Acts 19:3-14

³Ma Paul i paridadana, “Aiwai babaitona o vaia?” Taui i paribelana, “John ana babataito a vaia.”

⁴Paul i riwa, “John ana babataito lamna mataira da taui ai ḡoʼapoapoelei i mae-tavirei; ma mai Israel i riwei da Tauna au muriu e nenei ona vitumaḡanei lamna Iesu.”

⁵Maranai wei i nonori ma i aramanei taui i babataito Bada Iesu wavanei.

⁶Ma Paul urana au kolai i terei ma Arua vivivireina au orai i rui. Ma i vikarei da pona tapunei i bababani ma God riwana i raugugulei.

⁷Taui nelara iavana twelve.

⁸Paul i nae au boru-numana ma kampa nawaravi tonuḡa au orana ana tepatorana mai Jew awarii i bababani. Da rava orai ita sinavirai da Bada ana vigulau ita vitumaḡanei.

⁹Wate ḡelaui kampa orai i bagibagi ma eḡa ita ḡoei da ita vitumaḡana, ma patara au matai Iesu ana etanai i vijiboḡi. Ma Paul taui i voterei ma kerisiana i taravaini ma i nae Tairanus ana au numa, ma kampa i viararamana ma i giugiu pompom.

¹⁰Ma nanare i mae madeḡa ruaḡa i kwa, da mai Jew ma Jentail ravai maḡamaḡaui au Eisia provins maemaei Bada riwana i nonori.

¹¹Ma God ana rewapanei Paul kaua ḡaeḡaei ma aniba i kaukauei,

¹²lamna avena wate rava ai agesi da ai nola garai i naiei Paul awarina da i vodadani ma i naei da rava doridoriai i vodadani, ma arua apoapoei i opu-tawanei ma i lawana.

¹³Mai Jew ḡelaui dobuna i naeni ma arua apoapoei i viviaḡana-opunei ma i raudadana Iesu wavanei da arua apoapoei i viviaḡaḡei. Taui arua apoapoei i riwei i pa, “Iesu wavanei, taunei Paul e raraugugula, Tau a egarim da ma opu.”

¹⁴Skeva, pirisi ai bada natunatuna nelarai seven wei kauana i kaukauei.