SALMOS 55:8-22

⁸Nimoisihuiltisquía para nicholos huan nimotlatis tlen nochi ni tlaijiyohuilistli tlen hualajtoc nopani. Eltoc queja se hueyi ajacatl hualajtoc tlen tlamitlaxolehua.

⁹Toteco, xiquintzontlamilti nocualancaitacahua. Xijchihua ma mocuapoloca inijuanti ininseltitzi quema camatij. Na niquitztoc para nochi tlatehuíaj campa hueli ipan ni moaltepe.

¹⁰Tlayohua huan tonaya yonque itztoque tosoldados tlen quiyahualojtinemij ni altepetl ipan nopa tepamitl para quimocuitlahuise tlen tocualancaitacahua, inijuanti tlen nica ehuani ininseltitzi motehuíaj se ica seyoc ipan ni altepetl.

¹¹Tlatlajco nopa altepetl quichihuaj miyac tlamantli tlen ax cuali, huan ax onca tlatlepanitacayotl. Ipan tianquis huan campa hueli momictíaj, tlaxtequij huan tlacajcayahuaj.

¹²Ax elqui se nocualancaitaca tlen nechcajcayajqui, pampa intla queja nopa eltosquía, huajca niquijiyohuijtosquía. O hueltosquía nimotlatis huan nicholos.

¹³Pero elqui se tlen nemiyaya nohuaya, se tlen nechyacanayaya huan tlen nonelhuampo.

¹⁴Quena, elqui yajaya tlen sentic timopohuiliyayaj nopa tlamantli tlen tijpixtoyaj ipan toyolo, huan yejyectzi timocamahuiyayaj quema san sejco tiyohuiyayaj ipan mochaj, Toteco Dios.

¹⁵Ma tlalochmiquica nochi nocualancaitacahua huan ma yaca hasta mictla quema noja yoltoque, pampa ipan ininchaj huan ipan ininyolo san onca tlajtlacoli.

¹⁶Pero na san nijtzajtzilis Toteco Dios para ma nechmaquixti. Huan quena, temachtli yajaya nechmaquixtis.

¹⁷Na nimomaijtos ica ijnaloc, ica tlajco tona huan ica tiotlac. Huan yajaya nechtlacaquilis huan nechnanquilis.

¹⁸Ipan tlatehuijcayotl yajaya nechmanahuis, yonque tlahuel miyac nocualancaitacahua nechtehuise chicahuac.

¹⁹Toteco Dios tlen ipa itztoc huan tlanahuatijtoc hasta tlen huejcajquiya, yajaya nechtlacaquilis huan quintzontlamiltis. Pampa nocualancaitacahua ax quipatlaj ininyolis tlen fiero, niyon ax quitlepanitaj itlanahuatil.

²⁰Nopa tlacame tlen ax cuajcualme momatlalanaj huan quintehuíaj hasta ininhuampoyohua. Quiixpanoj nopa tlajtoli tlen quichihuaj ininhuaya sequinoc.

²¹Quitequihuíaj tlajtoli tlen nelyejyectzi huan yamanic queja mantequiya, pero ipan ininyolo san moilhuíaj quejatza tlatehuise. Nochi tlen quiijtohuaj eltoc alaxtic queja aceite, pero ixtacatzi teyolcocohuaj ica tlajtoli queja quema timotzontequis ica machete.

²²Nochi mocuesol xijcahua imaco TOTECO huan yajaya mitzmacas temachili. TOTECO ax quicahuas ma huetzi se tlen quitlepanita.