Iliga꞉felo꞉ 19:3-14

³A꞉la꞉sa꞉labikiyo꞉, Fol eyo꞉ a꞉la꞉dabuba꞉ba꞉, “Gio꞉ ho꞉n amio꞉ wangabi to꞉lolo꞉wo꞉?” Iliyo꞉ a꞉ma꞉la꞉bo꞉ a꞉la꞉sio꞉, “Nio꞉ Yona꞉lo꞉ to꞉lolan man a꞉no꞉ ko꞉lo꞉ di.”

⁴A꞉la꞉sa꞉labi, Fol eyo꞉ imo꞉wo꞉ a꞉la꞉sio꞉, “Yona꞉lo꞉ to꞉lolo꞉ a꞉no꞉ kaluka꞉isaleyo꞉ asugo꞉ nodola꞉sa꞉ga꞉, Godeyo꞉ ko꞉lo꞉ kudu hamana꞉ki, a꞉na tolo꞉lo꞉. A꞉la꞉ta꞉ga꞉ Yon eyo꞉ kalu ni fa꞉s amilo꞉ mia꞉nigab a꞉no꞉ ko꞉lo꞉ tilida꞉da꞉bi a꞉la꞉liki wido꞉ ko꞉lo꞉ kalu elo꞉ sio꞉ a꞉no꞉, Ya꞉su o꞉m.”

⁵To a꞉no꞉ da꞉da꞉ga꞉ dowabiki, iyo꞉ Ya꞉su Kelisowa꞉ wiya iliki, ho꞉na to꞉lolo꞉.

⁶Fol e dagiyo꞉ ili wa꞉la dia꞉tabiki, Mama Nafayo꞉ i amio꞉ a꞉na dowakiyo꞉, iyo꞉ towo꞉ ko꞉li ko꞉lilo꞉ tolaki, Godeya꞉ mano꞉ a꞉na wido꞉.

⁷Kalu a꞉namio꞉, kugula꞉fo꞉ ko꞉lo꞉ sen.

⁸Fol e Yu kaluwa꞉lo꞉ tolo꞉ wida꞉sen aya ha꞉na꞉sa꞉ga꞉yo꞉, Godeya꞉ ene kaluka꞉isale ko꞉lo꞉ bo꞉fo꞉lab man a꞉na widaki, kaluka꞉isaleyo꞉ to elo꞉ a꞉no꞉ tilidabuma꞉kiyo꞉, e ele otalen a꞉namio꞉ halale wida꞉len.

⁹Ko꞉sega kalu nolo꞉ asulo꞉ ililo꞉wo꞉ halaidaki goladowakiyo꞉, iliyo꞉ Alana꞉ man a꞉namio꞉ mogago꞉ towo꞉ kalaba sio꞉. A꞉la꞉gabiki, Fol eyo꞉ i a꞉na ta꞉ta꞉ga꞉yo꞉, tilidabu kaluka꞉isale o꞉lia꞉yo꞉ egele ha꞉na꞉sa꞉ga꞉, ho꞉leno꞉ tambo amio꞉ Tilanus sugul aya siliki, nenela꞉len.

¹⁰Donayo꞉ a꞉la꞉ us a꞉namio꞉, to a꞉no꞉ko꞉ nenela꞉li sen ko꞉lo꞉, Yu kalu o꞉lia꞉ Gilig kalu o꞉lia꞉yo꞉ Asia hen a꞉namilo꞉ sen a꞉no꞉ Alana꞉ to a꞉no꞉ tambo dabu.

¹¹A꞉la꞉ta꞉ga꞉ Godeya꞉yo꞉ Fol eya a꞉la꞉ta꞉ga꞉yo꞉ molo ha꞉na꞉no꞉ ko꞉li ko꞉lilo꞉ dimido꞉.

¹²A꞉la꞉go꞉ko꞉lo꞉, ha꞉fa꞉fdo꞉ halan helebeso꞉g o꞉lia꞉ nanog diakilo꞉ ka꞉lan helebeso꞉g a꞉no꞉lia꞉ Fol amilo꞉ golab a꞉no꞉, dia꞉ha꞉na꞉sa꞉ga꞉, walaf kaluka꞉isalemo꞉wo꞉ dimiab amio꞉, iyo꞉ falele alifelo꞉ a꞉la꞉ta꞉ga꞉ nolo꞉ mama mogago꞉ dowo꞉ a꞉no꞉ sili alifo꞉gane.

¹³Yu kalu nolo꞉ mama mogago꞉wo꞉ o꞉lu ga꞉fela꞉li sia꞉sen ko꞉lo꞉ o꞉g a꞉namio꞉ iyo꞉ Ya꞉su Kelisowa꞉ wiya da꞉fe ba꞉dakiyo꞉, mama mogago꞉ nolo꞉ o꞉luga꞉felaki a꞉la꞉sio꞉, “Fol elo꞉ Ya꞉su wi ko꞉lo꞉ wido꞉ a꞉na ilikiyo꞉, mama mogago꞉ ge hamana” a꞉la꞉sio꞉.

¹⁴Bobalo꞉ so꞉mia꞉sen kalu nowo꞉ wiyo꞉ Sikeba, ene so꞉wa doma꞉la꞉fo꞉ a꞉ma꞉yo꞉ a꞉la꞉dimidabikiyo꞉, mama mogago꞉ nolba꞉yo꞉ imo꞉wo꞉ a꞉la꞉sio꞉, “Ne Ya꞉su asulo꞉. A꞉la꞉ta꞉ga꞉ Fol elo꞉ dimido꞉wo꞉ dabu. Ko꞉sega kalu ge o꞉ba?”