Föför 16:11-38

¹¹Iwe, äm aia sai won sip seni Troas o saila wenewen ngeni Samotrasia. Nge sorotän ewe rän aia tori Neapolis.

¹²Seni ikenan aia sai won fanü tori Filipi, iei ewe akaeuin telinimw lon ewe kinikinin fanü lon Masetonia, pwal eu telinimw ia ekewe chon Rom ra nonom ie. Iwe, äm aia nonom ikenan ekoch rän.

¹³Lon ewe ränin Sapat aia feila ngeni eu leni ünükün eu chanpupu lükün ewe telinimw, ewe ia aia ekieki pwe chon Juta ra mwichfengen ie pwe repwe iotek. Iwe, aia mottiu o kapas ngeni ekewe fefin mi mwichfengen ikenan.

¹⁴Iwe, eman me lein ekewe fefin mi aüselingakem Litia seni ewe telinimw Tiatira. Neminei eman chon amömö mangaku mi parachol, nge ra fokun mömong. Ei fefin a fel ngeni Kot, nge ewe Samol a suki lelukan pwe epwe rongosochis ngeni än Paulus afalafal.

¹⁵Mürin än neminei me chon leimwan papatais a tüngor ngenikem, “Oupwe feito o nonom lon imwei are oua ekieki pwe ngang eman chon enletin lükü ach Samol.” Iwe, a pesekem pwe aipwe feila lon imwan.

¹⁶Lon eu rän, lupwen aia feila ngeni ewe lenien iotek, eman amanau föpwül a churikem, eman ngününgau a wäni pwe a tufichin osuni mine epwe fis lon fansoun epwe feito. Neminei a awora chomong moni tolong ngeni nöün kewe masta ren an osuni mine epwe fis ngeni aramas.

¹⁷Ei föpwül a tapwela mürin Paulus me äm chienan kewe o kökkö fän leüömong, “Ekei mwän ir nöün Kot ewe mi Unusen Tekia chon angang! Ra aronga ngenikemi usun ämi oua tongeni küna manau!”

¹⁸Iei usun mine a föri lon chomong kewe rän, tori Paulus a fokun weires ren, pwe a kul ngeni ewe föpwül o üreni ewe ngün mi nom won, “Fän iten Jesus Kraist üa allük ngonuk pwe kopwe towu seni neminei!” Iwe, lon ewe chök otun ewe ngün a towu seni.

¹⁹Lupwen nöün ewe föpwül kewe masta ra mefi pwe ar alen moni tolong a ükütiu, ra turufi Paulus me Silas o etekiniirela lon ewe lenien chulap ren ekewe sounemenem.

²⁰Ra emweniirela mwen ekewe samollap o ra üreniir, “Ekei mwän ir chon Juta, ra afisätä fitikoko lon ach ei telinimw.

²¹Ra afalafal won ekoch örüni mi ü ngeni ach kewe allük. Kich chon Rom, sisap tongeni etiwa ika apwönüetä ekei örüni.”

²²Iwe, pwal ewe mwichen aramas a pöchökül le ü ngeni Paulus me Silas. Mürin ekewe samollap ra kamwei seniir üfer kewe o allük ngeni ekewe sounfiu pwe repwe wichiir.

²³Wesin ar wichiir fän chomong, ra atururelong lon ewe imwen fötek, nge ra allük ngeni ewe chon masen imwen fötek pwe epwe mamasafichiir.

²⁴Fän iten ei allük ewe chon masen fötek a atururelong lon ewe ruum lukalapen ewe imwen fötek o anükü pecher lefilen irä mi chou.

²⁵Iwe, ina epwe lukenipwin Paulus me Silas ra iotek o köl kölün mwareiti Kot, nge ekewe chon fötek ra aüseling ngeniir.

²⁶Iwe, a müttir fis eu chechen fanü mi fokun watte, pwe ewe imwen fötek tori longolongun a mwökütüküt. Lon ewe chök otun ekewe asamalap meinisin ra sukula, nge ekewe selimächä mi föfö ngeni ekewe chon fötek ra pichila.

²⁷Iwe, ewe chon masen imwen fötek a nenela. Nge lupwen a küna pwe ekewe asamalapen imwen fötek ra sukula, a ekieki pwe ekewe chon fötek ra süla. Iei mine a üttawu nöün ketilas o ekiekin an epwe püsin niela.

²⁸Nge Paulus a kökkö fän mwelian mi leüömong, “Kosap püsin afeiengauok! Äm meinisin aia nom ikei!”

²⁹Iwe, ewe chon masen imwen fötek a kökkö pwe eman epwe uwato eu lamp, iwe, a sälong lon ewe ruum o chapetiu mwen Paulus me Silas fän chechech.

³⁰Mürin a emweniirewu lükün o aisiniir, “Ai samol kana, met ngang üpwe föri pwe üpwe küna manau?”

³¹Ra pölüeni, “Kopwe lükü ach Samol Jesus, iwe, ämi me chon leimwom oupwe küna manau.”

³²Mürin ra afalafala kapasen ach Samol ngeni pwal ekewe aramas meinisin mi nom lon imwan.

³³Lon ewe chök kulok lon ewe pwinin ewe chon masen imwen fötek a emweniirela lon pwal eu ruum o a limeti kinaser kewe. Lon ewe chök otun i me chon leimwan meinisin ra papatais.

³⁴Mürin a emwenala Paulus me Silas lon püsin imwan o amongöniir. Iwe, i me chon an famili meinisin ra fokun pwapwa, pun iei ra lükü Kot.

³⁵Iwe, lesosorun sorotän ewe rän ekewe samollap ra tinala ekoch meilapen polis fän ei allük, “Oupwe amusala ekei mwän!”

³⁶Iei mine ewe chon masen imwen fötek a üreni Paulus, “Ekewe samollap ra tinato ei allük pwe ämi me Silas oupwe musala. Iei oupwe le towu o feila fän kinamwe.”

³⁷Nge Paulus a üreni ekewe meilapen polis, “Ra wichikem mwen mesen ekewe aramas, nge esap wor äm tipis, nge fen äm chon Rom! Mürin ra aturukeemilong lon imwen fötek, nge iei ra mochen tinikeemila le monomon? Apwi, esap fokun ina! Ekewe samollap repwe püsin feito ikei o atowukeemiwu.”

³⁸Iwe, ekewe meilapen polis ra apworausa ekei kapas ngeni ekewe samollap. Nge lupwen ra rongorong pwe Paulus me Silas ir chon Rom, ra fokun niuokus.