Los Hechos 8:18-38

¹⁸Na' ka gokbe'i Simónna' jsoa Espíritu Sántona' ḻoo yic̱hjlall'do' beṉ'ka' biyoll bx̱oa na' postlka' yic̱hje'ka', na' bshabile' ḻegake' mech,

¹⁹chi'e: ―Ḻi goṉ nad' yeḻ' waki kwenc̱he nottez beṉ' ka wx̱oa' na'ki yic̱hje'ka' soa Espíritu Sántona' ḻoo yic̱hjlall'do'eka'.

²⁰Na'ch Pédrona' golle'ne': ―Kwiayi'lenshgo' xmecho'na', daa chakilo' wak si'leno'n daa choṉ Chioza' ka'z.

²¹Bikz ga gak gono' ka nak dga chonnto', ḻa' bi nak yic̱hjlall'do'na' ka cheeni Chioza'.

²²Biyaj bileni dii mala' chono', na' be'ḻwill Chioza' shi yizi'xene' c̱heyi daa ba goklalloo gono'.

²³Ḻa' nakbia'cha bin nxe bin nzak' nak ḻoo yic̱hjlall'do'na', na' ḻennan' ntakw nc̱hejan li'.

²⁴Na'ch che' Simónna' ḻegake': ―Ḻi we'ḻwillgach Chioza' ni c̱ha' kwenc̱he bi gak daa ba wnale gak c̱ha'.

²⁵Na' ka biyoll be' Pédrona' na' Juanna' cho'a xtill' Chioza', na' biza'gake' ziyajgake' Jerusalénna'. Na' ka zingoogake' nez, be'gake' dill' wen dill' kob c̱he Jesucrístona' zan yellka' gana' mbani Samáriana'.

²⁶Na'ch to anjl c̱he X̱ancho Chioza' wṉie' Felípena', chi'e: ―Wyaj lli'lə na' gox̱oo neza' daa ziza' Jerusalénlə na' zejan yell Gázalə, neza' daa chde latja' gana' bibi chashj chḻeb.

²⁷Na' wza' Felípena' zeje', na' tneza' billague' to beṉ' Etiopía wyaje' Jerusalénna' je'lawee Chioza'. Na' nake' to eunuco, beṉ' zakii, na' nak lall' nee mech c̱he noolə wṉabia' c̱he Etiopíana' beena' le Candace.

²⁸Na' ba zingwee nez ziyaje' lalle'nalə, na' ziyo'e ḻoo karret c̱he'na' chlabe' daa bzej dii Isaíaza', beena' wdix̱jee daa goll Chioza'ne' kani'yi.

²⁹Na'ch Espíritu c̱he Chioza' chi'e Felípena': ―Jabig' kwit karreta'.

³⁰Na' ka jabig' Felípena' kwit karreta', benile' chlab beena' daa bzej dii Isaíaza'. Na' chi'ene': ―¿Achajniilo' daa chlabo'?

³¹Na'ch beṉ' Etiopíana' chi'e: ―¿Nakra gon' shajniida'n?, ḻa' bi zoa no wzajnii nad'. Na' golle' Felípena': ―Wyepgach na' wche' kwitii.

³²Na' Cho'a Xtill' Chioza' gana' chlabe' nan: Betgake'ne' ka chite' to xil'do'; na' ka to xil'do', ba bi chosyaa kat' chshibe'b, ka'kz ḻe', ni shcho'a dill' bi wṉie'.

³³Na' bsi'gake'ne' yeḻ' zto', na' aga no goklen ḻe' gone' yeḻ' josc̱his c̱he'. Na' kono xiiṉ dia c̱he wzoa, ḻa' bsol bṉitgake' yeḻ' mban c̱he'na'.

³⁴Na'ch beṉ' Etiopíana' chi'e Felípena': ―Ben goklen wna nad', ¿nora c̱heyin wna dii Isaíaza' ka'? ¿Ac̱he kwinen' cho'e dill', anti c̱he beṉ' yoblan?

³⁵Na'ch Felípena' wzoloe' bzajniile'ne' ka zeji gana' chlabe' na' bi'e dill' wen dill' kob c̱he Jesúza'.

³⁶Na' ka bllingake' to ga llia nis, na' che' beṉ' Etiopíana' Felípena': ―Ni llia nis, ¿ade daa wsej wllonan c̱hoa' nisa'?

³⁷Na' che' Felípena'ne': ―Shi chajḻi'o do yic̱hj do lalloo, wak wchoa' li' nisa'. Na' che' beṉ' Etiopíana': ―Chajḻi'a Jesucrístona' nake' Xiiṉ Chioza'.

³⁸Na'ch bkweze' karreta' na' betjgake'; na' wyoogake' ḻoo nisa' na' Felípena' bchoe'ne' nisa'.