Gesami Hea:su 37:20-31

²⁰Be wadela:i hamosu dunu ilia da bogogia:mu. Hina Godema ha lai dunu, ilia da mosoi gilidabe defele gilisa:i dagoi ba:mu. Mobi da hedolowane geale asi. amo defele ilia da hedolowane alalolesi dagoi ba:mu.

²¹Wadela:i hamosu dunu da fa:no bidi imunusa: liligi udigili laha be fa:no hame iaha. Be noga:i dunu da hahawane mae dawa:iwane iaha.

²²Nowa dunu ilia da Hina Gode Ea hahawane dogolegele ba:su galea, ilia da osobo bagade nana liligi defele amo lamu. Be nowa da Ea gagabui amoga aligi galea, ilia da gadili sefasi dagoi ba:mu.

²³Hina Gode da dunu Ea masa:ne dawa:i logo, amoga masa:ne noga:le ouligisa. Amola E da nowa dunu amo da E nodoma:ne hamosa, amo noga:le gaga:sa.

²⁴Ilia da dafasea, gebe gudu hame dialumu. Bai Hina Gode da ili wa:legadolesimu.

²⁵Na da waha da:i hamoi dagoi. Na da fifi misi helei. Be na da Hina Gode noga:i dunu afae fisiagai amo hamedafa ba:i. Amola noga:i dunu ea mano ha:i manu hameba:le, edegenanebe hamedafa ba:i.

²⁶Noga:i dunu da eso huluane udigiliwane enoma sagosa. Amola e da enoma liligi bu hi lamusa: hahawane iasisa. Amola ea mano da eno dunuma hahawane dogolegele hamosa.

²⁷Wadela:i hamonanu fisiagale, moloidafa hou hamoma. Amasea, digaga fifi manebe da eso huluane esalalalumu.

²⁸Bai Hina Gode da moloidafa hou amoma asigisa. Amola E da Ea dafawaneyale dawa:be dunu amo hame fisiagasa. E da mae fisili, ili gebewane gaga:lala. Be wadela:i hamosu dunu iligaga fifi manebe dunu da gadili sefasi dagoi ba:mu.

²⁹Moloidafa dunu ilia da osobo bagade nana liligi agoane amo lale, amola amo ganodini, eso huluane fifi lalalumu.

³⁰Noga:idafa dunu ea sia: da bagade dawa:su gala. Amola e da eso huluane moloidafa hou hamonana.

³¹E da ea Hina Gode Ea malasu sia: ea dogo ganodini dawa:i diala. Amola e da amo malasu nabawane hamonaneawane hamedafa yolesisa.