HECHOS 8:18-38

¹⁸Zeeṉe goṉ meṉ ne lë Simón ga, ne loxaque rxobniase zha poxtl co guic grë miech co laa zho rgaa guieḻbiini ne rdeed Espíritu Sant, dzigo laa me rdeed dimi,

¹⁹rëb me: ―Goḻneedz poder qui lo naa; zeeṉa ye naa zha ne cxobniataa naa guic ygaa zho guieḻbiini ne rdeed Espíritu Sant.

²⁰Pquiab Pedr rëb Pedr lo me: ―¡Bieṉ gaṉle pe rnee luu! ¿Pa bin luu ye xpoder Dios zac si miech? ¡Tebaa niinagazh nitlo luu grë xtimi luu i!

²¹Ni lalnu rieguiaḻd luu guṉ luu dziin rii, ni gdziṉdgaa dze guṉ luuw; sac mbed zdoo luu, zienied guic luu guṉ luu miṉe rnabey Dios.

²²Blee zhgab yozh qui guic luu, bnab lo Dios zeeṉa togo squia zdoo me luu, guṉquizhd me luu doḻ ne squi bza zdoo luu i;

²³sac rlu niapse guieḻntseeb nonie guic luu, ni lëëque luu goṉ nosacsi luu ne squitaa noyuṉctal luu xtoḻ luu.

²⁴Pquiabse me rëb me: ―Goḻguṉ guieḻnzaac, goḻnab lo Dios yquia zdoo me naa, zeeṉa ygaad naa grë guieḻnëdox ne rnee to i.

²⁵Blozhse bzodiidznie Juan grë miech co grop me Pedr, blozhse pseed zho zho Xtiidz Dios, laa zho wbire zey zho Jerusalén stib. Guiedz ne rdedtaa zho dib xtan zha Samar ga, rnee zho Xtiidz Dios lo grë miech co.

²⁶Laa Lip no Samar ga, tib dze brieequia tib xanjl Dios lo Lip, rëb me tsie Lip nëz ne rriee Jerusalén zie nëz Gaza.

²⁷Dzigo güey Lip nëz co. Tib dan ngana, lëëtaque laa tib meṉ ne nac dziin lo rein ne lë Candás zie ga, dziin nroob nac me lo rein co, sac me ngotsow grëtaa dimi ne no Etiopí.

²⁸Zobse me tib leṉ carret nroob zie me ga; znu wbirele me Jerusalén güeygaṉ me Dios. Laa me zob leeṉ co quialab me lo Xtiidz Dios miṉe pquiaa Isá, meṉ ne biadteed xtiidz Dios padzeela.

²⁹Dzigo bnabey Espíritu Sant Lip tsie Lip ygaa carret co lo Lip.

³⁰Zeeṉe bgaa carret co lo Lip, bin Lip pa lo nolab meṉ co; nacne rëbchaa Lip lo me: ―¿Pe rieṉ luu cho raquiet zaatne nolab luu i?

³¹―Rieṉd naaw ―rëb me―, rquiin tib zha ne gnë lo naa dieṉ zha naca. Dzigo bredz me Lip biep Lip leṉ carret co, güeysob Lip cue me.

³²Znu rnee zaatne nolab me ga: Zigne racse mëcwxiil yeeṉ zeeṉe rnaaz zho ma rut zho ma, scadaa ndooladz goc me, peet beeṉd me zeeṉe laa zho zienie me. Ni zigne roptsied ma zeeṉe rtsiib zho ma, scaque ni tib diidz ptsired me lo zho.

³³Niicle ne goṉ zho scataa ndooladz me, per psacsi zho me. ¡Pa lotaa bdziṉ guieḻntseeb ne beeṉ grë meṉladz me! Sac goṉ, ptiche zho xquieḻmban me lo guidzliu.

³⁴Dzigo rëbchaa meṉ co lo Lip: ―Bzhiguieḻ bnë lo naa dieṉ, cho nu znu rzeet Isá lo rii. ¿Pe me bded miṉ rii, te stib zhow ye?

³⁵Dzigo rëb Lip lo me Jesús raquiet ga, ni bnee Lip grëraa miṉe nac zhiwseed Jesús.

³⁶Laa zho no nëz, tibaque zeeṉe bdziṉ zho tib lugar co no nis; rëbchaa me lo Lip: ―¡Bui gaṉle laa nis no nu! Mazd bzhiguieḻ pchoobnisgazh naa.

³⁷―Zaca ―rëb Lip―, totsaque dib zdoo luu rliladz luu Jesús. ―Rliladz naa me ―rëb meṉ co―, rliladz naa ne nli Xpëëd Dios nac me.

³⁸Dzigo bnabey me blëz carret co ga. Biet me leeṉ co grop me Lip bzëëb zho lo nis co, ga pchoobnis Lip me.