Ioane 19:1-32

¹Arinai ede Pilato Iesu i laei, i lubilubini.

²Iala tataodi oeagi nurinuridi se haturidi, korona se ginauri se heousaei ia uruna eai; lulu buiabuia se abi hinage ia se helui.

³Si ene, “Iei, Iudea edi Wasawasa e!” nimadi eai se lubilubini.

⁴Pilato abo i lulageuio, i heribadi, i ene, “Ia ea woeaiyawa; arinai abo au ita nige giruna esau ea lobai.”

⁵Iesu abo i taumasaraha, korona nurinurina wa ie ou, eo lulu buiabuiana ie lui. Pilato i ribalau isi aridi eai i ene, “Tau ta, au ita!”

⁶Kohena lailaidi eo polisimani ia se ita abo se eogayoga, si ene, “U hesatauro mo, U hesatauro mo!” Pilato i heribadi i ene, “Omi ia au laei, au hesatauroyawa; nige ena baaea esau ea lobai.”

⁷Iudea tataodi ia se heuio si ene, “Laugagaeo esau ai abi, ema laugagaeo eai taba mo i mate, paana ede i ene ia Eaubada Natuna.”

⁸Teina riba ta Pilato i ataiei, abo i matausi ariri.

⁹Abo i awaseuio hedudurai numana alona eai, i ribalau Iesu arinai, i ene, “Haedi eai u laoma?” Na Iesu nige arinana.

¹⁰Pilato ia i heriba, i ene, “Nige u ribalaoma arigu eai wa? Nige u nuatui egu gigibori eai taba ea hesataurom, e taba ea eairigabaem?”

¹¹Iesu ia i heuio i ene, “Taba nige em gigibori esau arigu eai, ewa eai mo se leawa: arinai ia i woeaigu arim eai wa ena baaea mo ie lai ariri.”

¹²Arinai abo Pilato ena eairigabaena paana i eoodadaasaeai: Iudea tataodi se eogayoga si ene, “Taba tau ta u eairigabaei, oa nige Kaisara ehana: esa, esa i ene ia wasawasa, Kaisara i ribahebaaea.”

¹³Riba wa Pilato i ataiei, Iesu abo i woeahemasaraha, aba hedudurai aba babawana eai ie bawa, dimo wa esana ede We’u‐matuna, Heberu arinadi si ene, Gabata.

¹⁴Pasova se abinonohai doha mahana hehaligigi‐esegana eai: Pilato Iudea tataodi i heribadi, i ene, “Emi Wasawasa au ita!”

¹⁵Isi se eogayoga si ene, “Ia u laei, u laei, u hesatauro!” Pilato i heribadi i ene, “Emi Wasawasa abo ea hesatauro wa?” Kohena lailaidi se heuio, si ene, “Ai nige ema wasawasa esau, Kaisara iabom mo.”

¹⁶Arinai Iesu i mosei isi nimadi eai, ia bena se hesatauro. Iesu se laei se woeahesuara.

¹⁷Ia satauro i bahei i lau dimo esau eai se lage esana ede Moiaru, Heberu arinadi si ene, Golagota:

¹⁸nei eai ia se hesatauro, tatao labui hinage maenayao, esa hari tupo, esa hari tupo, Iesu duaduaridi eai.

¹⁹Pilato riba heiheinoi esau ie uri, se torehepatusaei satauro ewana eai. Uriuri wa si ene, “IESU NASARETA, IUDEA EDI WASAWASA.”

²⁰Iudea tataodi gamagaridi uriuri wa se hasihasiri: paana ede Iesu edi aba hesataurona eanua i hanahanaui. Heberu, eo Heleni, eo Roma arinadi wau uriuri wa arinai se uri.

²¹Iudea edi kohena lailaidi se ribalau Pilato arinai si ene, “Tabu u uri u ene, ‘Iudea edi Wasawasa;’ u ene, ‘Ia i ene, Eau Iudea edi Wasawasa.’”

²²Pilato i heuioidi i ene, “Uriuri ea uri wa, besi ea uriyao.”

²³Iala tataodi Iesu se hesatauro nonohai, ana lulu se abidi, se peihasini, tau iala esau pei esau i abi, tau iala esau pei esau; ena pereue hinage doha: pereue wa nige se boditubei, se ginauri esegai.

²⁴Arinai edi ribariba si ene, “Tabu ta purisi, kelero ta ginauri, abo eai enana.” Arinai uriuri tabuna se hemamohoiei, si ene, “Agu lulu se soiei, agu pereue hinage arinai se hekelero.” Teina laulaudi ta hinage iala tataodi se abidi.

²⁵Iesu ena satauro hasarina eai ia sinana i totoro, eo sinana ena doga hinage, Maria Kelopa monena, maena Maria Magadala.

²⁶Iesu sinana ie ita eo ena gadosisi heaheatana i totoro hasarina eai, i ribalau sinana arinai, i ene, “Sine e, natum tau u ita!”

²⁷Ia abo heaheata wa i heriba i ene, “Sinam u ita!” Nei huiana eai ne heaheata wa ia i woeai ena numa eai.

²⁸Ina ta murina eai Iesu i nuatuiyao ginauri gamagaridi se ginauriheohidio, eo hinage uriuri tabuna bena arinai se hemamohoiei, i ene, “Gadogu ie magu.”

²⁹Gaeba esau se tore vinega i monau: isi baro eai vinega se heboriri, hisopa eai se paihepatu, se helelesaei awana eai.

³⁰Iesu vinega wa i abi, abo i ene, “I lautom’o:” ia abo uruna i tapoi, earuana abo i mosesaei.

³¹Abinonoha asubenana eai arinai Iudea tataodi si ene, tabu sinare si ota satauro eai asubena Sabati eai, (paana nei asubena Sabati ne asubena saesae aririna), arinai se oimuri Pilato arinai, aedi siadadi bena si eatugodudi, bena abo se lae hesuaradi.

³²Iala tataodi abo se laoma esau aena se eatugodudi, esau hinage doha, isi maedi Iesu se hesatauroesegaidi wa.