Gutpela Sindaun 4:7-17

⁷Nambawan samting yu mas kisim, em i gutpela tingting. Tru, yu ken kisim planti arapela samting, tasol gutpela tingting em i nambawan tru.

⁸Yu mas laikim gutpela tingting na holim strong, na em bai i givim biknem long yu.

⁹Em i kamap olsem naispela bilas long het bilong yu na olsem gutpela hat king.”

¹⁰Pikinini, yu mas harim gut tok bilong mi, na bai yu stap longpela taim long graun.

¹¹Mi save skulim yu long bihainim gutpela tingting na mi save stiaim yu long wokabaut long stretpela rot.

¹²Sapos yu wokabaut long dispela rot, bai i no gat wanpela samting i pasim yu, na bai yu no inap pundaun.

¹³Oltaim yu mas holimpas dispela gutpela tok bilong mi. Em i olsem as bilong laip bilong yu, olsem na yu mas lukautim gut.

¹⁴Yu no ken wokabaut long rot bilong ol man nogut, na yu no ken bihainim pasin bilong ol.

¹⁵Yu mas abrusim tru dispela rot na yu mas i go i stap longwe long en.

¹⁶Sapos ol man nogut i no bin mekim samting nogut yet, orait ol i no inap slip. Sapos ol i mekim nogut long ol arapela man pastaim, orait ol inap slip gut.

¹⁷Pasin nogut na pasin bilong bagarapim ol arapela man em i olsem kaikai na dring bilong ol.