Godigo Nogi Ugwaba Sabo Tęąbi Po Wabo Buku Dabe 92:8-15

⁸Magi baso meni, Genuai Bidi, naga digi te sesemane king bidada peyu, bidada paibao.

⁹Dago koneai, te nageba boi bidi ebo bidi dabe te augwali isaibao, tama nago te dwai sę ebo bidi dabe aiyaba elaluaibao.

¹⁰Nago enaba genuai bomo mawai, te uni bulmakau omaigo bomo tiwai mawai. Nago enaba wiegi yai sę ebaso, tama ena wiegi yai pemene mu ebo dao.

¹¹Eno te ena boi bidi dabe dolobo sulama, tama eno te dwai bidi dabego gela wabo odali.

¹²Te doloba pai kolesaga ebo we bidi dabe te wiegi yai pedalu, te nigo wiegi yai du walubo tiwai yaibao, tama te genuai holama, te Lebanonde te wiegi yai ni sida dabe tiwai yaibao.

¹³Augwali te Genuai Bidigo bede bulai ni dabe tiwai yaibao. Augwali te dena Godigo be tomode te wiegi yai mu pedalubo tiwai dao.

¹⁴Te augwali monu dabe pedalubo sogo, te augwa nai du me waludaibao. Augwali te bomo elalu, tama augwali me sasia pabeo. Te augwa yabe te ni yabe gesi sogo elalubo tiwai sesemane elaluaibao.

¹⁵Te kolesaga augwaligo te we bidi augwaliba ola mabo dao, Genuai Bidi te mu doloba pai dao. Agai te ena seselalubo bomo elalu, tama agade dwai sę ebo me elalubeo. Mu menio.