Y Salmo Sija 119:48-168

⁴⁸Bae jujatsa julo locue y canaejo sija gui tinagomo sija, ni y juguaeya; ya bae jujaso y laymo sija.

⁴⁹ZAIN Jaso y sinangan gui tentagomo, ni y unfatinasyo na junangga.

⁵⁰Este munamamagofyo gui trinisteco; sa y sinanganmo jagasja munalâlâyo.

⁵¹Gogosmachatgüeyo ni y mansobetbio: lao trabia ti juabag guinin y laymo.

⁵²Jagasja jujajaso y juisiomo sija ni y guinin ampmam na tiempo, O Jeova, ya jagasja juconseulan maesayo.

⁵³Jaguotyo y maepe na binibo, sa pot y manaelaye ni y madingo y laymo.

⁵⁴Y lay sija cantaco sija gui guima anae taotao tumanoyo.

⁵⁵Jagasja jujajaso y naanmo, O Jeova qui puenge, ya juadadajeja y laymo.

⁵⁶Este guajayo, sa juadaje y finanagüemo.

⁵⁷CHETH Si Jeova y patteco guinin jusangan na juadaje y sinanganmo sija.

⁵⁸Jugagao y finaboresemo contodo y corasonjo: magaease nu guajo jaftaemano y sinanganmo.

⁵⁹Jujaso gui jinanaojo sija, ya jubira y adengjo guato gui testimoniomo sija.

⁶⁰Inalululayo, ya ti sumagayo, para juadaje y tinagomo sija.

⁶¹Y cuetdas manaelaye jafunutyo; lao ti malefayo ni y laymo.

⁶²Bae jucajulo gui tatalopuenge, ya junaejao grasias, sa pot y tinas na juisiomo.

⁶³Guajo gachong ayo sija y manmaañao nu jago, yan ayo sija y umadadaje y finanagüemo.

⁶⁴Y tano, O Jeova, bula ni y minaasemo: fanagüeyo ni y laymo sija.

⁶⁵TETH Mauleg finatinasmo ni y tentagomo, O Jeova, jaftaemano y sinanganmo.

⁶⁶Fanagüeyo mauleg na juisio yan tiningo: sa jagasja jujonggue y tinagomo.

⁶⁷Antes di jutriste, umabagyo; lao pago juadaje y sinanganmo.

⁶⁸Jago maulegjao, ya unfatinas mauleg; fanagüeyo ni y laymo sija.

⁶⁹Y sobetbio jafatinas un dinague contra guajo: bae juadadajeja y finanagüemo sija contodo y corasonjo.

⁷⁰Y corasonñija, manmantica calang sebo: lao jumagofyo ni y laymo.

⁷¹Mauleg para guajo, na guinin ninatristeyo; para jueyag y laymo sija.

⁷²Y lay y pachotmo, maulegña para guajo, qui ni mit na oro yan salape.

⁷³JOD Y canaemo sija fumatinasyo yan fumajechurayo; naeyo tiningo, para jueyag y tinagomo sija.

⁷⁴Ayo sija y manmaañao nu jago ujalieyo ya ufanmagof; sa jagasja junangga y sinanganmo.

⁷⁵O Jeova, jutungoja na y juisiomo tunas, yan pot y minagajetmo na unnatristeyo.

⁷⁶Polo jutayuyutjao ya y minauleg y minaasemo unamagofyo, jaftaemano y sinanganmo gui tentagomo.

⁷⁷Polo ya ufato guiya guajo y cariñoso na minaasemo sija, para ulâlâyo; sa y tinagomo y minagofjo.

⁷⁸Polo ya manmamajlao y mansobetbio; sa manapodong yo nu y dinague: lao jujajasoja y finanagüe sija.

⁷⁹Polo ya umabira iyaguajo ayo sija y manmaañao nu jago, yan sija ujatungo y testimonio sija.

⁸⁰Polo ya fitme y corasonjo gui laymo, ya chajo mamamajlao.

⁸¹CAPH Y antijo lalango pot y satbasionmo, lao junananggaja y sinanganmo.

⁸²Y atadogco ninalachae pot y sinanganmo mientras ileleco: Ngaean nae unconsuelayo.

⁸³Sa jumuyongyo calang y boteya gui jalom aso; lao trabia ti malelefayo ni y laymo sija.

⁸⁴Cuanto sija y jaanen y tentagomo? Asta ngaean nae unjusga ayo sija y pumetsisigueyo?

⁸⁵Y mansobetbio manmanguadog joyo para guajo, ni y ti taegüije laymo.

⁸⁶Todo y tinagomo sija manunas: ayudayo sa sija mapetsisigueyo ni y dinague.

⁸⁷Canaja malalachaeyo gui jilo y tano; lao ti judingo y finanagüemo sija.

⁸⁸Nalâlâyo pot y cariñoso na güinaeyamo, ayo nae juadaje y testimonion pachotmo.

⁸⁹LAMED O Jeova, para taejinecog y sinanganmo fitme gui langet.

⁹⁰Y minagajetmo gagaegue asta todo y generasion sija; jago plumanta y tano ya sumaga.

⁹¹Sija jasisigueja asta pago na jaane jaftaemano y otdenmo; sa todos sija tentagomo.

⁹²Yaguin ti jagas janamagofyo y laymo, jagas malingo ni y trinisteco.

⁹³Ti jumalefa ni y finanagüemo sija para taejinecog: sa pot sija na unnalâlâyo.

⁹⁴Guajo iyomoyo, satbayo; sa jualiligao y finanagüemo sija.

⁹⁵Y manaelaye manananggayo para umayulang; lao jugueguesjasoja y testimoniomo sija.

⁹⁶Guinin julie y uttimon y todo quinabales; ya y tinagomo gosfeda.

⁹⁷MEM O jafa muna juguaeyo y tinagomo! esteja jinasosoco todot dia.

⁹⁸Y tinagomo janafanungoñayo qui enemigujo sija; sa sija siempre infanjajameja.

⁹⁹Megaeña tiningojo qui todo y maestronomo sija: sa y testimoniomo sija, y jinasojo.

¹⁰⁰Manungoñayo qui y manbijo; sa juadadaje y finanagüemo sija.

¹⁰¹Junapara y adengjo guato gui todo chalan tinaelaye, para juadaje y sinangan.

¹⁰²Ti jubirayo gui juisiomo: sa jagasja unfanagüeyo.

¹⁰³Na minames y sinanganmo ni y chinaguijo, junggan mamesña qui y miet para y pachotto.

¹⁰⁴Guinin y finanagüemo sija nae mañuleyo tiningo: enaomina juchatlie todo y chalan mandacon.

¹⁰⁵NUN Y sinanganmo y candet para y adengjo, yan manana gui chalanjo.

¹⁰⁶Manjulayo ya junafitme na juadaje y tinas na juisiomo sija.

¹⁰⁷Gospiniteyo; nalâlâyo, O Jeova, jaftaemano y sinanganmo.

¹⁰⁸O Jeova, jutatayuyut jao: chajlao y libren y inefresen pachotto sija, ya fanagüeyo ni y juisiomo.

¹⁰⁹Antijo siempre gaegue güi canaejo; lao ti malelefayo ni y laymo.

¹¹⁰Y manaelaye maplantayeyo laso; lao ti sumujayo gui finanagüemo.

¹¹¹Juchule erensiaco para siempre y testimoniomo sija; sa sija y minagof y corasonjo.

¹¹²Jumangag y corasonjo para jucumple y laymo sija; para taejinecog asta y uttimo.

¹¹³SAMECH Juchatlie y mangaejinaso dobble: lao y tinagomo juguaeya.

¹¹⁴Jago y fanatogco na lugat yan y patangjo: junanangga, y sinanganmo.

¹¹⁵Fañuja guiya guajo jamyo ni y chumogüe manaelaye: para juadadaje y tinago Yuusso.

¹¹⁶Mantieneyo jaftaemano y sinanganmo, para julâlâ: ya chamoyo na mamamajlao ni y ninanggaco.

¹¹⁷Mantieneyo ya juseguro: ya jurespeta y tinagomo sija siempre.

¹¹⁸Unpolo pot taya todo ayo sija y manaba gui laymo: sa y finababañija taebale.

¹¹⁹Unnafañuja todo ayo sija y manaelaye gui tano calang basula: enao mina juguaeya y testimoniomo sija.

¹²⁰Y catneco lalaolao pot y maañaoña nu jago: ya maañaoyo ni y juisiomo sija.

¹²¹AIN Jufatinas juisio yan tininas: chamoyo dumidingo gui minafañatsagayo.

¹²²Jago unaseguro y tentagomo para mauleg; chamo pumópolo y sobetbio na unachatsagayo.

¹²³y atadogco yafae pot y satbasionmo, yan pot y tinas na sinanganmo.

¹²⁴Fatinas gui tentagomo jaftaemano y minaasemo, yan fanagüeyo ni y laymo sija.

¹²⁵Guajo tentagomoyo; naeyo tiningo, ya jutungo y tinagomo sija.

¹²⁶Esta tiempo para si Jeova ufachocho: na sija manataebale y laymo.

¹²⁷Enao mina juguaeya y tinagomo sija, mas qui y oro, junggan, mas qui y fino na oro.

¹²⁸Enao mina junaguaelaye todo y finanagüemo sa tunas pot todo güinaja: ya juchatlie y cada chalan dacon.

¹²⁹PE Y tinagomo sija mannámanman: enao mina maninadadaje ni y antijo.

¹³⁰Y binaban y sinanganmo numae manana: jananae tinagoña y manaetiningo.

¹³¹Juguefbaba y pachotto, ya sumuspirosyo: sa majalangyo ni y tinagomo sija.

¹³²Birajao guiya guajo, y unmaase nu guajo, taegüije y costumbremo ni unfatinas ni ayo sija ni gumaeya y naanmo.

¹³³Naregla y pinecatto ni y sinanganmo: ya chamo na fangagae ninasiña y jafa na isao guiya guajo.

¹³⁴Nalibreyo gui chiniguet y taotao, ayo nae juadaje y finanagüemo.

¹³⁵Nafanina y matamo gui jilo y tentagomo; ya unfanagüeyo ni y laymo.

¹³⁶Janom sadog manmalalago papa gui atadogco sija sa sija ti maadaje y tinagomo.

¹³⁷TZADE Tunasjao, O Jeova, yan tunas y juisiomo sija.

¹³⁸Jagasja untago y testimoniomo sija gui tininas, yan minagajetja.

¹³⁹Y inigojo jalachaeyo, sa y contrariujo sija manmalefa ni y sinanganmo sija.

¹⁴⁰Y sinanganmo sengasgas: enao mina jaguaeya y tentagomo.

¹⁴¹Diquiqueyo, ya madespresiayo, lao ti malelefayo ni y finanagüemo sija.

¹⁴²Y tininasmo taejinecog na tininas ya y tinagomo minagajet.

¹⁴³Chinatsaga yan pinite sumodayo: lao y tinagomo sija minagofjo.

¹⁴⁴Y testimoniomo sija manunas para taejinecog: naeyo tiningo ya julâlâ.

¹⁴⁵KOPH Umaagangyo contodo y corasonjo; opeyo, O Jeova; bae juadaje y laymo sija.

¹⁴⁶Jagasja juagangjao; satbayo, ya juadaje y testimoniomo sija.

¹⁴⁷Taftafñayo qui y egaan ya umagangyo: junangga guiya jago.

¹⁴⁸Y atadogco taftaña qui y bumela gui puenge para jujajasoja y sinanganmo.

¹⁴⁹Jungog y inagangjo jaftaemano y minauleg güinaeyamo: O Jeova, nalâlâyo, jaftaemano y juisiomo.

¹⁵⁰Manjijot ayo sija y tumatitiye y tinaelaye: sija mañago gui tinagomo.

¹⁵¹Jago jijot jao, O Jeova; yan todo y tinagomo sija minagajet.

¹⁵²Pot guinin ampmam na tiempo jutungo y testimoniomo sija, ni y unplanta sija para siempre.

¹⁵³RESH Jaso y trinisteco, ya nalibreyo; sa ti malefayo ni y laymo.

¹⁵⁴Plaitea y causaco, ya nalibreyo ni apasmo: nalâlâyo jaftaemano y sinanganmo.

¹⁵⁵Chago y satbasion gui manaelaye, sa ti maaliligao y laymo sija.

¹⁵⁶Dangculo y cariñoso na minaasemo, O Jeova, nalâlâyo jaftaemano y juisiomo sija.

¹⁵⁷Megae pumetsisigueyo yan contrariujo; lao ti sumususujayo gui testimoniomo sija.

¹⁵⁸Julie y fumatinas dinague, ya tristeyo, sa ti maadaje y sinanganmo.

¹⁵⁹Jaso jafa muna juguaeya y finanagüemo sija: nalâlâyo, O Jeova, jaftaemano y munamauleg güinaeyamo.

¹⁶⁰Y resumen sinanganmo minagajet; ya cada uno tunas na juisiomo sija gagaegue para taejinecog.

¹⁶¹SHIN Y prinsipe sija mapetsisigueyo sin causa: lao y corasonjo maaañaoja ni y sinanganmo.

¹⁶²Jumagofyo ni y sinanganmo, taegüije y manmañoda dangculo na inamot.

¹⁶³Jugoschatlie ya juingin y dinague; lao y laymo juguaeya.

¹⁶⁴Siete maje gui un jaane jualabajao, sa pot y tinas na juisiomo.

¹⁶⁵Dangculo na pas guaja para ayo sija y gumaeya y laymo, ya taya lugatñija para ufanmatompo.

¹⁶⁶O Jeova, jagasja junangga y satbasionmo, ya esta juchogüe y tinagomo sija.

¹⁶⁷Y antijo esta jaadaje y tinagomo sija: ya sija mangosyajo.

¹⁶⁸Esta juadaje y finanagüemo sija yan y testimoniomo sija; sa todo y jinanaojo mangaegue gui menamo.