Ioanej 8:2-25

²A nin joran a kotin pure don on nan im en kaudok. Aramaj karoj ap pokon don i. I ari kaipokedi kaukawewe on irail.

³A jaunkawewe o Parijär akan wa don i li amen, me diarokadar ni a kamal. Irail kidan i nan pun arail.

⁴Ap indan i: Jaunpadak, li men et diarokadar ni a kamal.

⁵A Mojej majani on kitail nan kapun o, jen kate jon en. A komui, da me komui majani?

⁶A mepukat re indan i, pwen kajonejon i, pwe ren kak impimpaiki i meakot. A Iejuj kotin idiokidi, intiniekidi on nani pwel jondin lim a.

⁷A ni ar poden kalekalelapok re a, a ap kotin denida majani on irail: Ari, me jota dip a nan pun omail, a pan tapiada kate i.

⁸A pil kotin idiokidi intiniedi on nan pwel.

⁹Irail lao ronadar met, rap mulikidar tentelwei, me laud maj lel me tikitik o. A Iejuj kelepela, li eta, me mi re a.

¹⁰Iejuj lao kotin denida o jota majani meamen, li eta, ap majani on i: Ia me karaun uk edi kan? Jota me kadeik uk ada?

¹¹A potoan on: Jota Main. Iejuj ap kotin majani on i: I jota pil pan kadeik uk ada. Kowei, koe der pil wiada dip!

¹²Iejuj ap pil kotin padaki on irail majani: Nai marain en jappa. A me kin idauen ia, jota pan weid ni rotorot, pwe marain en maur pan mi re a.

¹³Parijär oko ap indai on i: Komui kadede pein komui; ari, omui kadede jota melel.

¹⁴Iejuj kotin japen majani on irail: Ma I kadede pein nai, ari melel ai kadede, pwe I aja, waja I kodo jan ia o waja I koko on ia, a komail jaja, waja I ko jan ia o waja I koko on ia.

¹⁵Komail kin kadeikada duen pali uduk, a jota meamen, me I kin kadeikada.

¹⁶Ari jo ma I kadeikada, ai kadeik pan melel, pwe I jota kin kelep, pwe nai o Jam, me kadar ia dor.

¹⁷A pil intinidier nan omail kapun, me kadede en aramaj riamen me melel.

¹⁸Nai me kin kadede pein nai o Jam, me kadar ia dor, kin kadede ia.

¹⁹Irail ap indai on i: Ia Jam omui? Iejuj kotin japen: Komail jota aja nai, pil jota Jam ai. Ma komail aja ia, komail pil pan aja Jam ai.

²⁰Majan pukat Iejuj kotikida nan pera en moni, ni a kotin kaukawewedar nan im en kaudok o. A jota me koledi i, pwe a anjau jaikenta leler.

²¹Iejuj pil kotin majani on irail: I kokola, a komail pan rapakin ia o mela ni omail dip akan, a waja, me I pan kola ia, komail jota pan kak on.

²²Juj oko ap indada: A pan kamela pein i, pweki a inda: A waja, me I pan kola ia, komail jota pan kak on?

²³A kotin majani on irail: Komail kijan men pa, a nai kijan men poa. Komail kijan jappa et, a nai kaidin kijan jappa et.

²⁴Iei me I indaki on komail, komail pan mela ni omail dip akan, pwe ma komail jota kamelele ia, komail pan mela ni omail dip akan.

²⁵Irail ap indai on i: Ij koe? Iejuj kotin majani on irail: Me I indawei maj o, i eta.