramu berodia; rara se hadodoa, bero se kumidia, bona dehoro amo se haḡavedia.

⁷Emui tano vada e vahu, emui hanua na lahi ese e aradia; umui vaira-tuhutuhumui ai idau taudia ese emui tano anidia vada e ha-oredia ia na vada e ḡaḡae, idau taudia ese vada e havahuraia.

⁸Siona natuna hahinena na e nohomu, kalaga vine imeana lalonai na heto, rumaruma kiukamba umana ai na heto, e koua heḡeḡe hanuana na heto.

⁹Iehova Saboata ese kwabukwabuda basinema hamaurida, ita na Sodoma heḡereḡerena ai baitama noho, bona Gomora heḡereḡerena ai baitama hahelao.

¹⁰Sodoma lohiamui e, Iehova ena hereva a kamonai! Gomora taumui e, eda Dirava ena hahediba herevadia a hakala heni!

¹¹Iehova na e tomu: Emui boubou ḡaudia momo egu ai be dahaka? Mamoe mamaruanedia e haḡoledia oho ḡaudia, bona ubu-ubu ḡaudia digaradia, vada na abi davana. Boromakau mamaruanedia eiava mamoe natudia eiava nani mamaru-anedia raradia asina moalelaimu.

¹²Vairagu ai o hedinaraimu negadia ai, daika ese e hamaoromui egu ikou tanodia ba moimoilai?

¹³Herahia ḡaudia asi anidia haida ma basio mailaidia; muramura mai bonana na ḡau dika-rohorohona egu ai. Hua matamatadia bona dina helaḡadia bona hebou boiboidia, kara havara bona hebou helaḡadia, na egu ai seme heḡereḡere.

¹⁴Emui hua matamatadia bona emui aria negadia na lau laumagu ese e inai henidiamu; idia na maduna metauna egu ai, ihuadia ai na hesikumu.