ISAIA 11:4-16

⁴a mai kara maoromaorona ida ia ese ogoḡami taudia baine hahemaoro henidia, bona ia!ona baine hadaia maoro, tanobada ena manau taudia ediai; ia uduna auna amo tanobada baine botaia, bona uduna bibinadia hodahodana amo kara dika taudia baine aladia mase.

⁵Kara maoromaoro na ia gabana ḡauna ai bainela, bona kara momokani na ia koekoena igegelaina ḡauna ai bainela.

⁶Uda sisiana na mamoe natuna ida bae noho, bona taiga na nani natuna ida bae hekure; boromakau natuna bona leona bona ubu-ubu ḡauna na bae noho hebou, bona mero maraḡina ta ese baine hakaudia.

⁷Boromakau hahinena bona bea bae aniani hebou, bona natudia bae hekure hebou; bona leona ese rei kakoro baine ania, boromakau maruanena na heto.

⁸Rata e inumu merona na gaigai ena guri latanai baine gadara, bona rata vada e dadaraia merona ese imana na duba ena guri lalonai baine toia vareai.

⁹Basie hahehisi bona basie hahebua tari, egu ororo helaḡana idoinai ai; badina be tanobada na Iehova idiba-maorona ai baine honu, davara ena honuhonu-dae na heto.

¹⁰Una dina ai Iese ramuna baine gini, taunimanima loḡora edia pepe; bese idau-idau ese ia bae tahua, bona ena noho gabudia bae herea dae.

¹¹Una dina ai Ḡaubada ese nega iharuana imana baine toia roro, ena bese kwabukwabudia iabi-loudia totona: Asuria amo, Aigupto amo, Pataro amo, Etiopia amo, Elam amo, Sinara amo, Hamat amo, bona kone ahadia amo.

¹²Ia ese pepe ta baine duduia isi, bese idau-idau edia, bona Israel ena henege-daure taudia baine haboudia, bona Iuda ena karoho taudia baine gogodia tanobada daigunidia haniosi amo.

¹³Efraim ena vagege baine heabi oho, bona Iuda ihahisina taudia bae henege daure; Efraim ese Iuda basine vagege henia, bona Iuda ese Efraim basine hahisia.

¹⁴A Filistia taudia edia ororo gabaedia na bae hedai henidia lahara kahana ai; bona hebou tamona ai baela, laurabada kahana taudia edia kohu bae dadi. Imadia bae toi roro, Edom bona Moab ihadikadia totona; bona Amono taudia ese bae kamonai henidia.

¹⁵Bena Iehova ese Aigupto davara dogurana baine habuaia tari vaitani, bona Sinavai Badana daenai imana baine davea, mai ena lai siahuna ida; bena baine botaia parara, rege hitu ai baine aru, bona taunimanima na bae raka hanai diba, aedia basie paripari.

¹⁶Bena laolao dalana ta baine helailai Asuria amo, ena bese kwabukwabudia edia; Israel ena heḡereḡerena, Aigupto tanona amo e raka lasi negana ai.