Ihi 50:3-20

³Mpo, ti Variqavano tuvi vaivo. Viva kia evaara tuviraitiro, viva tuvi vaivaro voqama kero tatoqake vai ihava vira avuni otu vi vaivaro, aaronaa noravano vira ututuma tero vairo.

⁴Viva tuviharo naveraitiharo, Naaruvavanovata vatavanovata tave vaiqe te tenta vaiinti nahenti uva avuqavu qiare.

⁵Te tenta ˻Isareri˼ vaiinti nahenti hampata uva tiva taatau taunara kempukaiqama vuarire ti, quara aantau ti iha quara timitaaka, ne ani ruvaaqumavi vaiqe uva tiare, tiro.

⁶Kotiva minti tivaro naaruvavano tiharo, Kotiva naima ko avuqavu ti vaivara tiro, viva avuqavuqama keharo uva avuqavu i vairave, tiro.

⁷Minti tivaro Kotiva tiharo, Ho ti vaiinti nahentivauvo, te uva tiari iriate. Ne Isareri vatanaakao, te Kotika ni Variqavano vaurauka niqaa uva vatarerave.

⁸Ne quara aantau arukeha iha quara timite varia ofaarave, ne ekaara iha quara timite varia ofaarave, te kia vira kaara niqaa uva vataraiti, te vo haika kaara niqaa uva vatarerave.˼

⁹Ne nenta avutaqihai purumakauve memeraave vare qumina ti timivorave.

¹⁰Ne kiae iriavo? Ekaa aantauvahi nantaqi variaka te uraukaqaima variavo. Ekaa vo aiqina vo aiqinaqaa varia purumakauka, te uraukaqaima variavo.

¹¹Aiqina vainaini vai uvirirave, ekaa aantauvahi toveqive, ekaa vi haikara vi haikara te uraukaqaima variavo.

¹²Ti hantuqa haritirio, te kiama ni karara naariraiti, ˻te tentama kara varake nauraitirio˼. Maa vataravata, ekaa viraqaa vai haikaravata, ekaa vi haikava vi haikava te una haikavaqaima vaivo.

¹³Te purumakau qora vira mati naunarae? Te memeraa naare naunarae? Kiavuve.

¹⁴Te nai virini kantaaqaini vaura Variqaukama vauro. ˻Ni avu aato qora avu aatoqai vaira kaara ne quara aantau iha quara timite variara kia ti virara hantuqa harivo.˼ Ne maa haikararaqai irihama ti quahama timitaate: Ne tiriara koqeve tivaqi vuate. Ne kauqu aiqiqaa aqukeha tiriara tivate uvara ˻kia qaqira karaiti,˼ vi uvara avataate.

¹⁵Maaravano niqi qovaraiqiaina entara tiqai haaraate. Ne mintiaqi viqe te ni ruaruama nimitaari ne ti hutu tuaheraqi vivarave, tiro.

¹⁶Viva minti tivakero Kotiva qora kaiqa vare variakara tiharo, ˻Ne qora kaiqa vare variara kaara˼ hauri ne nenta noqihai te tiva tauna uvara tivaqi vivorave. Ne unahaa tiha, Kotiva tinavu hampata vohaa vaiharo uva tiva taatautaira tenavu iriqi vi vaunarave, ti variarave.

¹⁷Te uva maara tiva taunarara kia ni antuqavano vaimanta ne ti uva qoririmake variarave.

¹⁸Ne muara vaiinti taveha, vika tontiqi variarave. Naata vaati varaa okarara raqake variaka, ne vikara quaheha variarave.

¹⁹Ne nenta noqihai qora kaiqa vareraraqai ti variarave. Ni maaqirivano una uvaqai ti vairave.

²⁰Ne nenta qata vakaaqaa una uva oqikeha ti variarave. Ne nenta nora vira maaquara tauvaqa vauraa uvaqai ti variarave.