Juan 19:1-32

¹Zee lee Pilat mzen Jesús, nu mnabeyy zee zaa xaaya yenn xaa kwaan bins.

²Lee re soldad mdexkwaa tub koron kwaan yag yich nu mzob xaaya yek Jesús, nu msegak xaa xaa tub ler naxne, kwenta kwaan nzhak rey.

³Zee mbii re xaa lo xaa nu nzhé xaa: —¡Xwa doo Rey cheen re xaa Israel! Nu mgazya re xaa ta garlo xaa.

⁴Pilat mbare mroo stub welt nu nzhé lo re xaa: —Wii re gu, mlo na xaa, zee ne re gu nik tub kwaan nawent namlet xaa.

⁵Zee mroo Jesús nzob koron yich yek xaa nu nak xaa ler naxne. Lee Pilat nzhé: —¡Wii gu, lee xaa nzo nee!

⁶Gorna ngune re ngwleyy non nu re soldad, xaa nkanap yidoo lo xaa, mzelo re xaa nzhé: —¡Bkee xaa lo krus! ¡Bkee xaa lo krus! Zee nzhé Pilat lo re xaa: —Be gu xaa nu bkee gu xaa lo krus, per lee na nangaazht nik tub kwaan tich xaa.

⁷Lee re sawlazh na mkeb nzhé: —Lee re nu nkano tub ley, nu mod nzhé ley cheen nu nzhaal yet xaa, nel né xaa lee xaa nak Xgann Dios.

⁸Gorna mbin Pilat kwaane mas mzheb xaa.

⁹Zee mrep xaa leen palas stub welt nu mnabdizh xaa lo Jesús: —¿Pa naz nze lu? Per Jesús namkebt nik tub kwaan lo xaa.

¹⁰Pilat nzhé: —¿Chozhiin nankebt lu lo na? ¿Che nanet lu nkano na yalnabeyy kee na lu lo krus, nu nkano na yalnabeyy sela na lu?

¹¹Zee lee Jesús mkeb nzhé: —Nyent mod nabeyy lu lo na, chelee Dios namzaat yalnabeyy lo lu; per lee xaa kwaan mzaa na lo lu, mas nkano kulp ke lu.

¹²Nu gorzee lee Pilat mzelo mkwaan mod sela Jesús; per lee re sawlazh na nzhé: —¡Chelee lu sela lu xaa ne, nanakt lu xmig César, xaa nabeyy dub pa nabeyy Roma! ¡Loka xaa mbezh nak rey, nak xaa xkontrad xaa nabeyy dub pa nabeyy Roma!

¹³Gorna mbin Pilat kwaane, mnabeyy xaa zee koo xaa Jesús, nu mzob xaa pa nzob xaa nabeyy naab xaa kwent, pa kwaan le diizh hebreo Gabata, kwaan nak Lach Ke.

¹⁴Kwaane ngok rolta mbizh, mbizh gorna nzelo xaa ndexkwaa xaa cheen yalni le Paskwa. Pilat nzhé lo re xaa: —¡Lee xrey gu baa!

¹⁵Per lee re xaa nzhé: —¡Yet xaa! ¡Yet xaa! ¡Bkee xaa lo krus! Lee Pilat mnabdizh lo re xaa: —¿Che nzhekla gu kee na xrey gu lo krus? Nu lee ngwleyy non doo mkeb nzhé: —¡Nankanot nu stub rey, nebse César, xaa nabeyy dub pa nabeyy Roma!

¹⁶Zee lee Pilat mzaa Jesús lo re xaa, zee mkee xaa xaa lo krus, zee lee re xaa mbe xaa.

¹⁷Mbe re xaa Jesús nya xaa naz tub pa le Zhit Yek Xaa (kwaan wdizh hebreo nak Gólgota). Nu mbe Jesús xkrus Jesús.

¹⁸Baa mkee xaa xaa lo krus kwaan xchop xaa, nu mkee xaa tubga xaa rop lad lo Jesús.

¹⁹Pilat mnabeyy zee kee xaa tub kwaan yek krus, kwaan nzhé: “JESÚS XAA NAZARET, REY CHEEN RE XAA ISRAEL”.

²⁰Zyen doo xaa lazh na mlab kwaane, nel lee pa nkee Jesús lo krus nak gax Jerusalén, nu lee kwaane nkee kwaan wdizh hebreo, latín, nu gryeg.

²¹Kwaanzee lee re xaa nu re ngwleyy non nzhé lo Pilat: —Nakeet lu: “Rey cheen re xaa Israel”, kee kwaan yé: “Xaa mbezh nak xaa Rey cheen re xaa Israel”.

²²Per lee Pilat mkeb lo re xaa nzhé: —Lee kwaan mkee na, sbaa lakeya.

²³Gorna ngulo mkee re soldad Jesús lo krus, mzen xaa xab xaa, nu mle xaaya tap lee nu tubga leeya mka tubga soldad. Noka mzen xaa stub naz xab xaa, nu nel naka tubka lee ler chul doo,

²⁴zee nzhé re soldad lo wechxinn xaa: —Nachazt beya, mas wen kee be swert zee nen cho yizoya. Nu snee mbarlo kwaan nzhé Xkyech Dios: “Mdiiz xaa re xab na nu mkee xaa swert nen cho yizo xab na”. Sal. 22:18 Nu sbaa mle re soldad.

²⁵Nu gax lo krus nzo xnaa Jesús, nu bal xnaa xaa, nu Mari sa Cleofas nu Mari me yezh Magdala.

²⁶Gor ne ngune Jesús lo xnaa xaa nu lee na nzo gax lo me, xaa nkedoola xaa, zee nzhé xaa lo xnaa xaa: —Lee xgann lu nzo lo lu.

²⁷Zee né xaa lo na: —Lee xnaa lu nzo lo lu. Nu leeka zee, lee na mkayaa me li na mod xnaa na.

²⁸Gorna ngulo mded kwaane, Jesús ne ngulola ngok re kwaan mzaa Xkyech Dios kwent cheen xaa, re wdizh kwaan mkee re xaa mzaa kwent kwaan nzhé Dios lo lee xaa yilo. Nu zee gak re kwaan nzhé Xkyech Dios, snee nzhé Jesús: —Nzhek lextoo na.

²⁹Baa nzo tub re xis ub kwaan ni. Nu mle bsii xaa tub lee xiil nu mzob xaaya yek tub lee yag kwaan le hisopo nu mkee xaaya roo Jesús.

³⁰Jesús ngu xis ub kwaan ni ba nu nzhé xaa: —¡Rese kwaan ngulola ngok! Zee mkichyek xaa nu mlaa xaa yet xaa.

³¹Re kwaane ngok mbizh kwaan mzelo nu ndexkwaa nu kwaan gaw nu yalni cheen Paskwa, nu lee re xaa lazh na nanzheklat keeka kwerp lo krus mbizh kwaan nzholl re nu lo Dios, nel mbizh ne nak tub mbizh non doo lo re nu. Zee ngunaab xaa lo Pilat, zee kich xaa nii re xaa nkee lo krus, nu zee la xaa re kwerp cheen xaa lo krus.

³²Zee lee re soldad ngwa nu mdich nii rop xaa nkee xkwes Jesús.