Gutpela Sindaun 7:1-18

¹Pikinini, yu mas holim strong tok bilong mi na putim long tingting bilong yu.

²Sapos yu bihainim gut tok bilong mi, bai yu stap gut. Lukautim gut tok bilong mi, olsem yu save lukautim ai bilong yu yet.

³Yu mas putim tok bilong mi long tingting bilong yu na em bai i stap oltaim, olsem ring i stap oltaim long pinga bilong yu.

⁴Gutpela tingting na save i mas i stap wantaim yu oltaim, olsem susa tru bilong yu, o olsem gutpela pren bilong yu.

⁵Na sapos meri bilong narapela man i laik grisim yu long slip wantaim em, orait gutpela tingting bai i banisim yu na yu no inap bihainim tok bilong en.

⁶Wanpela de mi sanap long windo bilong haus bilong mi na mi lukluk i go long rot.

⁷Na mi lukim ol yangpela man i wokabaut i go i kam long rot. Ol i no gat gutpela tingting na save. Tasol wanpela em i kranki olgeta.

⁸Dispela yangpela man i wokabaut klostu long haus bilong wanpela meri nogut.

⁹San i go daun pinis na klostu tudak i laik kamap.

¹⁰Dispela meri i putim bilas olsem meri bilong rot, na em i ting long grisim dispela man. Olsem na meri i go bungim em.

¹¹Dispela meri i hambakmeri tru na i no save sindaun gut long haus.

¹²Oltaim em i save raun raun long rot na long maket, bilong painim man.

¹³Mi lukim dispela meri i holimpas dispela yangpela man na givim kis long em. Na meri i lukluk stret long ai bilong en na i tok olsem,

¹⁴“Nau mi bin mekim wanpela ofa, na hap abus bilong dispela ofa i stap long haus bilong mi.

¹⁵Olsem na mi lusim haus bilong mi na mi kam bilong painim yu. Nau mi lukim yu pinis.

¹⁶Na tu mi bin redim gutpela bet long haus bilong mi. Mi bin putim ol naispela sitbet i gat kala long dispela bet. Ol dispela sitbet i kam long Isip.

¹⁷Na mi bin kapsaitim kain kain paura i gat gutpela smel long dispela bet.

¹⁸Yu kam wantaim mi, na bai mitupela i wok long pilai na amamas i go inap long tulait.