Föför 28:1-8

¹Iwe, lupwen aia tiwelong wilifanü, aia silei pwe ewe fanü itan Malta.

²Chon ei fanü ra fokun kirikiröch ngenikem. Ra aküetä eu ekkei o etiwakem meinisin, pun a püng üt o patekich.

³Paulus a pwal ionifengeni amwüch. Nge lupwen a uwoutä won ewe ekkei, eman serepenit a towu me lon ekewe amwüch pokiten pwichikaren ewe ekkei, a küüw pöün o nikemeitiu won.

⁴Iwe, lupwen chon ewe fanü ra küna ewe serepenit mi nikemeitiu won pöün Paulus, ra kapasfengen lefiler, “Ei mwän i eman chon niela aramas. Pun inamwo ika a fen manaueto seni le matau, nge ewe anün pwüng esap mwüt ngeni an epwe manau.”

⁵Nge Paulus a wichikalong ewe serepenit lon ewe ekkei, nge esap feiengau ren.

⁶Iwe, ekewe aramas ra witiwiti pwe pöün Paulus epwe pwootä ika epwe fen turula o mäla. Ra witiwit fansoun langatam, nge lupwen resap küna och feiengau a fis ngeni, ra siwili ar ekiek o apasa, “Ätei eman kot!”

⁷A wor ekoch fanü ikenan mi arap ngeni ei leni, fanüen Puplius, i samolun ewe fanü. Ätei a etiwakem lon lenian o lon ükükün ülüngat rän a awasölakem pokiten an kirikiröch.

⁸Iwe, semen Puplius a mwelilong leimw ren an pwichikar me feiseni. Paulus a tolong lon rumwan o mürin an iotek fän itan a iseis pöün won o apöchökülätä.