Godigo Nogi Ugwaba Sabo Tęąbi Po Wabo Buku Dabe 55:8-22

⁸“Te ena asesa bola peyu, tama geme duala sigi pelama, bidabo pesage me deli gegelama, bidainu yaibao, tama ena te bomai walide me tulubagede geme duala selama, bidaibao,” wali.

⁹Eno suali, te bidi dabego te taun tomode hwįbo suali. Tama tialima, Genuai Bidi, nago augwaligo po kone tuą palumainu elama, tama augwali mu silimainogo yao.

¹⁰Te giligade me hulide augwali te taun bagulali obo dąįde bilalu ebo dao. Tama te taun we bidi dabego te dwai sęgę sabo kolesaga ebo sę hauwa eyu ebo dao.

¹¹Te taun pedai tigidali badu te bidi dabego gasa bidi dabe me, doado bage dabe me doloyu ebao. Te sunumi sesegede, me te bidi sisinibo pesagede, te bidi dabego te gasa bidi dabe aiyaba elalu ebao, tama augwali tibo po ola mayu, te augwaligo doado bage sainu ebo dao.

¹²Te boi bidi me deligo po dwai enabolo wagi sogo da, tagalao, eno te agai wabo pogo sęgę bugagia toligi da. Ma, ena wei isiąwai bidigo enaba kęnę po wagi sogo da, teda ena agade geme duala sabo usugi da.

¹³Tiali goli, menio. Te nage naga dao. Nage te eno polalubo abagi da, tama nage te eno hai namu mu da. Nago digi te dwai po wabo kolesaga ebo dao.

¹⁴Polobadu da si hodobo biliyu, tama po dali bugagia miyu, ela bilai, tama te Godigo moni lotu be tempelba te gasa bidi dabe dali peyu yali.

¹⁵Eno homugo te eno boi bidi dabego haligade me, te augwa bede me, te dwai kolesagago pągąnaluao. Tialima, eno homugo te augwali polo isimainu homu yai. Te augwali bidibo elalubadi, tama augwali te isibo bidi dabego pesageba pomainu ebao.

¹⁶Tiali goli, te Godigo ena tau somainu te gedu haluasa po obao. Tama aga digi ena ma saibao.

¹⁷Te kigamude me, te genuai giliga nanobode me, te hulide me, te sęgę dabego ena dolobaso, tama eno agaba gela wabo da. Tama agai eno gedu haluasa po odoyu yaibao.

¹⁸Te bidi hauwago ena dali hwįbao. Tiali goli, ena me dolobeo. Magi baso meni, Godigo ena tonaluyu, tama ena ma odasa asaibao.

¹⁹Polobadu mu God king bidali, tama megi me aga te king bidibao. Te aga digi eno gedu haluasa po wabo odama, tama agai te boi bidi dabe te hwįbode aiyaba elaluaibao. Augwali te agade wi me isąwai, tama tiyu, augwaligo te dwai sę ebo kolesaga tagalogobeo.

²⁰Eno te abagigo agai te aga abagi dabe dali digi hwįani. Tama agai te augwali dali polobadu te dąų walali bomai po bolalio.

²¹Te pedauwalide agai pusai po wali, tiali goli te haligade agai te boi bidi enade elaluali. Te agai pogo dago tabi nagame ilama bidibao. Tiali goli, te po te bobobage bainat hwą tiwai mu poa pelama, tama da togobao.

²²Tigidali sęgę nago tolobao, te nago Genuai Bidiba mao. Te agai tolama, tama te agai nage dąų walaibao. Te agai te magi nai me deligo te doloba pai bidi dabe dolomainu me iligobeo.