Iba Gana 42:2-10

²Ngode Datagaliwabe í̠ holenehe kegoni. Iba noa biradagua i̱naga minime í̠ kegoria haparaho holeneore hamelo kogoni. I̱na í̠ kego de handalu í̠naga mini yaraga hole angi ibuliyadabe.

³Mbiraga horombebi i̱ dugu biaabo halu tomo nane tomo i̱ninaga de iba no paliruli. Horo bibahendengi wali agali i̱naga waitigi karume i̱hondo, Í̠naga Ngode Datagaliwabe hayuagoni agoha kabe, laabo haga.

⁴Ala bialu haruligo mitangi budai berodagua nde i̱naga gubaliniha tandagaore bialu habe naharagola haruli. Wali agali maru heba wabuni Ngode Datagaliwabenaga andaha pole poramaligobi ti maha ibilo i̱na haru bamba haruligobi nde mitangiore halu ko. Wali agali turuhe damene wabuni buyu pialu iba ganaru lagalaga bialu Ngode Datagaliwabenaga mini yaraga hagahaga bima ibunaga andaha pole poramaligoore mitangi haabo halu ko.

⁵Ai nde áyu i̱ore miniha turu naheore haabo kogoni aginagadabe. I̱naga miniha genda bialu lungulungu biaruagoni agiorenagadabe. Ani biaruagoni bilo i̱na i̱naga Ngode Datagaliwabeni mini hanaho holebero. I̱naga Pele Ngiagabi i̱naga Ngode Datagaliwabebi kagonaga mini i̱na lone mo yaraga holebero.

⁶I̱ i̱ninaga dindini hewaria bo ba tagi haya handala dindi taraha o pu kogoni koria i̱naga gubaliniha tandagaore bialu tumbudu biragola kogoni. Ani biragola i̱naga mitangi mo tiga bialu Ngode Datagaliwabe kagohayagi pelaruli. Ibugua dara bulenego iba yaribu bu yu ibilaradagua i̱naga mini dara buleneme bu dambi haga. Genda tara tara bulenego Hari Hemono howabi Hari Misa howabi iba dugutagi halu ue lama Yodanaha pugulupebe biradagua biragola birama iralu i̱ namu labehe kogoni.

⁸Ani kogonigo Anduane Homogo gubalini haho wiaabo haga kago ibugua horongi ibunaga gubalini holene ogoni walia helo hameledo. Ibugua ani birago hondowa i̱na mbiraga iba gana lo mialu i̱ holene ngiagane tene Ngode Datagaliwabe kago ibuhondo bi ogoni lolene hameledo.

⁹I̱naga waitigirume bolilono i̱naga mo wiaga Ngode Datagaliwabe kagohondo, Í̠na i̱ aginaga embedaho waharibe, laro. I̱naga waitigi karume i̱ bo hengedo waharagola tandaga narogo naabo holiya kego aginagabe.

¹⁰Tigua i̱hondo, Í̠naga Ngode Datagaliwabe hayuago agoha kabe, lalu mege biaabo haragome i̱ore hengedope haabo haragola kogoni.