Gutpela Sindaun 24:17-33

¹⁷Yu no ken amamas long taim yu lukim birua bilong yu i painim taim nogut. Na sapos em i sutim lek long wanpela samting na i laik pundaun, orait yu no ken lap.

¹⁸Nogut Bikpela i lukim yu i amamas na bai em i bel nogut long yu na em i no kros moa long dispela birua.

¹⁹Yu no ken wari tumas long pasin bilong ol man bilong mekim pasin nogut. Nogut tingting bilong yu i bagarap. Na tu yu no ken laikim tumas pasin bilong ol.

²⁰Ol dispela man i no inap painim gutpela taim. Nogat. Bai ol i dai olsem lam i dai.

²¹Pikinini bilong mi, yu mas aninit long Bikpela na yu mas aninit long king. Yu mas i stap longwe long ol manmeri i save bikhet long Bikpela na long king.

²²Kain manmeri olsem ol inap long painim bagarap wantu. Yumi no save wanem kain hevi Bikpela na king inap givim long ol.

²³Ol man i gat gutpela tingting i bin autim dispela tok tu. Long taim ol man i kam long kot, i no stret sapos jas i helpim sampela na daunim sampela.

²⁴Sapos wanpela man i mekim rong na ol i kotim em, tasol jas i larim em i go nating, orait ol manmeri bilong olgeta kantri bai i no laikim tru dispela jas na bai ol i tok nogut long em.

²⁵Tasol sapos jas i tok long ol i mas mekim save long man i gat asua, orait bai jas i stap gut na kisim planti gutpela samting.

²⁶Sapos man i bekim stretpela tok long yu, em i pren tru bilong yu.

²⁷Pastaim yu mas stretim graun bilong yu na wokim ol gaden, na bihain yu ken wokim haus.

²⁸Sapos yu kamap witnes long kot, yu no ken tok giaman na daunim nating man i no bin mekim rong.

²⁹Yu no ken tok olsem, “Nau bai mi bekim pasin nogut bilong en. Bai mi mekim wankain pasin long em olsem em i bin mekim long mi.”

³⁰Mi raun na mi lukim gaden bilong wanpela man. Dispela man i no gat gutpela tingting na em i lesman.

³¹Rop i gat nil na gras nogut i karamapim dispela gaden. Na banis ston i bin raunim gaden, em i pundaun pinis.

³²Mi lukim dispela gaden na mi tingting planti na mi kisim gutpela save.

³³Ol lesman i save tok, “Maski, mipela i laik slip liklik moa. Mipela i laik malolo liklik taim tasol na bai mipela i kirap.”