Godigo Nogi Ugwaba Sabo Tęąbi Po Wabo Buku Dabe 69:23-35

²³Te augwali gedu hulia somainu elama, te augwaligo ma tonono yainu ebaso, te usu munu ma egobeo. Te augwali tudi dili dolobaso da, te augwali bomo elama dolalubaso, te usu me egobeo.

²⁴Nago augwaliba te wado umabo mu eyu, tama augwaliba dwai dene mao. Tama nago haliga sębęgo te augwali selama, tama augwali hagamainu yao.

²⁵Te augwali bidalubo pesage te olo elalumainu elama, tama nago augwali me deli te bede bidibo ula dali bidimainu me elamuo.

²⁶Te bidi mebabolo nago hasiabolo te augwa yali dwai sę wei ponani bidi dabe, te dwai sę ebo bidi dabego augwaliba dwai dene mabo sę idubao. Nago te bidi meba tigiwali togolama, te augwaliba dene mani bidi dabe, tama te dwai sę ebo bidi dabego posobo po weyu, tama augwaliba sęgę mayu ebo dao.

²⁷Nago te dwai sę ebo bidi dabego dwai sęde te homu kone ebo me gegeda paligio. Tama nago te naga hani tomoba asomainu me igio.

²⁸Nago augwali nogi te bidabo ula elalubo bukude elalubo nogi sela sąyao. Tama nago te augwali nogi te doloba pai we bidi dabego nogi dali elalumainu me elamu dao.

²⁹Tiali goli, ena te genuai sęgę me dene tolali. God, nago ena ma selama, tama ena usu ma ilao.

³⁰Te eno tęąbi weyu, tama God nogi ugwaba sai, tama te eno agaba usu da po weyu, tama agai genuai nogide po hanilama pusaibao.

³¹Tama Genuai Bidigo te kolesaga wei mu ebao. Agai te bulmakaugo ofa ebo te wei eyu, godolo me ebeo.

³²Te sęgę tolali we bidi dabe augwaligo te sulama, tama wiegi yai pemene yaibao. Tama te Godiba lotu wabo we bidi dabe, augwaligo te bomo ma saibao.

³³Genuai Bidigo te doado bage sǫą pabo we bidi dabego gedu haluasa po wabo odali, tama agai te aga we bidi dabe te kalabuside bidibo bage te homu kone ebo me tagalugobeo.

³⁴Dagalu dali, tǫ dali, tamu ąi, me te tamu węde elalubo tigidali sųgų dabe, dage tigidaligo te God nogi ugwaba sao.

³⁵Magi baso meni, Godigo te Saion we bidi dabe te boi bidi dabego nogode ma dobola selama, tama agai te Juda dabego taun ma nigaibao. Agai tama tiyu, tama te Godigo hani bage augwa te taunde bugagia bidiyu, tama te tǫ tigidali somainu yaibao.