Pesalem 89:8-26

⁸O Apômtau, lausiŋ undambêŋa nêŋ Anôtô, asa oc êtôm aôm. O Apômtau, aôm ŋaclai sec ma nêm biŋ ŋaŋêŋ kêkwa aôm auc.

⁹Aôm gôjam gôliŋ gwêc, taŋ kêgasim naŋ. Ŋadembom embe êkuc-êkuc, aôm oc ôŋgôm ŋatip êsa.

¹⁰Aôm gôjac gêŋsêga Rahab popoc jamuŋ-jamuŋgeŋ. Lêmam ŋajaŋa geseŋ nêm ŋacjo êliŋ-êliŋ

¹¹Aôm kôtu undambê to nom ŋatau. Aôm kôkêŋ nom samuc to gêŋ samob, taŋ gêjam nom tau auc naŋ.

¹²Aôm kôkêŋ gamêŋ musaŋgu-m to mula-mŋa. Lôc Tabor to Hermon ôliŋ kêpi kêtu aômnêm ŋaêŋa.

¹³Lêmam dambê ŋactêkwa sec. Lêmam ŋajaŋa to kôsuŋ nêm anôŋa sa.

¹⁴Biŋgêdêŋ to biŋ ŋaŋêŋ kêtu nêm lêpôŋ ŋanombaŋ. Têmtac gêwiŋ teŋgeŋŋa to biŋ ŋaŋêŋ gêc aôm laŋômnêmŋa.

¹⁵O Apômtau, aê aoc gêôc lau, taŋ laŋômanô ŋawê kêpô êsêac ma ôliŋ kêpi kêtu aômŋa naŋ.

¹⁶Êsêac tapi-tapigeŋ kêtu nêm ŋa ŋapaŋ. Ma sêjam lasê kêtu aômnêm biŋgêdêŋŋa.

¹⁷Gebe aôm kôtu êsêac waeŋ to ŋaclai ŋamôkê. Aômnêm moasiŋ kêwaka aêacma ŋaê sa e ŋapep.

¹⁸Gebe Apômtau kêtu aêacnêŋ lautuc ŋatau ma Israelnêŋ ŋac dabuŋ kêtu aêacnêŋ kiŋ nê ŋatau.

¹⁹Gêdêŋ gêmuŋgeŋ aôm gôwa nêm biŋ sa gêdêŋ nêm sakiŋwaga ŋaŋêŋ ŋa ŋakatu gebe “Aê kakêŋ sunsuŋ kiŋŋa gêdêŋ ŋactêkwa teŋ kêkuc ênam lau sa. Aa kakêŋ lêpôŋ kiŋŋa gêdêŋ ŋac, taŋ kajaliŋ sa aŋga lau nêŋ naŋ.

²⁰Aê katap ŋoc sakiŋwaga Dawid sa, gaeŋ oso eŋ ŋa ŋoc niptêkwi dabuŋ

²¹gebe lemoc êpuc eŋ tôŋ endeŋ tôŋgeŋ ma lemoc êkêŋ ŋaclai êndêŋ eŋ.

²²Nê ŋacjo ênsau êôc eŋ êtôm atom ma secwaga teŋ êku eŋ tulu atom.

²³Aê gabe janseŋ ênê ŋacjo popoc sênêc eŋ laŋônêmŋa ma janac êsêac, taŋ sêkêŋ kisa eŋ naŋ êndu.

²⁴Aêŋoc biŋ ŋaŋêŋ to têtac gêwiŋ teŋgeŋŋa êpuc eŋ tôŋ. Aêŋoc ŋaê oc êsuŋ ênê wae sa.

²⁵Aê jakêŋ ênê gôliŋ ŋamadiŋ aŋga gwêc ŋaluŋ e êndêŋ bu kapôêŋ Euprat.

²⁶Eŋ oc awa ênac aê gebe ‘Aêŋoc tamoc aôm, aôm kôtu ŋoc Anôtô to ŋoc moasiŋ ŋamôkê.’