Esra 1

1

2

3

4

5

6

7

8

9

10

¹Iwe, lon aeuin ierin mwün Sirus ewe kingen Persia, ewe Samol mi Lapalap a amwökütükütü leluken Sirus pwe epwe föri pworausen asilesil ngeni unusen mwün. Ei a fis pwe epwe pwönüetä mine Jeremia a apasa fän alon ewe Samol mi Lapalap. Iwe, Sirus ewe kingen Persia a makeetiu,

²“Iei aloi ngang Sirus ewe kingen Persia: Ewe Samol mi Lapalap, ewe Koten läng, a ngeniei ekewe mwün fanüfan meinisin. Iwe, a filiei pwe üpwe aüetä eu imwenfel fän itan me lon Jerusalem lon ewe fanü Juta.

³Ämi meinisin mi iteni nöün Kot aramas, Kot epwe etikemi. Oupwe feila Jerusalem lon ewe fanü Juta, pwe oupwe aüsefälietä imwen ewe Samol mi Lapalap ewe Koten Israel, i ewe Kot mi nom Jerusalem.

⁴Iwe, iteiten eman me eman mi chüen manau o mochen liwinsefäl, ese lifilifil ia a nom ie, epwe angei alilisin seni aramasen lenian. Epwe angei silifer me kolt, sokopaten pisek me man, pwal ekewe asor aramas ra fangala seni mochenin letiper fän iten ewe imwen Kot mi nom lon Jerusalem.”

⁵Mürin, mwänirelan än semer kewe cho seni ewe ainangen Juta me Peniamin, ekewe souasor me ekewe aramas seni ewe ainangen Lefi, pwal ir meinisin Kot a amwökütükütü leluker ra ütä pwe repwe feila o aüsefälietä imwen ewe Samol mi Lapalap mi nom Jerusalem.

⁶Nge chon arur meinisin ra alisiir ren pisek seni silifer, ren kolt me sokopaten pisek, ren man pwal ren pisek mi aüchea, fiti ekewe asor ra fangala seni mochenin letiper.

⁷Iwe, ewe king Sirus a pwal atowu ekewe pisek Nepukatnesar a angei seni imwen ewe Samol mi Lapalap lon Jerusalem me lom o anomu lon imwen an kewe kot.

⁸Iwe, Sirus ewe kingen Persia a atorolong fän nemenien Mitretat ewe chon tümwünü moni. Ätei a aleani ekewe pisek ngeni Sespasar ewe samolun Juta.

⁹Iwe, iei iteiten ekewe pisek: Ilik sepi seni kolt, engeröü sepi seni silifer, rüe me tiu sepi fän iten apach mi pwokus,

¹⁰ilik kükün sepi seni kolt me föpükü engol kükün sepi seni silifer, pwal engeröü sokopaten sepi.

¹¹Iwe, ekewe pisek meinisin seni kolt me silifer ükükür limungeröü föpükü. Ekei pisek meinisin Sespasar a uwala, lupwen i me ekewe chon oola ra towu seni Papilon o liwinsefäliti Jerusalem.