يَيَ 19:1-32

¹نَ تّمُي ثِلَتِ نَشَ يَامَرِ قِ عَ سْورِيٍ شَ عِسَ بُلَن سّبّرّ رَ.

²سْورِيٍ نَشَ مَنفّ كَتَنيِ مَنِيّ يَءِلَن تُنبٍيٍ رَ، عٍ عَ سَ عَ شُن مَ، عٍ قَ مَنفّ دٌنمَ فبٍيلِ رَفٌرٌ عَ مَ.

³عٍ نُ عٍ مَسٌمَ عَ رَ، عٍ نُ عَ قَلَ، «عِ كّنَ، يُوِقِيٍ شَ مَنفّ،» عٍ نُ قَ عَ مَدِن.

⁴ثِلَتِ مَن نَشَ مِنِ تَندٍ، عَ عَ قَلَ يُوِقِ حَمَ بّ، «ﭑ بَرَ يِ شّمّ مَسٍن وٌ بّ، عَلَكٌ وٌ شَ عَ كٌلٌن عَ ﭑ مُ قٍقٍ تٌشِ عَ مَ عَ حَشَنكَتَمَ نَشَن مَ.»

⁵نَ كُي، سْورِيٍ نَشَ عِسَ رَ مِنِ تَندٍ، نَ تُنبٍ مَنفّ كَتَنيِ سَشِ عَ شُن مَ، بُرُ مُسِ فبٍيلِ رَفٌرٌشِ عَ مَ. ثِلَتِ نَشَ عَ قَلَ عٍ بّ، «عَ تَن نَن يِ كِ!»

⁶سّرّشّدُبّ كُنتِفِيٍ نُن هْرْ مْبَنشِ كْسِبِلِيٍ تٌ عَ تٌ، عٍ نَشَ سْنشْ، «عَ قَشَ! عَ بَنبَن وُرِ مَفَلَنبُشِ مَ!» ثِلَتِ نَشَ عَ قَلَ عٍ بّ، «وٌ عَ تٌنفٌ، وٌ تَن نَن شَ سَ عَ بَنبَن وُرِ مَفَلَنبُشِ مَ، بَرِ مَ ﭑ تَن مُ قٍقٍ تٌشِ عَ لَن عَ شَ قَشَ نَشَن مَ.»

⁷يُوِقِيٍ نَشَ عَ يَابِ، «سّرِيّ نَ مُشُ قَن يِ. نَ سّرِيّ كِ مَ، عَ لَن عَ شَ قَشَ، بَرِ مَ عَ بَرَ عَ يّتّ قِندِ عَلَ شَ دِ رَ.»

⁸ثِلَتِ تٌ نَ مّ، عَ نَشَ فَاشُ كِ قَنيِ رَ.

⁹عَ مَن نَشَ سٌ عَ شْنيِ، عَ عِسَ مَشْرِن، «عِ تَن، عِ كٍلِشِ مِندٍن؟» كْنْ عِسَ مُ يَابِ يٌ قِ.

¹⁰ثِلَتِ نَشَ قَ عَ قَلَ عَ بّ، «عِ تٌندِشِ ﭑ تَن نَن يَابِدٍ؟ عِ مُ عَ كٌلٌن عَ نْي نَشَن نَ ﭑ تَن بّ، ﭑ نْمَ عِ رَبٌلٌدٍ، ﭑ مَن نْمَ عِ قَشَدٍ وُرِ مَفَلَنبُشِ مَ؟»

¹¹عِسَ نَشَ عَ يَابِ، «نْي يٌ مُ عِ بّ ﭑ تَن شُن مَ قٌ عَلَ نَشَن قِشِ عِ مَ. نَ نَن عَ رَ، نَشَن ﭑ سَشِ عِ بّلّشّ، نَ نَن شَ يُنُبِ فبٌ.»

¹²ثِلَتِ تٌ نَ مّ، عَ نَشَ سٌ كَتَقٍ عَ شَ عِسَ رَبّحِن، كْنْ يُوِقِيٍ نَشَ سْنشْ، «شَ عِ يِ شّمّ بّحِن، عِ بَرَ فٍرٍ فِرِ رْ مَ مَنفّ شُنفبٍ مَ. نَشَن يٌ عَ يّتّ قِندِ مَنفّ رَ، عَ بَرَ تِ رْ مَ مَنفّ شُنفبٍ كَنكٍ.»

¹³نَ كُي، ثِلَتِ تٌ عٍ شُي مّ، عَ نَشَ عِسَ رَ مِنِ تَندٍ. ثِلَتِ نَشَ دْشْ بُنتُنيِ رَ، كِيتِسَ كِبَنيِ كُي، دّننَشّ شِلِ قَلَمَ عٍبُرُ شُي «فَبَتَ».

¹⁴نَ لْشْي يُوِقِيٍ نُ نَ قٍيٍ يَءِلَنقٍ سَيَمَلٍكّ دَنفِ سَلِ شَ قٍ رَ. يَنيِ تَفِ ثِلَتِ نَشَ عَ قَلَ يُوِقِيٍ بّ، «وٌ شَ مَنفّ نَن يَ!»

¹⁵عٍ مَن نَشَ سْنشْ، «عَ قَشَ! عَ قَشَ! عَ بَنبَن وُرِ مَفَلَنبُشِ مَ!» ثِلَتِ نَشَ عَ قَلَ، «ﭑ شَ وٌ شَ مَنفّ قَشَ وُرِ مَفَلَنبُشِ مَ؟» سّرّشّدُبّ كُنتِفِيٍ نَشَ عَ يَابِ، «مَنفّ يٌ مُ نَ مُشُ تَن بّ بَقٍ رْ مَ مَنفّ شُنفبٍ رَ!»

¹⁶نَ تّمُي عَ نَشَ عِسَ سَ عٍ سَفٌي، عَ يَامَرِ قِ عِسَ شَ بَنبَن وُرِ مَفَلَنبُشِ مَ. سْورِيٍ تٌ عِسَ سُشُ،

¹⁷عٍ نَشَ عَ رَ مِنِ تَا كُي سِفَقٍ رَ «شُن كٌنكٌتَ يِرٍ،» نَشَن شِلِ قَلَمَ عٍبُرُ شُي «فٌلٌفٌتَ.» عِسَ نَشَ سِفَ نَا، عَ وُرِ مَفَلَنبُشِ رَتٍشِ عَ مَ.

¹⁸عٍ عِسَ بَنبَن وُرِ مَفَلَنبُشِ مَ مّننِ نّ. عٍ نَشَ مِشِ قِرِن فبّتّ قَن بَنبَن، عٍ كٍرٍن تِ يِرٍقَنيِ مَ، عٍ بٌورٍ تِ كْولَ مَ، عٍ عِسَ تِ عٍ تَفِ.

¹⁹ثِلَتِ نَشَ يَامَرِ قِ عَ يِ سّبّلِ شَ فبَكُ عِسَ شُن مَ وُرِ مَفَلَنبُشِ مَ، «عِسَ نَسَرّتِكَ، يُوِقِيٍ شَ مَنفّ».

²⁰يُوِقِ فبٍفبٍ نَشَ نَ سّبّلِ شَرَن، بَرِ مَ عِسَ نُ بَنبَنشِ دّننَشّ، نَ مَكْرّ تَا رَ. نَ سّبّلِ قَن نُ سّبّشِ عٍبُرُ شُي، لَتّنِ شُي، عَ نُن فِرّكِ شُي.

²¹نَ كُي، سّرّشّدُبّ كُنتِفِيٍ نَشَ عَ قَلَ ثِلَتِ بّ، «عِ نَشَ عَ سّبّ ‹يُوِقِيٍ شَ مَنفّ›. عِ شَ عَ سّبّ نّ، ‹يِ شّمّ عَ قَلَ نّ، عَ يُوِقِيٍ شَ مَنفّ نَن عَ رَ.›»

²²ثِلَتِ نَشَ عٍ يَابِ، «ﭑ نَشَن سّبّشِ، ﭑ بَرَ فّ نَ سّبّدٍ.»

²³سْورِيٍ تٌ فّ عِسَ بَنبَندٍ، عٍ نَشَ عَ شَ دُفِيٍ تٌنفٌ، عٍ عٍ عِتَشُن نَ سْورِ نَانِ مَ. عٍ نَشَ عَ شَ دٌنمَ قَرِ عِفٌرٌي قَن تٌنفٌ. نَ دٌنمَ تٌ مُ نُ دّفّشِ،

²⁴عٍ نَشَ عَ قَلَ عٍ بٌرٍ بّ، «وٌن نَشَ عَ عِبْو. وٌن شَ عَ تٌنفٌمَ سُفَندِ بٍرٍ ندٍ رَ.» نَ بِرِن نَبَ نّ، عَلَكٌ نَشَن سّبّشِ كِتَابُي كُي، نَ شَ رَكَمَلِ؛ «عٍ بَرَ ﭑ مَ دُفِيٍ عِتَشُن عٍ بٌرٍ مَ، عٍ ﭑ مَ دٌنمَ تٌنفٌمَ سُفَندِ بٍرٍ رَ.» سْورِيٍ عَ رَبَ نَ كِ نّ.

²⁵عِسَ نفَ قَن نُ نَ عَ شَ وُرِ مَفَلَنبُشِ قّ مَ، عَ نُن عَ نفَ شُنيَ. كٌلٌثَ شَ فِنّ مَرِيَمَ، نُن مَرِيَمَ مَفِدَلَكَ قَن نُ نَ مّننِ.

²⁶عِسَ تٌ عَ نفَ تٌ عَ قْشِرَبِرّ مَشَنُشِ قّ مَ، عَ نَشَ عَ قَلَ عَ نفَ بّ، «ﭑ نفَ، يِ بَرَ قِندِ عِ شَ دِ رَ.»

²⁷عَ نَشَ قَ عَ قَلَ عَ قْشِرَبِرّ قَن بّ، «عَ مَتٌ، عِ نفَ نَن يَ.» كٍلِ نَ وَشَتِ مَ، نَ قْشِرَبِرّ نَشَ عِسَ نفَ شَنِن عَ شْنيِ.

²⁸نَ شَنبِ، عِسَ تٌ نُ عَ كٌلٌن عَ قٍ بِرِن بَرَ كَمَلِ، عَ نَشَ عَ قَلَ، «يٍ شْلِ نَ ﭑ مَ.» عَ نَ قَلَ نّ عَلَكٌ كِتَابُي شَ مَسٍنيِ شَ كَمَلِ.

²⁹سٍ سَسٍ ندٍ نُ نَ مّننِ، نَشَن نُ رَقٍشِ وّنِ مُلُشُنشِ رَ. عٍ نَشَ سٍ ندٍ رَ سِن نَ وّنِ عِ، عٍ عَ شِرِ هِسٌثِ وُرِ كُيٍ رَ، عٍ عَ مَسٌ عِسَ دّ رَ.

³⁰عَ تٌ ندٍ مِن، عَ نَشَ عَ قَلَ، «عَ بِرِن بَرَ كَمَلِ!» عَ نَشَ عَ شُن سِن، عَ قَ لَاشِرَ.

³¹نَ لْشْي يُوِقِيٍ نُ سٍيٍ رَقَلَمَ سَيَمَلٍكّ دَنفِ سَلِ شَ قٍ رَ. عٍ مُ تِن قُرٍيٍ شَ لُ وُرِ مَفَلَنبُشِ مَ نَ مَلَبُ لْشْي، بَرِ مَ سَلِ شُنفبٍ نَن نُ عَ رَ. نَ كُي، عٍ نَشَ ثِلَتِ مَيَندِ عَ شَ نَ مِشِ بَنبَنشِيٍ سَنيِيٍ فِرَ، عَلَكٌ عٍ شَ قَشَ مَقُرٍن، عٍ شَ بَ نَ.

³²سْورِيٍ نَشَ قَ، عٍ قَ نَ مِشِ قِرِنيِ سَنيِيٍ فِرَ، نَشٍيٍ نُ بَنبَنشِ عِسَ يِرٍقَنيِ مَ، عَ نُن عَ كْولَ مَ.