Hecho 16:11-38

¹¹Eꞌe Teopino, eyaya, Nocaa pea esohui Jesosaja epeejji cuanaja, ma eyaya banaje eyaya tehueaña miquea ebajji jama baꞌa: Majoya Toasa huasijje poe majje ecuana bishe ai yasijje nequisohuaquinaje. Besapoquinaje Samatasia nasi yasijje. Majoya pea mecahuajje besapoquinaje Neaponi cuiñajji yasijje, bishe aijo.

¹²Majoya Neaponijo nequi ecuana poquinaje quea huesha nee, Pinipo cuiñajji yasijje ejiojjijje Masenonia meshi ebio dojjojo. Pinipojo Shomano dejja cuana baꞌyani quea quemo cuiñajjijo. Jamajjeya quea huiso dejja Pinipo huasijje poeyani anicuaa. Jamajjeya ecuana Pinipojo nequinaje quea cahui huiso.

¹³Majoya Jodioja epojja ejomishocajjijo ecuana cuiñajji esecue yasijje poquinaje cuei sahua huasijje. Jama jjashahuabaquime poanaje baꞌa: —Jomajo Jodio cuana Eyacuiñajji nijje mimiani baꞌajja. Jomajo quea huiso epona ejjachichaqui ani banaje. Jamajjeya Pabo, ojaya epeejji cuana peaꞌai anioquenaje. Esohui huohui canaje epona cuanaja eshajjaꞌajjajji.

¹⁴Oe eponaa Ninia bajjaniya quea jaꞌa nee shajjaꞌajja canaje. Oya Tiatina pona, Tiatina cuiñajjijo baꞌe, daqui huoꞌo quiajji peaꞌai, daqui huoꞌo quea pame nee nee quiajji. Oya Ninia Eyacuiñajjija epeejji yahuajo poanaje. Jamajjeya Emeshi Mese neiya oya shajjaꞌajja meesahua canaje Paboja esohui quea pame nee Jesosaja.

¹⁵Jamajjeya Ninia, oja huapa pojjeama cuana peaꞌai Jesosa nijje jjapeequiꞌyonaje. Onaaya oya Eyacuiñajjijo besa mee canaje enajo. Majoya Niniaa Pabo jama acanaje baꞌa: —Miquea eba eya Emeshi Mese nei Jesosaja epeejji nei, ojaya esohui jayojja jama aña. Jamajjeya ¡ecuea equijo baꞌecue! —poanaje Ninia. Jamajjeya ecuana Niniaa jaꞌa cajjequinaje ojaya equijo ebaꞌejji.

¹⁶Quijje ecuana poqui oꞌoyanaje cuei yasijje Eyacuiñajji nijje mimiya. Poquijeya ecuaaya banaje oe epona ahuemaꞌ ani. Ohuaya chaco cani sosemaꞌ niñepoqui yajjejojo. Jamajjeya eshahuaa esapajo nequiya epona huohui meesahua canaje ohuaye nei ma quijje onaa acaje. Maya huohui capoquinaje quea huiso bejjo sosejje. O chacomeejji poaniya quea huiso bejjo jjeshe canaje epona niñepoquiya huohui cani sosejje.

¹⁷Ma epona niñepoqui Pabo quishishijji poquinaje. Taaa poquinaje jama baꞌa: —Jiquio dejja cuana Eyacuiñajji quea caꞌa neeja echacojji poani. Onaaya miquianaya huohui cani esohui quea pame nee Jesosajo, ma ohuaya mimishi cuana cuijeaꞌyo majje miquianaya baꞌe tiitii mee cajeꞌyo eyajo —jama taaa nishomeya poanaje ecuana quishishijji poquije.

¹⁸Jama taaa majamaja nishomeya epona popoquinaje quea huiso cahuijo. Quijje Pabo quea quene po majje, jjanojjaquicuaji majje eshahua eponajo nequi huoojeacuayajea caꞌyonaje jama baꞌa: —¡Eshahua eponajo nequi cuayaquiꞌyocue! ¡Aꞌa dobiqui oꞌoyajji! Jesosa Quito nijjeya eyaya miya huoojeacuayajeaꞌyaña —Pabohua acanaje. Jjeyahua nei eshahua eponaja yamijo nequi cuayaquiꞌyonaje.

¹⁹Ma ba majje eponaja echacomeejji poani quea quene nee nee poanaje Pabo nijje, Sinasi nijje peaꞌai. Jama poanaje baꞌa: —¡De! Jjeya epona shahuamaꞌyo. Jamajjeya ojaya baꞌyo jjima poaje ojaye nei ma onaa quijje nei acaje. Onajaya ecuana esosequiaꞌyojji pojjeama ma eponaa huohui cani sosejje —poanaje epona chacomeejji poani. Jamajjeya epona chacomeejji poaniya Pabo, Sinasi peaꞌai iña canaje. Dojo canaje ojjañaa aquiana quiajji equi yasijje. Jomajo Pinipo emeshi mese nijje miminaje, etii cuana nijje.

²⁰Shomano emeshi mese huohuiꞌajja cañaquinaje jama baꞌa: —¡Bacue! Jiquio Jodio dejja cuaa, Pabohua, Sinasiya peaꞌai ojjaña cuana ecuanaja cuiñajjijo baꞌe quea quene nee nee po mee cani.

²¹Eꞌe, oya cuaa pea ejjashahuabaquiꞌyojji huohui canaje. Pea ebaꞌejjijo huohui canaje. Jamaya pojjeama ecuanaja emeshi meseja esohui. Jamaya pojjeama Shomano dejja cuanaja esohui peaꞌai. Ecuana Shomano dejja cuana, jamajjeya Paboja esohui jayojja jama yajji, ¿yajja eꞌajji?

²²Majoya ojjaña dejja cuana cuajicuaji jebejenaje Pabo que. Quea quene nee ojjaña poanaje Pabo nijje, Sinasi peaꞌai nijje. Emeshi mese cuana peaꞌai quea quene po majje Paboja daqui Sinasija daqui peaꞌai oja ehuosho baꞌe iñaꞌisajea canaje. Huohui canaje jama baꞌa: —¡Pabo, Sinasi peaꞌai cuiasejja neineicue acui sisiya! ¡Majoya oe jeanobiajea meequicue ejjajeanobiaquijji equi yasijje! —acanaje Pinipo emeshi mese cuaa.

²³Jamajjeya Pabo, Sinasi peaꞌai janobajjima nei cuiasejja huichaꞌa huichaꞌa canaje cuaa. Majoya oya cuana dojo canaje ejjajeanobiaquijji equi yasijje jeanobiajeaa. Ejjajeanobiaquijji equi cuiñajji jama acanaje baꞌa: —¡Jiquio dejja cuana jaahuana neineicue! ¡Aꞌa cuayaqui meeꞌyojji! Poquiquehuajo aje mi oe cuiajea cajeꞌyo emeshi mese cuaa —acanaje.

²⁴Jamajjeya ejjajeanobiaquijji equi cuiñajjiya ma esohui shajjaꞌajja majje quea mete poanaje. Pabo, Sinasi peaꞌai ejjajeanobiaquijji equi dojjo nei yasijje jeanobiajea canaje; quibo jeyochicha canaje acui tejjee.

²⁵Jamatii mecashono Pabo, Sinasi peaꞌai Eyacuiñajji nijje mimi jaanaje. Sohuicuaya jaanaje peaꞌai. Ojjaña cuaa ejeanobia jaaa shajjaꞌajja canaje sohuicuaya jaa.

²⁶Majoya meshi huehuahuehuanaje janobajjima nei. Mei jiyo cuana huehuahuehua neineinaje peaꞌai. Esecue cuana jamatii nequi jjacaꞌapejojeaquinaje. Ojjaña dejja cuana ejeanobia jaa jjapichojeaquiꞌyonaje baa jjono cuana, de.

²⁷Oja ejeanobia cuiña poꞌani aje oe shequiꞌyonaje. Shequiꞌyo majje ba canaje ojjaña esecue cuana ejjacaꞌapejoquiꞌyo nequi. Ojjaña dejja ejeyojaa poquiꞌyonajejo poso metejeanaje. Baa iña canaje ejjaacuaquiꞌyojji nisho.

²⁸Jamatii Pabo jama taaame poanaje baꞌa: —¡Aꞌa oe jjaacuaquiꞌyojji! Ecuana yani ojjaña tii; poquiꞌyo jjima —Pabo poanaje.

²⁹Paboja esohui shajjaꞌajja majje equi ejjanobiaquijji cuiñajji taaanaje jama baꞌa: —¡Cuaquijiji oe yecue! —poanaje. Cuaquijiji iña majje ejjajeanobiaquijji dojjo huasijje cuajicuajipoquinaje Pabo baa. Pabo ba majje ecuiꞌoshajjajo nequinaje. Quea mete jjejojo piopionequinaje. Ojaya eba Pabo, Sinasi peaꞌai Eyacuiñajjija epeejji cuana. Jamajjeya oya cuanajo quea mete nee poanaje.

³⁰Majoya ohuaya Pabo, Sinasi peaꞌai ejjajeanobiaquijji dojjojo nequi dojocuayaqui caꞌyanaje. Oja equi yasijje dojo canaje. Huohuiꞌajja cañaquinaje jama baꞌa: —Epeejji cuana, ¿aya acuae ecuea mimishi cuana cuijea cajeꞌyo soꞌo? ¿Yajja po majje acuae mo poquijeꞌyo eyahuasijje? ¿Yajja acuae po cajji cuaqui yasijje poquiꞌyo jjima epojji? —acanaje ejjajeanobiaquijji cuiñajji poaniya.

³¹—Eꞌe —Pabo poanaje—, Emeshi Mese nei quea pame Jesosa Eyacuiñajjija huoojeaꞌyo ojjaña jaahuanajji. ¡Onijje mimicue, onijje jjapee neineiquicue! ¡Ojaya esohui jayojja jama baꞌecue! Jamajjeya ohuaya miquea mimishi cuana cuijea cajeꞌyo. Ojjaña miquea huapa pojjeama cuaa miquea equijo baꞌeya jamaya caꞌa cahua peaꞌai. Jamajjeya mimishi cuijeaꞌyo majje Jesosaa miquianaya baꞌe tiitii mee cajeꞌyo eyajo onijje —Pabohua acanaje.

³²Majoya Pabohua, Sinasi nijjeya esohui quea pame nee Jesosajo, Emeshi Mese neijo huohui canaje ojjaña ma equijo baꞌeca cuanaja eshajjaꞌajjajji.

³³Shajjaꞌajja majje ejjajeanobiaquijji cuiñajjiya ecuia sii Paboja edaasa, Sinasija edaasa peaꞌai shacua canaje. Shacua majje shicui canaje mechashono nei. Majoya oya, ojjaña ojaya huapa pojjeama cuana nijje peaꞌai Jesosa nijje jjapeequinaje. Majoya oya, ojaya huapa pojjeama cuana peaꞌai Eyacuiñajjijo besa mee canaje enajo.

³⁴Majoya ohuaya Pabo, Sinasi peaꞌai oja equi yasijje dojodobiaqui majje oya cuana bobia canaje. Oya, ojaya huapa pojjeama cuana peaꞌai quea bihui nee nee poanaje Jesosa nijje jjapeequi majje, Eyacuiñajji nijje peaꞌai.

³⁵Majoya mecajjeahua nei Shomano emeshi mese cuaa sohuinano cuana huoojea canaje ejjajeanobiaquijji equi yasijje jama huohuime yajji baꞌa: —¡Pabo, Sinasi peaꞌai pichojeaꞌyocue!

³⁶Jamajjeya ejjajeanobiaquijji cuiñajjiya Pabo huohui canaje jama baꞌa: —Pabo, Shomano emeshi mese cuaa miquianaya pichojea mee caꞌyonaje. ¡Jjeyahua nei esecue yasijje cuayaquiꞌyocue! ¡Quea bei nee poquicue, Pabo, Sinasi! —acanaje ejjajeanobiaquijji cuiñajjiya.

³⁷—Chojja —Pabo poanaje—. Ecuana mimishiꞌama. Jamatii Pinipo emeshi meseya ecuana iña mee canaje. Jeanobiajea mee canaje peaꞌai. Ojjañaa ba caquinaje onaa janobajjima nei cuiasejja caqui. Ecuana ca ca Shomano dejja peaꞌai. Jamajjeya jjeyahua nei ecuana quehuajje nei huoojea sa acani. Chojja, de. Oya cuana capoeꞌyahua, oya tii. Shomano emeshi meseya ecuana capichojea caꞌyahua, ecuana cadojocuayaqui caꞌyahua esecue yasijje ojjañaja ebajji —Pabo poanaje.

³⁸Jamajjeya sohuinano cuana poquinaje. Shomano emeshi mese cuana huohui cañaquinaje Paboja esohui. Shajjaꞌajja majje Shomano emeshi mese cuana quea mete nee nee poanaje: —Eꞌe de, Pabo, Sinasi peaꞌai Shomano dejja cuana, de. Jamaya ecuanaja ba jjima. Shomano emeshi mese etiiya ecuana tecuea ca chanaꞌ —poanaje Pinipo emeshi mese cuana.