Gesami Hea:su 89:21-34

²¹Na gasa da eso huluane e amola gilisili lalumu. Na nimi hou amoga e da gasa bagade heda:mu.

²²Ema ha lai dunu ilia da ema hasalimu da hamedei ba:mu, amola wadela:i hamosu dunu, ilia da e hame hasalasimu.

²³Na da ea ha lai dunu amo fane dadega:le fofasimu amola ema higale ba:be dunu amo huluane fane lelegemu.

²⁴Na da ema asigilalumu amola ema madelagimu. Na da ema eso huluane ea hasalasisu fawane hamonanoma:mu.

²⁵Na da ea hina bagade hou amo Medidela:inia hano wayabo bagade amogainini, Iufala:idisi hanoga alofele galesimu.

²⁶E da Nama amane sia:mu. “Di da na Ada amola na Gode, amola Di da na gesu amola na gaga:su.

²⁷Hina dunu bagohame amo ganodini, Na da ema Na magobo mano hamomu.

²⁸Na da Na hamomusa: ema ilegele sia:i da eso huluane dawa:i dialumu, amola Na da gousa:su ema ilegele sia:i da mae fisili amanewane dialumu.

²⁹Ea sosogo fi da mae mumugululi, muagado haisewe agoaiwane dialumu. Egaga fifi manebe da eso huluane hina bagade dunu hamonanusu hamomu.

³⁰“Be ilia da Na sema amo hame fa:no bobogesea, amola Na hamoma:ne sia:i amo hame hamosea,

³¹Ilia da Na sema amo hame nabasea, amola Na hamoma:ne sia:i amoma hame fa:no bobogesea,

³²amasea, Na da ilia wadela:i hou amo dabe ilima se bidi imunu. Ilia da giadofale hamoiba:le, Na da ilima se bidi iabeba:le, ilia da se naba hahaninanumu.

³³Be amomane Na da Da:ibidima asigi hou da hame yolesimu amola Na ema hamomusa: ilegele sia:i da hame yolesimu.

³⁴Na ema gousa:su da hame yolesimu, amola ema Na da hamomusa: ilegei amoga hodo afadafa Ni hame lalegamu.