Iba Gana 119:35-169

³⁵I̱ í̠naga bi mana taluwa bialu howa turu haga kogonigo ainde í̠naga bi mana bulene hariga pedadagua pialu holiya i̱naga ge baya hangu haru habe.

³⁶I̱naga miniha mbirale ngaru dimagoli ho holiya ndo í̠naga bi lo ngego i̱na talialu buaore holiyanaga hame lolene ngibe.

³⁷Mbirale ko habane nabulene ngaru erembira mialu holiyanaga i̱ biamogo bibe. Í̠nime i̱hondo bayale bule lalu abale bi lo wiridagua i̱ biamogo bibe.

³⁸Í̠ni mitangi bialu mbirali í̠na bia laredagua biaga karuhondo bayale buleore lalu bi hongohe lo wiaga kegoni. Í̠na bi hongoheore ogoni bulebero lalu lowirigo í̠naga biabe biahaga i̱ kogohondo biai habelo hamelo kogoni.

³⁹I̱hondo bi ko lalu kago bibahende giho kogonigo bi ko urunime i̱ bope holigo í̠na i̱ biamogo bibe. Í̠naga bi mana tigabi ngeru baya gibiore ngegoni.

⁴⁰Í̠naga bi mana damenego i̱na talialu bialu hole hamelo kogoni. Í̠na mana tigabiore biaga kego i̱hondo holene gahenge ngibe.

⁴¹Anduane Homogo-o í̠na i̱ gubalini ho kego i̱ walia habe. Í̠nime i̱ mo wialu pele ngulebero lalu bi lo wiridagua bibe.

⁴²Í̠na bi heneneore larigo manda buwa i̱na í̠hondo mini mbiraore wu kogome wali agali i̱hondo bi ko lararu ladai buliya í̠na i̱ pele ngulebere.

⁴³Í̠na bi tigabiore larigonaga i̱na mini dunubia ho kogome i̱na bi heneneore hangu wali agali karuhondo latagi haabo holiya i̱ mo hongo habe.

⁴⁴Í̠naga bi mana lo ngego i̱na taluwa bialu haabo holebero.

⁴⁵Í̠naga bi ledegoore i̱na talialu bule bialu kogonigo mbirale ngarume hapai nahelo hameledo.

⁴⁶I̱na í̠naga mana lamulene nga lariruni kini bu karu lamule i̱ taga nahe howa lamulebero.

⁴⁷I̱na í̠naga bi mana lowini ngego hame timbuni lo howa talialu buaore ho kogoni.

⁴⁸Í̠naga bi mana uruni bayaleoreda lo manda bu howa i̱na hame timbuni lo kogoni. I̱na bi mana debene tigabi uruni bia laridagua bialu haabo holebero.

⁴⁹Bamba í̠nime ogoaleore bule lalu í̠ninaga biabe biahaga i̱hondo lo wirigo mitangi bibe. Í̠na ogoni biaore buleberedalo manda buwa i̱ mini dunubia ho kogoni.

⁵⁰I̱ha gendaru anda ibugu biyangi í̠na bulebero lalu bi lo wirigome i̱ mo dengalaho helarigola homa nabi halu i̱naga bu miniha mo palia holene karulo haru.

⁵¹Wali agali mine haga bu karume i̱ mege bialu karu helowa i̱na í̠naga bi mana lowini ngago erembira mialu napiruli.

⁵²Anduane Homogo-o í̠na i̱hondo bi ala langigi biriruni mitangi budai bigi berogome i̱ mo hongo haga biaga.

⁵³Wali agali ko biaga karume í̠naga bi mana lo ngego puguarago hondowa i̱ bu miniha keba timbuni haruli.

⁵⁴I̱ni dindi ogoriani kogoni howa i̱na í̠naga mana ngegonaga iba gana minime manda bialu laabo holebero.

⁵⁵Anduane Homogo-o mbiraga í̠ mitangi bialu i̱na í̠naga mana ngago lo manda biruli.

⁵⁶Í̠naga mana bibahende i̱na taliai halu bialu kogola i̱naga miniha dungulo haruli.

⁵⁷Anduane Homogo-o í̠ore hamelo kogoni. Í̠naga mana ngeru taluwa biaiore hole lalu bi lo werogoni.

⁵⁸Í̠na i̱hondo dara howa biamogo bulebero lalu bi lo wirigodago i̱ dara holene irane nawigoria nde harugo i̱ dara howa biamogo bibe laro.

⁵⁹I̱nime bialu harudaru manda biaiho howa i̱na í̠na bia laredagua talialu biai hole lalu í̠hondo bi lo wero.

⁶⁰I̱na awe buliya lalu hondo ha nabi abaleore í̠naga bi ledego talialu bulebero.

⁶¹Agali ko bu karume i̱ bialu kogoha hapai howa tinaga mana ngagoha i̱ haru pubagi holenaga bialu ka. Tigua ani bialu kagoyu i̱na í̠naga bi mana lowini ngego embeda nahe ko.

⁶²Mbi hanuniore i̱ heyu biruwa í̠na bi mana tigabiore ngadagua lope haga kegonaga i̱na í̠naga mini yaraga haruli.

⁶³Agali í̠naga biabe biahaga howa í̠naga mana ngago talialu haga karu i̱ ti baba ibagabu haruli.

⁶⁴Anduane Homogo-o wali agali dindi bibahendeni bu karuha í̠naga gubalini holene to̱ledago í̠naga mana ngego damene manda buliya i̱ lawai habe.

⁶⁵Anduane Homogo-o í̠naga biabe biahaga i̱hondo mana bayaleore birigoni ndobe. Í̠na buleore lalu bi abale lo wiridagua biaore birida.

⁶⁶Í̠naga mana lo ngego mitangi bialu mini mbiraore wu kogo í̠na mini bayale gigabi wulenebi manda bayale bulenebi i̱hondo ngibelo hameledo.

⁶⁷Í̠na i̱ abale pani ngia nabi heha í̠naga harigani polene winigo wahalu i̱ pubagi harugoyu ai áyu i̱na í̠naga bi mana bayaleore ngeru bialu kogoni.

⁶⁸Í̠ bayaleore howa i̱ dara habe naheoreni dara haga kegoni. Í̠naga bi mana bayaleore lo ngeru i̱ lawai habe.

⁶⁹Wali agali mine haga bu hearume i̱ mini lalu ke̱ halu bi ko dewa layagoyu i̱na í̠naga bi mana dege talima pialu bu miniha buaore howa biaabo halu kogoni.

⁷⁰Wali agali uruni tiha mini bayale wia aribia holene nawiore kagoyu i̱na nde í̠naga mana lo ngeru hangu hamelo kogoni.

⁷¹Í̠na i̱hondo pani ngialu minu barigoni bayaleore birida. Ogoni birigome i̱na í̠naga bi mana bayuwa lo manda birugoni.

⁷²Muni bu ngaru gubalini holenego dindiha lowa í̠naga mana lo ngeru galone duniniore lo mitangi bu haruli.

⁷³Í̠nime i̱ o kogobi wabuwa baya hangu handayaho haga kegoni. Í̠naga mana lo ngego bayuwa lomanda biai holiya i̱ha manda bayale bulene ngibe.

⁷⁴Í̠na bulebero lalu lowiriru i̱na talialu bialu kogo hondowa wali agali í̠ mo dunini ho karume turu ho holebira.

⁷⁵Anduane Homogo-o í̠naga bi mana ngeru tigabiore wiai kegoni i̱ manda bido. Í̠ mini bilinaheore kegome i̱na mana lehe birugonaga i̱hondo genda mo ngiridalo manda bu kogoni.

⁷⁶Í̠naga biabe biahaga i̱ kogonigo í̠na i̱hondo gubalini ho haabo holebero lo wirigodagua gubalini halu i̱naga bu mini mo hongo habe.

⁷⁷I̱na í̠naga bi mana lo ngeru bialu howa i̱ turuore ho kogonigo í̠na i̱ dara howa biamogo biriyagua i̱ha holene bayale yu holebero.

⁷⁸Wali agali mine haga bu karu ti ke̱ howa i̱ bame godini íbu helaga biaga kagonigo ti mo taga habelo hameledo. I̱na nde í̠naga mana lowini ngeru mitangi biaabo halu holebero.

⁷⁹Wali agali í̠ mitangi bialu mo dunini howa í̠naga mana ngeru mandabi karu ti i̱ koria ibilo hamelo kogoni.

⁸⁰Í̠na mana bulene nga larigoni mbira wanahe i̱na biaiore holiya biamogo bibe. I̱na mana bulene ngago mbira nabi koria taga pani noligo í̠naga mana damene ngeru bayuwa bialu hole hamelo ko.

⁸¹Anduane Homogo-o í̠na i̱ pele ngibelo ha dege biwane i̱naga bu miniha genda timbuni bialu i̱naga hongo ereba haya. I̱na í̠naga bi mana lowini ngego mitangi bialu mini mbiraore hongohe wu kogoni.

⁸²Í̠na buleore lalu lo wiriruni berebe hondole dege handayaho hewagola ai i̱naga de tandaga bida. Ai ogonidagua bidago í̠na i̱ angi biamogo buleberebe lalu kogoni.

⁸³I̱ mo ko henego ai nogo meme dongoneha waini iba hambu berelaganego ko haragola budubagabu wahene ngaligobiore kogoni. I̱ ogonibi kogo howa í̠naga bi mana lowini ngeru embeda nahe kogoni.

⁸⁴Mali ege horobi agira i̱ maliaho holedabe. Agali i̱ mo ko halu karu ti pani angi nelo muleberebe.

⁸⁵Wali agali mine hagabi í̠naga bi mana lo ngeru nabiagabi karu tigua i̱ gonoha do ngogola minulenaga mana maru ohowa bialu ka.

⁸⁶Í̠naga bi mana bibahende lo ngeru heneneore lo ngego iname mini mbiraore wiai habehe kama. Agali maru karume i̱ hondowa ke̱ halu bi ko lararume i̱ mo tandaga halu ka. Tigua ani bialu kago i̱ biamogo bibelo hamelo kogoni.

⁸⁷Tigua i̱ bo waholebiyaria habo layago i̱na í̠naga bi mana wanahe yu tiga bu kogoni.

⁸⁸I̱na í̠naga bi mana bibahende lo ngeru taluwa biai holiya í̠na gubalini haabo ho kego i̱ bayale holiya handayaho habe.

⁸⁹Anduane Homogo-o í̠naga bi mana ngego hari daligaha mbirale bibahende hongo ho wiaabo kadagua wiaabo holebira.

⁹⁰Í̠ni mini bilinahe kegome bi ledegoore áyu manibi wiaabobo bu wulebira. Í̠na dindi o wabu ngego ibuni wuleneore ngagoria wilalu wia amu nana nabi wiaabo haga ngagoni.

⁹¹Mbirale ngaruni bibahende aniore wiai helo lalu í̠nime laridagua wiaabo henego ngagoni. Irane mbirale urunime í̠ninaga biabe biai hagago ani wiai henego nga.

⁹²I̱naga turu holene tene í̠naga bi mana ngagoha nawidale í̠nime i̱ genda tandagala mo ngirigome i̱ homedoleda.

⁹³I̱na í̠naga bi mana lo ngego yu wanaholeberogo irane i̱na mana ogoni taluwa bialu kogome i̱ homa nabi bayale heledegoni.

⁹⁴I̱ í̠nagaore kogonigo ai í̠na i̱ pele ngibe. I̱na í̠naga bi mana lo ngeru talialu bu manda biaabo haga kogoni.

⁹⁵Agali ko bu karume i̱ bo wahole bira do haga bida. Tigua ani bule kagoyu i̱na í̠naga bi mana lo ngeru bibahende mitangi bialu haabo holebero.

⁹⁶Mbirale bibahende ngaru wiaabo nahagayane handarugoyu í̠naga bi lo ngeruni dege duniniore baya burugule wiaabo holebira manda bu ko.

⁹⁷Anduane Homogo í̠naga bi mana lo ngeruni i̱na gubalini timbuniore ho kogoni. I̱na í̠naga bi mana lo ngeruni mbiraga horombebi mitangi biaabo haruli.

⁹⁸Í̠naga bi mana lo ngerunime i̱ heba haabo howa i̱hondo manda bulene dewaore ngiaga. Í̠naga bi mana lo ngerume i̱ manda bulene gibiore ngiragola i̱naga waitigi karunaga manda bidarubi ndo i̱ manda bu bolanguahe holiya biamogo biaga.

⁹⁹Horo bibahendengi í̠naga bi mana lo ngeruni mitangitangi bialu i̱naga miniha mo pehaga bialu haabo kogoni. I̱ ani bialu kogome i̱naga miniha manda bulene bayaore anda ibiragola i̱naga lawai haga karume manda bidagobi ndo i̱ manda daligabi kogoni.

¹⁰⁰Í̠na bibe lededagua bialu kogome i̱naga manda bulenego agali wahe karume manda bidagobi ndo i̱ mini gigabi wulene bolanguahe kogoni.

¹⁰¹Í̠naga bi mana lo ngedagua hangu bulenaga i̱na mana ko bulenego bibahendehondo igilaga bialu wandialu kogoni.

¹⁰²Anduane Homogo i̱naga lawai haga í̠ kegoni howa í̠nime i̱ lawai haga bialu kegoni. Anigo í̠na bi lawai haga bereruni i̱na mbira hale howa mo wanahe kogoni.

¹⁰³Anduane Homogo í̠naga bi mana baya dendebiore ngagoni. Mone ibane mbira narogola neha dende gibi biaganego goyane lowa Anduane Homogo í̠naga bi mananaga dendeore gibi biaga ngagoni.

¹⁰⁴Anduane Homogo í̠naga bi mana lo ngegome i̱hondo mitangi bulene baya gibiore ngiaga ngagoni. Ani ngiagagome i̱ mana ko bulene damenego i̱na bibahendeore manga bialu magu biragola haruli.

¹⁰⁵Anduane Homogo í̠naga bi mana lamu hale ale ngagome i̱ hariga tigabini poliya biamogo bialu haru haga ngagoni. I̱ hariga polenego ogodagua pu lalu ge mugu mo wá hagane hale ale ngagoni.

¹⁰⁶Anduane Homogo í̠naga bi tigabiore lo wigi bideruni handalu langeredagua i̱na hale halu biaore bule lalu lo ngogoni. Bi lo wirugo ogoni pugua nabuleorebero.

¹⁰⁷Anduane Homogo-o i̱ tandaga gibiore hiriribi nalu kogonigo tandaga nalu homa nabuliya í̠na i̱ biamogo bulebero laridagua biamogoore bibe.

¹⁰⁸Anduane Homogo-o i̱na í̠hondo bi lalu turuore halu ka̱i̱ larogoni. I̱na í̠hondo ka̱i̱ larogoni yamialu í̠naga bi lo ngeruni i̱hondo bayuwaore biawai habe.

¹⁰⁹Horo bibahendengi i̱ homolene kawareore ngagoria pu haga biruligoyu í̠naga mana lo ngeruni embeda naharuli.

¹¹⁰Agali mini kowi hearume i̱ do wuliyanaga gono weneyago de handarugoyu i̱na Anduane Homogo í̠naga bi lo wiriyaruni mbira pugua nabi kogoni.

¹¹¹I̱naga dabudabu wia ai̱ ai̱ore bulenego Anduane Homogo í̠naga bioreda manda bialu í̠naga biore hongo howa yaniho kogoni. Ani yaniho kogola í̠naga bigome i̱ore mo turu gibiore haga.

¹¹²Anduane Homogo í̠naga bi mana lo ngedagua i̱na bialu mbira mo wanahe bia dege bialu kone homaluore wahole kogoni manda bu ko.

¹¹³Wali agali karume ke̱ howa í̠ talima ibaga tingi haga karu i̱na ti handabe manga ho kogoni. I̱na í̠naga bi mana ngeru mitangi bialu hame timbuni lo kogoni.

¹¹⁴Í̠ni hangu i̱ handayaho haga howa i̱naga humbi ale kegoni. Í̠na buleore lalu bi lo wigi biriruni manda bialu i̱na mini dunubia ho kogoni.

¹¹⁵Wali agali mana ko biaga kamiru tí i̱ kogoria nahe pudaba. I̱naga Ngode Datagaliwabe bi mana ngago taluwa bialu holebero.

¹¹⁶Í̠na mo hongo holebero lalu lo wirigonidagua i̱ mo hongo habe. Mo hongo hariyagua i̱ homa nabi bayale holebero. I̱na í̠hondo mini dunubia ho kogoni bame mo hole buligo í̠naga hongo ogoni ngibe.

¹¹⁷I̱ bayale holiya i̱naga gini yaniho habe. Í̠na bi larego i̱na hale halu bialu holebero.

¹¹⁸Wali agali í̠naga bi mana mo wahaga karuhondo erembira mialu haga kegoni. Tigua ke̱ howa mana bule ngaru bame habane nabulene wialu ereba hai holebira.

¹¹⁹Í̠na wali agali mana ko biaga karu ko ngubi nagalone dege kagoni lo mandabu kegoni. I̱na í̠naga bi mana ngeru hameore lo kogoni.

¹²⁰I̱na í̠ gibiore kego manda buwa i̱ gi halu duru lalu kogoni. Í̠naga godi tigabiore lole ngego mitangi bialu i̱ giho kogoni.

¹²¹I̱na mana bayale tigabi ngaru dege bialu haru. Waitigi bu karume i̱ mo ko helo í̠na i̱ yu wa nahabelo hameledo.

¹²²Í̠naga biabe biahaga kogonigo í̠na i̱ biamogo buleore lalu bi lowibe. Wali agali mine haga karume i̱ mo genda nahelo hameledo.

¹²³Bamba í̠na i̱ bayale holiya biamogo buleore lalubi i̱ pele ngialu haru dai buliya lalu lo wirigodagua bibelobi i̱ í̠ha maliaho haabo kogome i̱naga de tandaga biragoni.

¹²⁴Í̠naga gubalini holeneme i̱ dara howa biamogo bialu í̠naga bi mana debene ngeru i̱ lawai habe.

¹²⁵I̱ í̠naga biabe biahaga kogonigo í̠naga bi mana baya hangu manda buliya mini bayaleru talebu ngibe.

¹²⁶Anduane Homogo-o wali agalime í̠naga bi mana ngeru angua halu piagaya. Tigua ani bialu karunaga í̠na ti pani nelo mulene tu áyu ogoni.

¹²⁷I̱na í̠naga bi mana gubaliniore ho ko. I̱na ngolo bayale ngago hameledogobi emene dindiha lowa ogoni bolangua howa í̠naga bi mana ngeru i̱na gubalini timbuniore ho kogoni.

¹²⁸I̱na í̠naga bi mana ngeru bibahendeore talialu biaiore haruli. Hariga í̠ kegohayagi ndo mendeha pubagi halu polene hame naleore kogoni.

¹²⁹Anduane Homogo í̠naga bi mana lo ngeru bayaore gibi lo wigi bidegoni. Anidane hondowa i̱na i̱naga gubalinioreme turu howa í̠na bibe lededagua bialu kogoni.

¹³⁰Í̠nime í̠naga bi mana lo ngeruninaga galonego mo walia halu kegome wali agali tinaga miniha wá laga biragola bu kagoni. wali agali mini timbuni nawi karu í̠naga bi maname mini mo dingi dangia lenego ai miniwi bogabi bu kagoni.

¹³¹Í̠naga bi mana lo ngeru gubalini gibiore ho kogome í̠na mbira i̱hondo bia lare alego bia dege bulenaga i̱na i̱naga bu miniha heyuwa manda manda bu kogoni.

¹³²Anduane Homogo í̠na wali agali í̠ gubalini haga karu dara howa biamogo birilidagua i̱ de handaya halu i̱bi dara howa biamogo bibe.

¹³³I̱ mana ko bialu pilolilono de handayaho halu mamage holebero lo wiridagua í̠na i̱ mamage habelo hameledo. Ko buleneme i̱ bope holigo í̠na i̱ yaniho habe.

¹³⁴Í̠naga bi lo ngerudagua hale halu biaiore holiyanaga wali agali mini kowi karume i̱ hengedope halu mo ko holigo í̠na i̱ yaniho habe.

¹³⁵Í̠ i̱ kogoria kaware hapara howa í̠naga bi mana lo ngeru i̱hondo lawai halu í̠na i̱ mo gumbila habe.

¹³⁶Wali agalime Anduane Homogo í̠naga bi mana lo ngedagua nabi puguabo halu kagonaga i̱ dugu dege beroria i̱naga deha deiba iba ale dugualu haabo kogoni.

¹³⁷Anduane Homogo-o í̠ tigabiore kegoni howa í̠naga bi mana lo ngeruni damenego bibahendeore tigabiore lo ngegoni.

¹³⁸Í̠na inahondo bi mana ngideruni damenego bibahendeore tigabiorebi bayaorebi hangu ngagoni.

¹³⁹I̱naga waitigi karume í̠naga bi lo ngeruni ti mitangi nabiagaore kagoni. Ti ani kago handarodagua i̱naga bu habane nigoniha keba gibiore ira daradagua biragola haruli.

¹⁴⁰Anduane Homogo í̠na bulebero laga bialu bi lo wigi bideruni heneneore biagayane i̱na haruore handama ibido. Bulebero lo ngedagua heneneore bigi birigo hondowa turuore howa yaniho kogoni.

¹⁴¹I̱ agali mbira abogo ka nalene emene ko dindihaore howa marume i̱ mege biaga kogoyu i̱na Anduane Homogo í̠naga bi mana dege ha do wanaharuli.

¹⁴²Anduane Homogo í̠naga mana tigabi bulenego wia ai̱ ai̱ bialu í̠naga bi mana lo ngeruni henene hanguore lo wigi bidegoni.

¹⁴³I̱ kogoria genda bulenebi mini dege dindi holenebi dewaore íbu wia ngagoyu i̱na í̠naga bi lo ngeru hondowa nde turuore bigi biragola haruli.

¹⁴⁴Í̠naga bi lo ngeruni tigabi hanguore wia ai̱ ai̱ binigo lo ngegoni. Í̠naga bi lo ngedagua biruyagua i̱ haabo holeberogo lededaguaore baya hangu manda bialu buliyanaga biamogoore bibe. Í̠na ani beregola i̱ bayale dunguleore holebero.

¹⁴⁵Anduane Homogo-o i̱na í̠ hongo howaore olarogoni. Í̠na mana bulene nga lalu lo ngeru i̱na talialu holiya i̱na í̠hondo bi larogo hale habe.

¹⁴⁶I̱na í̠ olalu kogoni. Í̠naga bi mana lo ngego taluwa bialu holiya i̱ pele ngialu haru dai bibe laro.

¹⁴⁷I̱na gao naledaha i̱ biamogo bibelo í̠ olaruli. Í̠na buleore lalu bi lo wigi birirunaga i̱na mini dunubia ho kogoni ndobe.

¹⁴⁸Mbiraga i̱ dengala ho wialu í̠naga bi mana debene lo ngeru dege mitangi biaabo haruli.

¹⁴⁹Anduane Homogo-o í̠ gubalini haabo ho hariligo i̱naga bi hale habe. Í̠na dara howa biamogo biriligo walia halu i̱ homa nabi bayale holiya handayaho habe.

¹⁵⁰Agali marume mini ko wu howa i̱ bo wahole bialu hayaru í̠naga mana mo tene nahaga karubi tini kaware o ibiragoni ndobe.

¹⁵¹Anduane Homogo-o í̠naga bi mana bibahende henene wiaabo haga ngelowa í̠ni i̱ kogoha kaware haabo kegoni.

¹⁵²Bambaore howa í̠naga bi mana lowiriru mandabi harugoni ndobe. Í̠na bi uruni lo wialu wiaabo helo nge.

¹⁵³I̱na í̠naga bi mana lo ngeru embeda nahe kogo í̠na i̱ha genda timbuni ngaru de hondowa i̱ biamogo bibe.

¹⁵⁴Í̠nime pele nguleore lalu lo wiridagua i̱ pele ngibe. Godi lalu koria i̱ bo waholene nga loligo í̠na i̱naga lahabe.

¹⁵⁵Ko biaga karu tigua í̠naga bi mana lo ngeru talialu nabiagaore kago í̠na ti pele mialu haru dai nabule kegoni.

¹⁵⁶Anduane Homogo-o í̠naga dara holene timbuniore ngegome í̠na dara howa biamogo bulebero lalu bi lo wiridagua áyu ogoni i̱ biamogo bibelo hameledo.

¹⁵⁷Waitigi dewaoreme i̱ baba waitigi ho halu mo ko haga bidagoyu ainde i̱na í̠naga bi mana galoneore lo ngeru yu wahalu nape kogoni.

¹⁵⁸Agali ko biaga biarume í̠na mana bayale bulene nga lo wiriruni nabiaga karu hondowa i̱na tihondo turu nahe handabe manga timbuni ho haruli.

¹⁵⁹Anduane Homogo-o í̠naga bi mana bulene nga larigo i̱na gubaliniore howa bua haabo kogoni manda bibe. Í̠naga gubalini holene ho haabo haga kegonigo ainde i̱ dara halu pele ngibe.

¹⁶⁰Í̠naga bi mana ngerunaga irane henene lolene dege lo nge. Í̠naga bi mana lo ngeruni tigabiore wiaabobo bu wiaga nga.

¹⁶¹Irane nawini agali haguane bu karume i̱ mo ko halu kagoyu i̱na í̠naga bi mana lo ngeru mitangiore bu haga kogoni.

¹⁶²Mbiralime ngolo dewa handa walia howa turu hagadagua í̠na buleore lalu lo wigi birirunaga mitangi bialu i̱ turu timbuniore ho kogoni.

¹⁶³Ke̱ hagane mana koorene ko ngago i̱ mangaore ho kogoyu i̱na í̠naga bi mana lo ngeru hangu gubalini timbuniore ho kogoni.

¹⁶⁴Í̠na mana tigabini howa bi lolene ngadagua laga kegonaga i̱na horo bibahendengi í̠hondo kahalu ka̱i̱ laruli.

¹⁶⁵Wali agali í̠naga bi mana gubalini ho haga karu ti bayale halu mbirale mbirame ti mo pila holene nawulebira.

¹⁶⁶Anduane Homogo-o í̠na i̱ pele ngialu haru dai bibelo maliaho howa mana í̠nime bibe lalu lo wirigo i̱na bialu kogoni.

¹⁶⁷Í̠naga bi mana lo ngeru i̱na taluwa bialu hagaore kogoni. Bi mana uruni gubaliniore howa bua timbuni ho kogoni ndobe.

¹⁶⁸I̱na í̠naga mana lo ngerubi bulene nga lalu bi lederubi bibahendeore talialu biai halu kogoni. I̱na mana ogoni bialu koria í̠ de handai ho kegoni.

¹⁶⁹Anduane Homogo-o i̱ biamogo bia lalu olalu kogo hale habe. Abale howa í̠na i̱hondo manda bulene nguleore lalu bi lo wiridagua i̱ manda bulene timbuni mo ngibe.