Golle Nelaaɓe 8:15-39

¹⁵Nde ɓeen njottinoo ndee, nduwanii ɓe yalla eɓe keɓa Ruuhu Ceniiɗo,

¹⁶sabi Ruuhu Ceniiɗo jippaaki e fay gooto e maɓɓe tafon. Saabe Iisaa Joomiraaɗo oo tan ɓe mbatisiraa.

¹⁷Nden Piyeer e Yuhanna pawi juuɗe muuɗum'en dow maɓɓe so ɓe keɓi Ruuhu Ceniiɗo.

¹⁸Nde Simon yii Piyeer e Yuhanna ana pawi juuɗe muuɗum'en dow maɓɓe ana ndokka ɓe Ruuhu Ceniiɗo ndee, waddani ɓe kaalisi,

¹⁹wii: —Ndokkee kam miin duu ɗeen baawɗe yalla mo paw-mi juuɗe am e dow muuɗum fuu ana heɓa Ruuhu Ceniiɗo.

²⁰Nii Piyeer jaabii mo, wii: —Yo Laamɗo halke, aan e kaalisi maa, sabi a miilii dokke Laamɗo ana coottitiree kaalisi!

²¹A walaa geɗal, a walaa yolannde e ley haala kaa, sabi ɓernde maa fooccitanaaki Laamɗo.

²²Tuubu, iw e bonannda maa oo, ɲaago-ɗaa Joomiraaɗo yaafe ko miilataa koo.

²³Sabi mi yii ma a ɓaleejo yonki, bonannda maa jaalike ma.

²⁴Simon jaabii, wii: —Ɲaaganee kam Joomiraaɗo pati fay huunde e ko mbii-ɗon koo hewtoo kam.

²⁵Caggal ko ɓe ceettii so ɓe mbaajii konngol Joomiraaɗo ngol koo, Piyeer e Yuhanna mbirfitii Urusaliima. E laawol ngol, ɓe mbaajii Kabaaru Lobbo oo e geelle Samariya keewɗe.

²⁶Malaa'ika Joomiraaɗo wii Filipa: —Imma, yaaru ɓaleeri, laawol iwrungol Urusaliima so ana fa'i Gaaja, kanngol ngol jeewnugol.

²⁷O immii, o yehi. Nden o tawi gorko Ecopiyanke, howruujo kaananke debbo Ecopii biyeteeɗo Kandaake, yehiino Urusaliima juuroyaade. Kanko haybata beembal jawdi kaananke debbo oo.

²⁸Nde o wirfitinoo ndee, omo jooɗii e wotoro makko, omo jannga ley dewtere annabi Esaaya.

²⁹Ruuhu wii Filipa: —Ɓatta, sawnda wotoro oo.

³⁰Filipa dogi hewtii mo, nani omo jannga dewtere annabi Esaaya, wii mo: —Aɗa faama ko njanngataa koo naa?

³¹Gorko oo jaabii, wii: —Hono paamiran-mi so fay gooto firritanaali kam? O ndaardi Filipa ŋabba jooddoo e makko.

³²Ɗee aayaaje o janngannoo e dewtere ndee: «O naɓiraa hono no mbaalu kirsoyteeɗo nii. E no njawdiri deƴƴirta yeeso kesoowo ɗum nii, hono non o deƴƴiri.

³³Leyɗinkinaare makko bonni sareede makko. Homo waawi jantaade janta iwdi makko? Sabi o mursinanaama yonki makko ga aduna gaa.»

³⁴Howruujo oo wii Filipa: —Miɗo ndaarde, haalanam homo annabaajo oo haalata haala muuɗum, hoore muuɗum naa goɗɗo?

³⁵Non Filipa jaabii, ƴeewi binndi ɗii, waajii mo Kabaaru Lobbo haala Iisaa.

³⁶Eɓe njokki laawol maɓɓe ngol faa ɓe njii ndiyam. Howruujo oo wii: —Ndiyam annii! Ko haɗata kam looteede lootogal batisima?

³⁸O yamiri wotoro oo daroo. Ɓe ɗiɗon fuu ɓe njippii, ɓe ndegii e ndiyam ɗam. Filipa batisi mo.

³⁹Nde ɓe ƴeentunoo ndiyam ɗam ndee, Ruuhu Joomiraaɗo diwtii Filipa. Howruujo oo yiitaali mo kasen, jokkiri laawol muuɗum seyo.