Hechos 8:15-39

¹⁵Chärirnam, tse apostolcuna Diosman mañacuyarqan tse creyicoqcuna Santu Espirituta chasquiyänanpaq.

¹⁶Porqui manaran ni meqanman Santu Espiritu urämorqanraqtsu; sinoqa Teyta Jesusman creyicushqa carllam, bautisacushqa cayarqan.

¹⁷Tsemi Pedruwan Juan tse creyicoqcunaman maquincunata churayaptin, Santu Espirituta chasquiriyarqan.

¹⁸Bruju Simonnam tse creyicoqcunaman apostolcuna maquincunata churayaptin, Santu Espirituyoq ticrareqta riquecur, qelleta pagueta munarqan apostolcunata,

¹⁹queno nishpa: —Tse poderta rantiquecalläyämë, noqapis maquïta pimanpis churaptï, tsenolla Santu Espirituyoq ticrariyänanpaq.

²⁰Tsenam Pedru queno nerqan: —Diospa qarenin poderta rantita munanqequirecurmi, qelleniquiwan ishquequi infiernuman ewayanqui.

²¹Quecunaqa manam qampaqnotsu. Porqui shonqiquicho mana alli yarpanqequim, Diospaqqa melanepaq.

²²Antis tse mana alli yarpanqequita qonqequï; y Diosta rogacurnin, mañaquï itsapis perdonecushunquiman shonqiquicho tse mana alli pensanqequita.

²³Porqui embidiosu car allapa colerawan bochornashqatam y mana allicunapa munenincho caquicaqtam cäyipëcaq —nishpa.

²⁴Tsenam bruju Simon queno nerqan: —Tsepenqa Diosman noqalläpaq mañaquecalläyämï, niyämanqequino mana imapis pasallämänanpaq —nishpa.

²⁵Pedruwan Juan Diospaq tsecho willapäcur yachatsicurirnam, Jerusalenman cuticuyarqan. Tse cuticurnam Samaria marcacunapa pasarnin, Jesuspa alli willaquininta willacur willacur eucuyarqan.

²⁶Tsecuna pasacushqanchonam Dios cachashqan anjel Felipita queno nerqan: —Felipi, canan ewë sur ladupa, Jerusalenpita Gaza marcaman ewaq nänipa. Tse näneqa tsunyaqcunapam pasan.

²⁷Tse öram Felipi sharcur eucorqan; nänichonam taripärerqan Etiopia nasionpita nunata. Pëqa carqan tse nasioncho reina Candacepa presisaq tesorerunmi. Tse nunam Jerusalenman ewashqa carqan Dios adoraq.

²⁸Pemi Jerusalenpita marcanman cutiquicar caretancho tëcarnin, leyicarqan Diospa profetan Isaias escribishqan libruta.

²⁹Santu Espiritunam Felipita queno nerqan: —Felipi, taqe caretayoq nunaman witï, pewan juntu eucuyänequipaq —nishpa.

³⁰Tsenam Felipi tse Etiopia nasionpeq nunaman mas witïcur, wiyecorqan Diospa profetan Isaias escribishqan libruta leyicaqta. Tsenam queno taporqan: —Tëte, ¿tse leyenqequita cäyinquicu? —nishpa.

³¹Tsenam queno yasquerqan: —¿Imanoparaq cäyishaq, pipis mana cäyicatsimaptin! —nishpa. Nirirnam, Felipita rogarqan, caretanman lloqarcur, ladunman täcurinanpaq.

³²Tse nuna Diospa palabranta leyicanqanqa quenomi carqan: “Imeca üshata wanutsiyänanpaq, camalman apaqnomi apayarqan wanutsiyänanpaq. Rutuyaptin üsha mana waqaqnomi, upälla wiyaräcorqan.

³³Allqutsashqam carqan; justisiapis pepaqqa manam carqantsu. Que patsacho caweninpitam wanuratsiyarqan; y mananam mireninpis carqannatsu.”

³⁴Leyir usharirnam, tse nuna taporqan Felipita queno: —Ama acseqa quëtsu, cäyicatsillämë. ¿Pipaqtaq Diospa une profetan tseno escriberqan? ¿Quiquinpaqcu, o juc nunapaqcu? —nishpa.

³⁵Tsenam leyenqanpita qallecur tse Etiopia nunata Felipi shumaq cäyitserqan Teyta Jesuspaq alli willaquicunata.

³⁶Tseno ewarëcarnam, chäriyarqan yacu canqan sitiuman. Tse Etiopia nunanam Felipita queno nerqan: —Quechomi yacu can. ¿Manacu canan juclla bautisecallämanquiman? —nishpa.

³⁷˻Tsenam Felipi queno yasquerqan: —Teyta Jesucristuman rasonpa llapan shonqiquiwan creyicuptiqueqa, allim canqa —nir. Tse nunanam queno nerqan: —Aumi, noqa creyïmi Teyta Jesucristu Diospa tsurin cashqanta —nir.˼

³⁸Tseno nirirnam, tse nuna caretanta päraratsiptin, ishcan yarpuriyarqan yacu caqman. Tsechonam Felipi bautisarerqan.

³⁹Yacupita yarquriyaptinnam, Diospa Santu Espiritun Felipita juclla apacorqan. Tsenam tse etiope nuna manana Felipita ricarqannatsu; peru allapa cushishqam eucorqan.