Salamo 50:3-20

³Eda Eaubada i laolaoma, taba nige i monou, ia matana eai doha oeagi i alabalebalelem, mana lailai didigana ia i lauhetaiiri.

⁴I eogasae galewa ewana eai eo tanoubu eai hinage, bena ena tataoyao abo i heduduraidi.

⁵“Tausunusunumaegu au heoigogoidima, isi aitalasam arinai edi aigora arigu eai se ginauri wa!”

⁶Galewa ia ena laulau dudurai se hemasaraha paana Eaubada iabom tauheduhedudurai ede!

⁷“Egu tataoyao e, au ataatai abo ea ribariba, Isaraela e, emi baaea abo ea ribahemasaraha! Eau Eaubada ede, emi Eaubada.

⁸Emi aitalasam debadi eai taba nige ea hegirumiu; emi aitalasam gabugabudi matagu eai huia gamagamagari.

⁹Bulumakau tamoana emi numa eai taba nige ea nuatui, goti tamoana emi gana eai hinage nige’e.

¹⁰Paana nuura suisuidi gamagaridi eau enaguyao ede, bulumakau hinage oea tupidi tausani potadi eai.

¹¹Galewa manudi gamagaridi hinage abidi ea ata’o, eo ginauri maumauridi gamagamagaridi oea eai isi eau enaguyao ede.

¹²“Ena ea guriam, taba nige ea heribamiu; paana tanoubu maena ginauri gamagaridi eau enaguyao ede.

¹³Bulumakau bulumana eau ea aiaini, e nige’e? Goti osinana hinage ea nomnomi, e nige’e?

¹⁴Lautoi aitalasamna au heaitalasam Eaubada arinai, eo emi aigora au hemamohoiedi Saesae‐Aririna arinai;

¹⁵huia baaea eai abo au eogalaoma eau hinage abo ea lebohaimiu, eo omi abo au hedebasaegu.”

¹⁶Na laulau gewagewa tataodi aridi eai Eaubada i ribalau, i ene: “Ami paisoa saha na egu lauhesom au hasihasiridi, eo egu ribahesunuma au abi sopamiu eai?

¹⁷Paana heduhedudurai au hewaiunuei, eo egu riba au gabaedi dagelamiu eai.

¹⁸Taba tauaiyahari au ita, au awaehalau arinai, tauganaganawari hinage maemiuyao au heboriesegaimiu.

¹⁹“Awam u moselaei riba gewagewa arinai, memenam eai hinage u riba borabora.

²⁰Ue bawa na em tau u ribahebaaea, sinam tahunuana natuna tau u ribahebaaea.