Ekeliziasiti 4:2-11

²Meke zama si rau sapu arini pu ele mate, si qetu hola ni sarini pu toadi.

³Ba sapu leana holani sari karua si asa pu lopu ele podo, asa pu lopu ele dogoria sa kinaleana sapu ta tavete pa kauruna sa rimata.

⁴Meke dogoria rau sapu doduru minabo pa tinavete meke doduru binokaboka si vuradi koasa inokoro tanisa tie pude tagoa gua sapu tagoa sa turaṉana. Meke hie tugo si loketoṉa laena, na hadu luli givusu mo.

⁵Sa tie pekipeki si poloi sari limana, ovia si asa, meke ṉovala pule nia, sina korona tavetavete.

⁶Leana si be tagoa goi si keke sinara lima pa binule hola nia sapu be karua sinara lima ba pa minabo meke hadu lulia sa givusu.

⁷Dogoria pule rau si keketoṉa sapu loke laena pa kauruna sa rimata:

⁸Koa nana si keke tie koa ekeina; loke tuna koreo babe tasina koreo si asa. Loke vina betona sa tinavetavete tanisa, ba sari na matana si lopu manoto ni sari nana tinagotago. “Ura, esei si korapa tavetavete ponia rau,” gua si asa, “meke na vea ke hukata pule nau pude qetuqetu qua?” Hie tugo ba loketoṉa laena, keke ginugua sapu variva hakohakona.

⁹Karua si leana hola nia sapu keke, sina kote noma laena sa dia tinavete.

¹⁰Be hoqa si keke, ba sa nana baere kote ovulu sage pule nia!

¹¹Meke be karua si eko varigara, si kote vari maṉini. Ba vea meke kote boka koa maṉini si keke tie telena?