LOS HECHOS 8:10-35

¹⁰Tachun ni lapanakni lajꞌay kun lakstꞌuniy si talhakapuꞌanil yu ixnajun ni yucha. Si ixtanajun: —Yu aniy lapanaki yucha va yu la ay ixtapꞌasta Dios junita.

¹¹Ox ixtamakaniy kuenta yu ixnajun porke maqancha ixtꞌajun jalakmakanun por ixjachavanti yu ixmakay.

¹²Pero tejkan chinchal ni Felipe va jalakjunil tacha lhachimoꞌonun ni Dios y lhichivinil ni Jesús yu ixtanajunta kamalaqachayaꞌ Dios ex talhakapuꞌal y taꞌaqchajꞌaul joꞌakna kun xanatin.

¹³Ex chuncha ni Simón vachuꞌ lhakapuꞌal y aqchajꞌaul. Yucha tus vak kꞌatsal tejkan laqtsꞌil yu lajꞌay axtoqnuꞌ yu ixmakay ni Felipe yu ixmasuy ixtapꞌasta ni Dios y xlhiyucha aqtayl tꞌatiꞌukxuntayay ni yucha.

¹⁴Ex ancha Jerusalén yu jamalaqachal ni Jesús va takꞌatsal va ixtalhakapuꞌanta ixchivinti Dios lati yu tavilananchal Samaria. Ex chuncha tamalaqachal ni Pedro ali Juan para kataꞌal ancha Samaria.

¹⁵Tejkan tachaꞌal va taskꞌinil Dios para katalaqtanuꞌol ni Espíritu Santo ni lapanakni yu ancha ixtavilanal.

¹⁶Ni yuꞌuncha ixtaꞌaqchajꞌajutacha la ixtaqaꞌuti ni Jesús, pero jantukaꞌ ixtalaqtanuy ni Espíritu Santo.

¹⁷Ex ni Pedro ali Juan tamoqslanil ixmakakꞌan yu ixtalhakapuꞌanta y va chuncha talaqtanuꞌol ni Espíritu Santo.

¹⁸Ni Simón yu jachavanaꞌ jalaqtsꞌil ni ixtalaqtanuy ni Espíritu Santo tejkan ixjamoqslanikan ni ixmakakꞌan, ex ixjalaqxtaqniputun tumin.

¹⁹Va lakjunil ni Pedro ali Juan: —Kilaxtaqniu vachuꞌ ni aniy tapꞌasta para kalaqtanul ni Espíritu Santo mas va taꞌayucha yu kakmoqslanil kimakaꞌ.

²⁰Ex ni Pedro junil: —Ni uxintꞌi kapiticha laqnin kun mintumin incha lhakꞌapꞌupꞌin ni lay lhiꞌikan tumin yu xtaꞌa ni Dios.

²¹Ni uxintꞌi jantu paxtoqniyan kalaꞌaꞌitꞌi yu xtaꞌa Dios, la melhanuti va jantu ox katꞌiꞌuntꞌay kun Dios.

²²Chavay kꞌamapꞌaxacha mijatapastakꞌati, kamakꞌauntꞌijlacha milaktuꞌunti. Kꞌatꞌapꞌayninin Dios, yucha kꞌatsay incha kamalaqmixiniyan yu pꞌastꞌakꞌa la melhanuti.

²³Kitꞌin ijkꞌatsay ni uxintꞌi ayaj akchꞌipꞌin y vachuꞌ milaktuꞌunti ox laqalhumanitan la mijatapastakꞌati.

²⁴Ex chuncha ni Simón jaqaltaychoqol va lakjunil: —Kꞌatꞌapꞌayninitꞌik ni jalhachimoꞌonuꞌ Dios por kitꞌin para jantu chun kaktapasal tacha kilajunau.

²⁵Ex chuncha ni Pedro ali Juan jalaqputeꞌenil ni lapanakni yu talaqtsꞌil yu makal ni Jesús y vachuꞌ talaqputeꞌenil ixchivinti Dios. Astan tachꞌapachoqolcha ixlakatinkꞌan para kataꞌanchoqolcha laka putaulan Jerusalén. Ni lakatin taꞌan ixtapuꞌanta si ixtatapasatijlay laka putaulanaxna xaꞌestado Samaria y ancha ixtalaqputeꞌey yu lay katapulaqtaxtul ni lapanakni.

²⁶Ex chuncha taval qayntaun ixmayul Dios laqchaꞌal ni Felipe, va junil: —Kaꞌostꞌaycha, kapiticha taꞌan ixlhisur ni Jerusalén. Kꞌachꞌapꞌa xatin yu puꞌankan laka putaulan Gaza yu tapasay ni lakatꞌun taꞌan jantu matichun kataulal.

²⁷Ex chuncha ni Felipe ostayal, va alcha. Ancha lakatin paxtoqlhi qayntaun lapanaki. Yucha va qayntaun yu ay lapanaki yu machaqaꞌ xalakatꞌun Etiopía taꞌan ixlhachimoꞌonun qayntaun xanati yu ixjunkan Kandace. Ni anchanu lapanaki yu paxtoqlhi ni Felipe va yucha yu ixlhistakniꞌojota tachun ixtumin ni Kandace. Yucha kilal laka putaulan Jerusalén para katoꞌoyal ni Dios.

²⁸Chuncha va ixꞌanchoqotacha la ixtꞌun. Ex chuncha taꞌan ixpuꞌanta la ixkarro yu taxaqalhaꞌan jukin ancha ixtꞌajun puteꞌeniꞌ ni jalhiki yu tsꞌoqlhi ni Isaías yu maqancha ixlaqputeꞌey ixchivinti Dios.

²⁹Ex ni Espíritu Santo junil ni Felipe: —Kapiticha, katꞌematꞌi ni anu karro.

³⁰Tejkan talakanunil ni Felipe, qasmaknil ixchivinti taꞌan ixtꞌajun puteꞌeniꞌ ni jalhiki yu tsꞌoqlhi Isaías yu maqancha ixlaqputeꞌey ixchivinti Dios. Ex ni Felipe lhisakmil: —¿Malaꞌasiy yu tꞌaꞌun puteꞌeniꞌ?

³¹Ex ni anu ay lapanaki va naul: —¿Tas kakpumalaqasilcha incha jantu alin matichun yu lay kimasunil? Ex chuncha lhijunkal ni Felipe kataukꞌalcha y katꞌataulal.

³²Yu ixtꞌajun puteꞌeniꞌ va inchine istsꞌoqkanta: Qayntaun lapanaki lhaꞌankal ixmaqnika tacha laqataun borrego. Va tacha taun sasꞌatꞌa borrego yu jantu tꞌasay tejkan makasikkan, yucha vachuꞌ jantu tsij najun.

³³Ni lapanakni jantu katalhiꞌaynlhi, yuꞌuncha tamukꞌanil laqtaqal y jantu matichun kaꞌaqtayjul. Va niman tamaqnil, xlhiyucha jantucha lay lhichivinkan ixlapanakni.

³⁴Ex ni ay lapanaki va lhisakmil ni Felipe, va junil: —Kitꞌin kskꞌiniyan taun jatapayniti ni uxintꞌi, kiꞌun tasꞌayucha lapanaki lhichiviniy yu tsꞌoqlhi ni aniy jalhiki. ¿Va lhichivinkan xꞌaman yu tsꞌoqlhi u va lhichiviniy aqayntaun lapanaki?

³⁵Ex chuncha ni Felipe aqtaylcha laqputeꞌeniy tacha naunputun ixchivinti Dios yu ixtꞌajun puteꞌeniꞌ y vachuꞌ laqputeꞌenil ni ox chivinti yu lhichiviniy Jesucristo.