Gesami Hea:su 89:8-26

⁸Hina Gode Bagadedafa, bagadedafa Di agoai afae da hame gala. Hina Gode, Di da liligi huluanedafa amoma moloidafa ba:sa.

⁹Di da hano wayabo gasa bagade amo ouligisa. Di da hano ea gasa bagade gafulusu amo asabolesisa.

¹⁰Di da ohe bagadedafa, La:iha:be, amo Di gasa bagadedafa amoga fane dadalega:le salalu, amola Dia ha lai dunu hasalasi.

¹¹Hebene amo da Dia:, amola osobo bagade amola liligi huluane amo ganodini diala amo da Di fawane hahamoi.

¹²Di da ga (north) amola ga (south) amo hahamoi. Dabo goumi amola Hemone goumi da Dima nodone gesami hea:sa.

¹³Dia nimi da bagadedafa gala! Dia gasa da baligili bagadedafa!

¹⁴Dia Hinadafa hou da moloidafa hou, moloidafa fofada:su hou, asigi hou amola dafawaneyale dawa:su hou amo da:iya bugiba:le, Dia hamobe hou huluane da noga:le olelesa.

¹⁵Dunu ilia da Dima nodone gesami hea:beba:le, hahawane bagadedafa gala, amola ilia da Dia hadigi amola asigisu amo ganodini esala agoane hamosa!

¹⁶Bai ilia da yoga eso huluane Dima, Dia noga:idafa hou amoga nodone sia:nana.

¹⁷Di da ninima hasalasisu hou bagadedafa i. Dia asigidafa hou amoga Di da ninima hasalasisu i.

¹⁸Di, Hina Gode, Di fawane da ninia gaga:su dunu ilegei. Di, Isala:ili ilia Hadigidafa Gode da ninia hina bagade ninima i.

¹⁹Di, Hina Gode, Di da mae fisili noga:idafa hawa: hamosu dunu, esala ba:su ganodini ilima amane sia:i, “Na da mimogo dadi gagui dunuma fidima:ne ilegei dagoi. Na da Isala:ili fi dunu amoga ouligisu dunu ilegei.

²⁰Na da Na hawa: hamosu dunu Da:ibidi ea dialuma da:iya malei susuligi sogagala:lu, e hina bagade dunu hahamonesi.

²¹Na gasa da eso huluane e amola gilisili lalumu. Na nimi hou amoga e da gasa bagade heda:mu.

²²Ema ha lai dunu ilia da ema hasalimu da hamedei ba:mu, amola wadela:i hamosu dunu, ilia da e hame hasalasimu.

²³Na da ea ha lai dunu amo fane dadega:le fofasimu amola ema higale ba:be dunu amo huluane fane lelegemu.

²⁴Na da ema asigilalumu amola ema madelagimu. Na da ema eso huluane ea hasalasisu fawane hamonanoma:mu.

²⁵Na da ea hina bagade hou amo Medidela:inia hano wayabo bagade amogainini, Iufala:idisi hanoga alofele galesimu.

²⁶E da Nama amane sia:mu. “Di da na Ada amola na Gode, amola Di da na gesu amola na gaga:su.