Hechos 8:10-35

¹⁰Nu rese myet, xaawin nu xaa gox, ngwii lo xaa nu nzhon xaa xtizh xaa, nu mbezh re xaa: —Xaa ne nkano yalnabeyy mod cheen Dios.

¹¹Nu nzhon re xaa kwaan mbezh xaa, nel xche doo mkade xaa re xaa yezh lo re kwaan gro kwaan mle xaa.

¹²Per gorna lee Lip nzaa kwent cheen wdizh chul cheen Jesucrist lo xaa, nu cheen pa nabeyy Dios rop Jesucrist, xaabyi nu ngwnaa mzelo ngwii lo Dios nu mrubnis xaa.

¹³Nu axta noka Simón, xaa ngok wezh mzelo ngwii lo Jesús nu mrubnis xaa, nu snee mreke xaa tich Lip, nu ndedyall xaa ngwii xaa lo re yalgro kwaan nlu lo xaa.

¹⁴Leezha mzhin diizh lo re xaa mkayaa yalnabeyy lo Jesús lee re xaa Samaria mkayaa wdizh chul cheen Dios, zee mxaal re xaa Pér rop Juan ngwa yezh Samaria.

¹⁵Gorna mzhin rop xaa ne yezh Samaria, ngunaab xaa lo Dios zee kayaa re xaa Jesús, xaa Samaria, Mbi Naban cheen Dios.

¹⁶Sbaa mle rop xaa ne nel zer kayaa re xaa Samaria Mbi Naban; nebse mrubnis xaa kwaan yalnabeyy cheen Jesús, Xaa Nabeyy.

¹⁷Zee Pér nu Juan mzhib yaa yek re xaa, nu snee mkayaa re xaa Mbi Naban.

¹⁸Gorna ngune Simón lee rop xaa mkayaa yalnabeyy lo Jesús nzhib xaa yaa yek re myet, zee lee re myet mkayaa Mbi Naban, zee nzhekla Simón ngzaa demi lo rop xaa ne,

¹⁹kwaanzee nzhé xaa lo xaa: —Zaa gu lo na yalnabeyy kwaan nkano gu ka na, zee noka na gorna zhib na yaa na yek re myet, noka kayaa xaa Mbi Naban cheen Dios.

²⁰Zee mkeb Pér lo xaa nzhé: —¡Lu, nu xdemi lu lux, nel mle lu xgab zii lu yalnabeyy kwaan nzelazh Dios kwaan demi!

²¹Nyent mod kee lu xchiin Dios, nel lee lextoo lu nanakt nali lo Dios.

²²Blaa xgab nawent kwaan nkano lu, nu bnaab lo Dios zee chelee nzho moda, chee xaa kwaan nawent kwaan nzho leen lextoo lu,

²³nel nzeen na nzho yalnayii lextoo lu nu nkadoo lu lo re kwaan nawent kwaan nabeyy lextoo lu.

²⁴Nu Simón mkeb nzhé: —Naab gu lo Xaa Nabeyy, zee nyent cho kwaan gak na lo re kwaan né gu.

²⁵Gwluzh ngulo mzaa xaa kwent cheen xtizh Xaa Nabeyy, lee rop xaa mkayaa yalnabeyy lo Jesús, nya naz Jerusalén nu mzaa xaa kwent cheen wdizh chul leen re yezh win cheen Samaria dubse naz.

²⁶Gwluzh ngulo mded kwaane tub mandad cheen Xaa Nabeyy nzhé lo Lip: —Gwa nu bzen naz kwaan nkato naz Jerusalén kwaan nzha naz yezh le Gaza —naz ne nded naz wen.

²⁷Kwaanzee naz zee nzha Lip. Nu baa mzhaal xaa tub xaa non yizhyo Etiopía, xaa nankat ngwnaa. Lee xaa ne nkanap rese xdemi Candace, me nabeyy rese xaa Etiopía. Xaa ne mroo Jerusalén pa nguyoll xaa lo Dios.

²⁸Nya xaa lazh xaa nu nzob xaa leen tub karret, nu nya xaa nyilab xaa yech kwaan mkee Chay, xaa mzaa kwent kwaan nzhé Dios lo lee xaa yilo.

²⁹Zee lee Mbi Naban nzhé lo Lip: —Brexonn zee yiga karret ba lo lu.

³⁰Gorna mbii Lip lo karret, mbin xaa lee xaa Etiopía kalab yech kwaan mkee Chay, zee mnabdizh xaa lo xaa: —¿Che nla kwaan kalab lu yek lu?

³¹Lee xaa Etiopía mkeb nzhé: —¿Xomod laya yek na, kwaan nyent cho xaa zaa kwenta lo na xomod naka? —Nu zee nzhé xaa lo Lip— Guxoob nu zob xkwes na nee.

³²Lee kwaan kalab xaa nak kwaane: Wee xaa xaa kwenta tub mbakxiil lo yalgut, nu kwenta tub mbakxiil leezha nchub xaa yich led ma nambazhet ma, nixa lee xaa naniit nik tub wdizh.

³³Leeka lee xaa le xaa mod tub xaa nanont, kwaanzee nanalit ngunaab xaa kwent lo xaa. Nanzaat xaa kwent cheen re xinn xaa, nel gut xaa xaa. Is. 53:7-8

³⁴Nu lee xaa Etiopía mnabdizh lo Lip, nu nzhé xaa: —¿Chu zné lu lo na? ¿Cho xaa nzaa xaa ne kwent, che leeka lee xaaya o stub xaa kazet xaa?

³⁵Zee lee Lip mkeb nzhé lo xaa: —Chay mzaa kwent cheen Jesús. Nu snee mzelo xaa mzaa xaa Kwent Chul cheen Jesús lo xaa Etiopía.