Gutpela Sindaun 17:21-28

²¹Sapos pikinini man i no gat gutpela tingting, bai papa bilong en i bel hevi tru.

²²Pasin bilong belgut i olsem marasin bilong mekim man i stap gut. Tasol sapos tingting bilong man i bagarap, dispela i olsem sik nogut i wok long bagarapim ol bun bilong en.

²³Taim man bilong mekim pasin nogut em i gat wok long kot, orait sapos ol man i laik givim mani long em bilong grisim em long paulim kot, em bai i amamas tru long kisim dispela mani na paulim kot.

²⁴Man i gat save, em i save wok strong long kisim gutpela na stretpela tingting. Tasol man i no gat gutpela tingting, em i wok strong long kisim ol kain kain samting nabaut.

²⁵Sapos man i bihainim longlong pasin, bai papamama bilong en i bel nogut na bel hevi tru.

²⁶I no stret sapos kot i tok, man i no gat rong em i mas baim kot. Na sapos ol bikman i mekim stretpela pasin, orait i no stret long givim kanda long ol.

²⁷Man i gat planti save, em i no save toktok planti. Na man i gat gutpela tingting, em i no save belhat kwik.

²⁸Olsem na sapos man i no gat gutpela tingting, em i pasim maus, orait ol man bai i ting em i gat gutpela tingting na save.