Hechos 8:15-21

¹⁵Catiꞌ guladxinëꞌ niꞌ Pedro len Juan naꞌ, gululidzëꞌ Dios uláz quegac bunách niꞌ taꞌyejlëꞌ Cristo quië dusóalenëꞌ lequëꞌ Dios Böꞌ Laꞌy.

¹⁶Ga bdxintë dza naꞌ, cutu rdxíninëꞌ quequëꞌ Dios Böꞌ Laꞌy. Nadílgaczëꞌ nis quië lacquëꞌ tuz len Xanruꞌ Jesús.

¹⁷Niꞌr gulaxóa naꞌquëꞌ bunách Samaria naꞌ Pedro len Juan naꞌ. Gululidzëꞌ Dios, atiꞌ dusóalenëꞌ lequëꞌ Dios Böꞌ Laꞌy.

¹⁸Catiꞌ bléꞌinëꞌ Simón, bönniꞌ udzáꞌ naꞌ, le guc catiꞌ gulaxóa naꞌquëꞌ bunách niꞌ gbaz naꞌ nasölëꞌë Cristo, dusóalenëꞌ lequëꞌ Dios Böꞌ Laꞌy, guꞌnnëꞌ quizxjëꞌ lequëꞌ dumí,

¹⁹rëꞌ lequëꞌ: ―Benn caꞌ quiaꞌ yöl‑laꞌ huac ni, quië catiꞌ gxoa naꞌa nútiꞌtëz bunách, dusóalenëꞌ nu naꞌ Dios Böꞌ Laꞌy.

²⁰Niꞌr gudxëꞌ lëꞌ Pedro, rnëꞌ: ―Nit tsazxö́n len liꞌ dumí quiuꞌ, le ráquinuꞌ len dumí gdél‑liꞌnuꞌ yöl‑laꞌ huac queëꞌ Dios.

²¹Cutu nacuꞌ lsacaꞌ gutsuꞌu lë ni, le cunác dxiꞌa icj ládxiꞌdaꞌu lahuëꞌ Dios.