Gesami Hea:su 119:48-168

⁴⁸Na da Dia hamoma:ne sia:i amo gaguia gadosa, amola amoma hanasa. Na da Dia: hamoma:ne sia:i amo dadawa:lalumu.

⁴⁹Na da Dia hawa: hamosu dunu, amola Di da nama hahawane ilegele sia:beba:le, na da dafawane hamoma:beyale dawa:lusu lai dagoi. Amo ilegele sia:i bu dawa:ma.

⁵⁰Na se nabasu ganodini amolawane, na dogo da denesi. Bai Dia ilegele sia:i da nama fifi ahoanusu i dagoi.

⁵¹Hidale gasa fi dunu da eso huluane nama higale ba:sa. Be na Dia sema amo fa:no bobogebe hame yolesi.

⁵²Dia musa: hemonega fofada:su hou, na da dawa:lala. Hina Gode! Amo da na dogo denesisa.

⁵³Wadela:idafa dunu da Dia sema wadela:lesilalebe na ba:sea, na da ougi bagadewane ba:sa.

⁵⁴Na da osobo bagadega ode bagahame esalu. Be na da Dia sema olelema:ne, gesami hea:su hahamosa.

⁵⁵Hina Gode! Na da gasia Di fofagini dadawa:lala. Amola na da Dia sema dadawa:lala.

⁵⁶Na da Dia hamoma:ne sia:i nabawane hamobeba:le, hahawane bagade ba:sa.

⁵⁷Hina Gode! Na da Dima fawane hanai. Na da Dia sema fa:no bobogemusa: ilegele sia:sa.

⁵⁸Na Dima ha:giwane edegesa! Dia ilegele sia:i defele, na wadela:i hou gogolema:ne olofole, nama asigima.

⁵⁹Na da nina: hou abodele, Dia hamoma:ne sia:i amoma fa:no bobogemusa:, ilegele sia:sa.

⁶⁰Mae oualigili, na da hedolowane Dia hamoma:ne sia:i nabawane hamomusa: ahoa.

⁶¹Wadela:i hamosu dunu da na sa:ima:ne sanenesi. Be na da Dia sema hame gogolesa.

⁶²Gasi dogoa, na da nedigili, Dia moloidafa fofada:su hou amoma nodosa.

⁶³Na da dunu huluane ilia da Dima hawa: hamosa amola Dia sema nabawane hamosa, ili huluane na dogolegei na:iyado agoane ba:sa.

⁶⁴Hina Gode! Osobo bagade da Dia mae fisili asigidafa hou amoga nabai gala. Dia hamoma:ne sia:i, amo nama olelema.

⁶⁵Hina Gode! Di da Dia ilegele sia:i didili hamoi dagoi. Na da Dia hawa: hamosu dunu, amola Di da nama noga:le hamosa.

⁶⁶Nama bagade dawa:su amola hamoma:ne dawa:su ima. Bai na da Dia hamoma:ne sia:i amo dafawaneyale dawa:sa.

⁶⁷Musa:, Di da nama se bidi hame i amogalu, na da giadofale ahoasu. Be wali, na da Dia sia: amo nabawane hamosa.

⁶⁸Di da noga:idafa amola asigidafa. Dia hamoma:ne sia:i, amo nama olelema.

⁶⁹Hidale gasa fi dunu da na hou ogogole olelei. Be na da na dogo huluane amoga Dia hamoma:ne sia:i amo nabawane hamonana.

⁷⁰Ilia da asigi dawa:su hame gala. Be na da Dia sema hamonanebeba:le, hahawane ba:sa.

⁷¹Nama se bidi iasu da na hou noga:le fidi. Bai amoga na da Dia hamoma:ne sia:i noga:le dadawa: ahoasu.

⁷²Na ba:loba, sema amo Dia nama i, da osobo bagade su huluanedafa baligisa.

⁷³Hina Gode! Di da na hahamoi, amola Di da na gaga:lala. Na da Dia sema huluane dadawa:musa: asigi dawa:su noga:i nama ima.

⁷⁴Nowa dunu da Dima nodone dawa:sea, ilia da na ba:sea, nodomu. Bai na da Dia ilegele sia:su amo dafawaneyale dawa:sa.

⁷⁵Hina Gode! Dia fofada:su hou da moloidafa, amo na dawa:. Amola dia nama se bidi iasu, bai da Dia mae fisili asigidafa hou olelesa.

⁷⁶Dia mae fisili asigidafa hou da na dogo denesimu da defea. Bai na da Dia hawa: hamosu dunu, amola Di da amo nama defele hamoma:ne sia:i.

⁷⁷Na esaloma:ne, Dia nama asigima! Bai na da Dia sema hahawane hamonana.

⁷⁸Hidale gasa fibi dunu da ogogole nama diwaneya udidiba:le, ilia gogosiamu da defea. Be na da Dia hamoma:ne sia:su amo na asigi dawa:su ganodini dadawa:lalumu.

⁷⁹Nowa dunu da Dima nodosa amola Dia hamoma:ne sia:i noga:le dawa:sa, ilia da nama misunu da defea.

⁸⁰Na da Dia hamoma:ne sia:i noga:ledafa nabawane hamomu da defea. Amasea, na da hame hasalasiba:le, hame gogosiamu.

⁸¹Na da Dia gaga:su hou ba:musa: ouesalebeba:le, na da gufia:i dagoi. Na da Dia sia: fawane dafawaneyale dawa:sa.

⁸²Na da Dia ilegele sia:i hou doaga:ma:ne sosodo aligibiba:le, na da si sebe. Na da amane adole ba:sa, “Di da habogala na fidima:bela:?”

⁸³Na da ohe gadofoga waini hano disu ha:digi dagoi defele ba:sa. Be na da Dia hamoma:ne sia:i hame gogolei.

⁸⁴Na da habowali seda ouesaloma:bela:? Dia da habogala nama se iabe dunu, ilima se dabe ima:bela:?

⁸⁵Hidale gasa fibi dunu amo da Dia sema nabawane hame hamosa, ilia da na sa:ima:ne uli dogonesi.

⁸⁶Dia hamoma:ne sia:i huluane da dafawaneyale dawa:mu defele gala. Dunu eno ilia da na hou ogogole sia:beba:le, nama se bagade iaha. Dia na fidima!

⁸⁷Ilia da na gadenenewane fane legei dagoi. Be na da Dia hamoma:ne sia:su amo hame fisiagai.

⁸⁸Di da eso huluane mae fisili asigidafa hou hamonana. Amaiba:le, Dia nama asigidafa hou hamoma. Amasea, na da Dia sema nabawane hamomu.

⁸⁹Hina Gode! Dia Sia: da eso huluane dialumu. Dia Sia: da Hebene ganodini, eso huluane dialumu.

⁹⁰Dia mae fisili, asigidafa hou da eso huluane dialumu. Di da osobo bagade ea dialoba amogai ligisi. E da amogaiwane diala.

⁹¹Di da liligi huluane ouligisa. Di da amo hamoma:ne sia:beba:le, liligi huluanedafa da ilia dialoba amogaiwane diala.

⁹²Na da se nabawane esalu. Be Dia sema da nama hahawane hou ea bai hame ganiaba, na da se nabawane bogola:loba.

⁹³Na da Dia hamoma:ne sia:su amo mae fisili noga:ledafa ouligimu. Bai amoga Di da na esaloma:ne fidi.

⁹⁴Na da Dia:! Na fidima! Na da Dia hamoma:ne sia:i amo adoba:le fa:no bobogei.

⁹⁵Wadela:i hamosu dunu da na fane legema:ne ouesala. Be na da Dia sema amo na asigi dawa:su ganodini dawa:lalumu.

⁹⁶Na da ba:loba, liligi huluane da dagomu bidi gala. Be Dia hamoma:ne sia:i da noga:idafa.

⁹⁷Na da Dia sema amoma bagadewane asigisa. Na da hahabe asili daeya, eso huluane amoga Dia sema dadawa:lala.

⁹⁸Dia hamoma:ne sia:i da eso huluane nama gilisisa. Dia hamoma:ne sia:i da na dawa:su hou amo nama ha lai dunu ilia dawa:su hou baligima:ne hamosa.

⁹⁹Na dawa:su da nama olelesu dunu ilia dawa:su amo baligisa. Bai na da Dia hamoma:ne sia:su amo na asigi dawa:su ganodini dadawa:lala.

¹⁰⁰Na asigi dawa:su da da:i hamoi dunu ilia asigi dawa:su baligisa. Bai na da Dia hamoma:ne sia:su amo nabawane hamosa.

¹⁰¹Na da wadela:i hou hamosu amoma hame gilisi. Bai na da Dia sia: nabawane hamomusa: hanai gala.

¹⁰²Na da Dia hamoma:ne sia:su hame fisiagasu. Bai Dia Disu da na Olelesu Dunu.

¹⁰³Dia hamoma:ne sia:su da hedai bagade. Ilia hedai da agime hano ea hedai baligisa.

¹⁰⁴Dia sema da bagade dawa:su nama iaha. Amaiba:le, na da wadela:i hou hamobe huluane higasa.

¹⁰⁵Dia sia: da nama logo olelesu gamali defele gala. Dia sia: da na logo ba:ma:ne hadigi digagala:sa

¹⁰⁶Na da Dia moloidafa hamoma:ne sia:i amo nabawane hamomusa: ilegele sia:i dagoi. Amo ilegele sia:i, na da hame gogolemu.

¹⁰⁷Hina Gode! Na da baligiliwane se naba. Dia musa: ilegele sia:i defele, na mae bogole esaloma:ne fidima.

¹⁰⁸Hina Gode! Na Dima nodone sia:ne gadosu amo nabima. Dia hamoma:ne sia:su amo nama olelema.

¹⁰⁹Na Dima fa:no bobogemusa:, na esalusu fisimusa: momagele esala. Na da Dia sema hame gogolei.

¹¹⁰Wadela:i hamosu dunu da na sa:ima:ne sanenesisa. Be na da Dia hamoma:ne sia:i mae fisili nabawane hamonana.

¹¹¹Na da Dia hamoma:ne sia:su mae fisili, eso huluane gagui dialebe ba:mu. Dia hamoma:ne sia:i da nama hahawane hou iaha.

¹¹²Na da agoane ilegei dagoi. Na da Dia sema amo fa:no bobogelaleawane, na bogomu eso doaga:mu.

¹¹³Dunu amo da Dima noga:le hame fa:no bobogebe, na da higasa. Be na da Dia sema amoma asigisa.

¹¹⁴Di da na gesu amola na gaga:su. Na dafawane hamoma:beyale dawa:su ea bai da Dia ilegele sia:su.

¹¹⁵Dili wadela:i hamosu dunu! Gasigama! Na da na Gode Ea hamoma:ne sia:i nabawane hamomu.

¹¹⁶Hina Gode! Dia ilegele sia:i defele, nama gasa ima! Amasea, na da esalumu. Na dafawane hamoma:beyale dawa:su fisisa:besa:le, Dia fidima.

¹¹⁷Na dafasa:besa:le, na gaguma. Amasea, na da gaga:i dagoi ba:mu. Amola na da mae fisili, Dia hamoma:ne sia:i dadawa:lalu, nabawane hamomu.

¹¹⁸Di da nowa dunu da Dia sema nabawane hame hamosea, Di da ili higale fisiagasa. Ilia ogogole ilegesu da hamedei liligi.

¹¹⁹Di da wadela:i hamosu dunu huluane isu agoane ha:digisa. Amaiba:le, na da Dia hamoma:ne sia:i amoma nodosa.

¹²⁰Na da Diba:le beda:sa. Dia moloidafa fofada:su houba:le, na da bagadewane beda:sa.

¹²¹Na da hou noga:idafa amola moloidafa hamoi dagoi. Na ha lai dunu da na hasalasisa:besa:le, na mae yolesima.

¹²²Na da Dia hawa: hamosu dunuba:le, Dia na fidima:ne ilegele sia:ma. Hidale gasa fifi dunu da na banenesisa:besa:le, Dia na fidima.

¹²³Na da Dia gaga:musa: ilegele sia:i amo nama doaga:ma:ne, sosodo ouesalebeba:le, na da si sebe.

¹²⁴Dia mae fisili asigidafa hou defele, Dia na fidima. Amola Dia hamoma:ne sia:su nama olelema.

¹²⁵Na da Dia hawa: hamosu dunu. Na da Dia olelesu noga:le dawa:musa:, asigi dawa:su bagade nama ima.

¹²⁶Hina Gode! Dia hawa: hamomu eso da doaga:i dagoi. Bai dunu ilia da Dia sema nabawane hame hamosa.

¹²⁷Na da Dia hamoma:ne sia:su amoma hanai hou da gouli noga:idafa amoma hanai hou bagadewane baligisa.

¹²⁸Amaiba:le, na da Dia hamoma:ne sia:su huluane amoma fa:no bobogesa. Na da wadela:i hamosu logo amoga masunu higasa.

¹²⁹Dia olelesu da noga:idafa. Na da na dogoa asigi dawa:su huluane amoga Dia olelesu nabawane hamosa.

¹³⁰Dunu ilia da Dia olelesu liligi amo dawa:loma:ne olelesea, hadigi da maha amola hame dawa:su dunu da asigi dawa:su laha.

¹³¹Na da Dia hamoma:ne sia:su dawa:musa: bagadewane hanaiba:le, na da helega ha:ha:sa.

¹³²Dia da Dima asigi dunu huluane ilima hamobe defele, nama ba:leguda:le, asigima.

¹³³Dia ilegele sia:i defele, na dafasa:besa:le, amola wadela:i houga hasalasisa:besa:le, na fidima.

¹³⁴Na da Dia hamoma:ne sia:i noga:le nabawane hamomusa:, nama ha lai dunu da na mae banenesima:ne, Dia na gaga:ma.

¹³⁵Na hahawane ganoma:ne, Di nama misini, amola Dia sema nama olelema.

¹³⁶Na si hano da hano yogo agoane daha. Bai dunu eno ilia Dia sema nabawane hame hamosa.

¹³⁷Hina Gode! Di da moloidafa, amola Dia sema da moloidafa fofada:musa: defele gala.

¹³⁸Hamoma:ne sia:i Dia i da dafawane moloidafa amola moloidafa fofada:musa: defele gala.

¹³⁹Na ougi hou da na dogo ganodini lalu agoane nenana. Bai na ha lai dunu ilia da Dia hamoma:ne sia:su da hamedei liligi agoai ba:sa.

¹⁴⁰Dia ilegele sia:i da dafawanedafa dialumu. Na da Dia ilegele sia:i bagadewane hanasa.

¹⁴¹Na da hamedei dunu agoai, amola eno dunu ilia da na higasa. Be na da Dia olelesu liligi hame fisiagasa.

¹⁴²Dia moloidafa hou da mae fisili eso huluane dialumu. Dia sema da eso huluane dafawanedafa diala.

¹⁴³Na da da:i dioi bagade amola bidi hamosu bagade ba:sa. Be Dia hamoma:ne sia:su da nama hahawane hou iaha.

¹⁴⁴Dia hamoma:ne sia:su da eso huluane moloidafa fofada:su defele gala. Na esaloma:ne, asigi dawa:su noga:i amo nama ima.

¹⁴⁵Na asigi dawa:su huluane amoga na dima wele sia:sa. Hina Gode! Na sia:be amo dabe adole ima. Amasea, na da Dia hamoma:ne sia:su amo nabawane hamomu.

¹⁴⁶Na Dima wele sia:sa. Na gaga:ma! Amasea, na da Dia sema didili hamomu.

¹⁴⁷Eso da hame misia, na da Dia na fidima:ne wele sia:sa. Na da Dia ilegele sia:i nababeba:le, na da dafawane hamoma:beyale dawa:lusu lai dagoi.

¹⁴⁸Daeya ganini hadigibi galu, na da mae golale si dagane esala, Dia hamoma:ne sia:su dadawa:sa esala.

¹⁴⁹Hina Gode! Dia asigidafa hou da mae fisili dialebeba:le, na sia: nabima. Na esaloma:ne, Dia gogolema:ne olofole asigidafa hou nama olelema.

¹⁵⁰Nama se iabe dunu da dodona:gi, amola Dia sema hamedafa fa:no bobogesa. Ilia nama gadenena maha.

¹⁵¹Be Hina Gode! Di da na gadenene lela, amola Dia hamoma:ne sia:su da eso huluane dialumu.

¹⁵²Musa:ganiniwane, na da Dia hamoma:ne sia:i amoga dawa: lai. Dia hamoma:ne sia:i da eso huluane dialoma:ne hahamoi.

¹⁵³Na se nabasu ba:ma! Amola na gaga:ma! Bai na da Dia sema noga:le ouligi.

¹⁵⁴Na hamobe hou amo gaga:ma, amola na halegale esaloma:ne hamoma. Dia ilegele sia:i defele, na gaga:ma.

¹⁵⁵Wadela:i hamosu dunu da gaga:su hame ba:mu. Bai ilia da Dia sema nabawane hame hamosa.

¹⁵⁶Be Hina Gode! Di hahanibi dunuma bagadedafa asigisa. Dia gogolema:ne olofole asigi hou nama olelema, amola na gaga:ma.

¹⁵⁷Nama ha lai dunu amola nama banenesisu dunu da bagohame esafula. Be na da Dia sema fa:no bobogesu hame fisisa.

¹⁵⁸Na da amo hohonosu dunu ba:sea, na da bagadewane higale ba:sa. Bai ilia da Dia hamoma:ne sia:i amoma hame fa:no bobogesa.

¹⁵⁹Hina Gode! Ba:ma! Na da Dia hamoma:ne sia:su bagadewane hanasa. Dia asigidafa hou da afadenesu hame dawa:. Amaiba:le, na gaga:ma!

¹⁶⁰Dia sema bai da dafawanedafa hou. Amola Dia moloidafa fofada:su huluane da eso huluane dialumu.

¹⁶¹Gasa bagade dunu da bai hamedene, udigili nama doagala:sa. Be na da Dia sema amo fa:no bobogesa.

¹⁶²Dunu amo da gobolo liligi bagadedafa hahawane hogole ba:sea, amo defele na da Dia ilegele sia:su ba:sea, hahawane bagade gala.

¹⁶³Na da ogogosu hou huluane bagade higasa. Be na da Dia sema bagade hanasa.

¹⁶⁴Di da moloidafa fofada:su hou hamonanebeba:le, na da eso huluane amoga, fesuale agoane Dima nodone sia:sa.

¹⁶⁵Nowa da Dia sema hamoma:ne hanaiwane esalea, ilia da gaga:iwane esala. Ilia da dafasu hame dawa:.

¹⁶⁶Hina Gode! Dia na gaga:ma:ne, na da ouesala. Amola na da Dia hamoma:ne sia:be defele hamonana.

¹⁶⁷Na da Dia olelesu nabawane hamonana. Na da na dogo huluane amoga Dia olelesu hanasa.

¹⁶⁸Na da Dia hamoma:ne sia:su amo nabawane hamosa. Dia da na hamobe huluane ba:lala.