Dad Nimò 8:18-38

¹⁸Na teen Simon tagdawatla Tulus Dwata fagu di kafkah ale Fiter i dad falella di dale. Taman fanan banlé filak Fiter na Dyan, na manan,

¹⁹“Begyu blé deg i kgagan én, du fye kdee dad to gufkahgu i dad falelgu gamdawat i Mtiu Tulus.”

²⁰Kabay tmimel Fiter kenen, manan, “Fye moon ku malmo ge gagin di filakam du man nawam gaganam bnayad i blé Dwata.

²¹Landè alelam di nimòmi, du là ge matlu di kite Dwata.

²²Nsalam i sasè nimoam, na dmasal ge du fye nlifet Dwata i sasè di fandamam.

²³Du i teengu di ge, too mingà nawam na too ge mgikat di salà.”

²⁴Na talù Simon, manan, “Begyu agu dnasal du fye là mkel di deg i gmanam ani.”

²⁵Na di kafnge ale Fiter tamdò gablà di Amula Dyisas Krayst, samfulê ale di Dyérusalém. Na di kagula dee guslobla di dad malnak banwe di Samériya du tdòla i Fye Tulen gablà ku Dyisas.

²⁶Kabay nun kasaligan Dwata talù di ku Filif, manan, “Mdà ge magu di dalan fdu di Dyérusalém salu di Gasa.” Na dalan ani gagu di banwe gulandè to.

²⁷Na di kaklinge Filif i gman i kasaligan, mdà kenen. Na di slengan magu nun teenan satu to taknafun mdà di banwe Itiyofya magu mulê. Na i lagi ani satu ganlal too mdatah du gal magot filak i libun gumdatah di banwe Itiyofya dnagit ku Kandis. Tasalu kenen di Dyérusalém du mangamfù di Dwata,

²⁸na di kuléan smakay kenen kalisa. Slengan magu masa kenen i sulat tugad Dwata Isaya.

²⁹Na man Tulus Dwata di ku Filif, manan, “Fdadong ge di kalisa atù na naginam.”

³⁰Taman faflal Filif fdadong di kalisa na lingen kbasa i lagi én mdà di sulat tugad Dwata Isaya. Taman smalek Filif, manan, “Glabatam kè i bnasam?”

³¹Na tmimel i ganlal, manan, “Tan i kaglabatgu ku landè to tamdò dun di deg?” Na nlakan Filif smakay na fyakan kenen fye sudeng di safédan.

³²Na ani bnasa i ganlal, manan, “Salngad kenen i bilibili nebe du fan knatê, na salngad i ngà bilibili là mugak di kwè i bulan, du landè manan.

³³Na toola kenen fyà, na là tlu i kukumla kenen. Na landè dad belan, du i klawilan di tah tanà tafto.”

³⁴Na man i ganlal di ku Filif, manan, “Begam tulen deg kun ku simto gugtadè i man tugad Dwata ani, kenen kto ku demen dademe to?”

³⁵Na taman tambù Filif tmulen di to én i Fye Tulen gablà ku Dyisas mdà di bnasan gine.

³⁶Na slengla magu kel ale di satu yéél, na man i ganlal, “Neyem, nun sa yéél dini. Fakay dé ku bnunyagam agu?”

³⁷Na man Filif di kenen, manan, “Fakayta ge sa bnunyag ku faglut ge mdà di nawam.” Na tmimel i ganlal, manan, “Hae, faglut agu Dyisas Krayst i too glut Tingà Dwata.”

³⁸Taman fafanakan i kalisa na lwe ale, Filif na i ganlal, tufa di yéél, du bnunyag Filif kenen.